រដ្ឋមន្រ្ដីអភិវឌ្ឍន៍ជនបទ ផ្ដល់អនុសាសន៍មួយចំនួនដល់មន្ត្រីក្រោមឱវាទ សំដៅពង្រីកការអភិវឌ្ឍសហគមន៍ និងបន្តជួយដល់ជនជាតិដើមភាគតិច

ភ្នំពេញ៖ ឯកឧត្តម ឆាយ ឫទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទ នាថ្ងៃទី៦ ខែកញ្ញា ឆ្នាំ២០២៣ បានអញ្ជើញជួបសំណេះសំណាលជាមួយថ្នាក់ដឹកនាំទទួលបន្ទុកនាយកដ្ឋាន និងមន្ត្រីរាជការនៃនាយកដ្ឋានអភិវឌ្ឍន៍សហគមន៍ និងនាយកដ្ឋានអភិវឌ្ឍន៍ជនជាតិភាគតិច ព្រមទាំងបានផ្ដល់អនុសាសន៍មួយចំនួនផ្ដោតលើការពង្រីកការអភិវឌ្ឍសហគមន៍ និងបន្តជួយដល់ជនជាតិដើមភាគតិច។

នាឱកាសនោះ ឯកឧត្តម អឿន ធារិទ្ធ ទីប្រឹក្សាក្រសួង និងជាប្រធាននាយកដ្ឋានអភិវឌ្ឍន៍សហគមន៍ និងលោកជំទាវ នួន មុនីចិន្ដា ប្រធាននាយកដ្ឋានអភិវឌ្ឍន៍ជនជាតិភាគតិច បានរាយការណ៍ពីវឌ្ឍនភាពការងារ សមិទ្ធផលសម្រេចបាន ក៏ដូចជាបញ្ហា ការប្រឈម និងទិសដៅការងាររបស់នាយកដ្ឋានទាំងពីរ សម្រាប់ឆមាសទី១ ឆ្នាំ២០២៣ លើការងារអភិវឌ្ឍន៍សហគមន៍ និងជនជាតិដើមភាគតិចរួចមក។

ឯកឧត្តមរដ្ឋមន្រ្ដី បានសម្ដែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីជំនាញនៃនាយកដ្ឋានទាំងពីរ ដែលសម្រេចបានលទ្ធផលគួរជាទីមោទនៈ។

ឯកឧត្តមរដ្ឋមន្រ្ដី ចាត់ទុកនាយដ្ឋានទាំងពីរនេះដើរតួនាទីយ៉ាងសំខាន់ក្នុងការលើកកម្ពស់ជីវភាពរស់នៅរបស់ប្រជាពលរដ្ឋនៅជនបទ។ ឯកឧត្តមរដ្ឋមន្រ្ដី បានបន្តថា ទាំងនេះគឺជាលះបង់របស់មន្រ្ដីរាជការគ្រប់រូប រហូតទទួលបានការគាំទ្រយ៉ាងច្រើនលើសលប់ ពីសំណាក់ប្រជាពលរដ្ឋនៅទូទាំងប្រទេស តាមរយៈការចូលរួមបោះឆ្នោតជ្រើសតាំងតំណាងរាស្ត្រកន្លងមក។

ក្នុងឱកាសសំណេះសំណាលនោះ ឯកឧត្តមរដ្ឋមន្រ្ដី ក៏បានផ្ដល់នូវអនុសាសន៍ណែនាំ និងផ្តាំផ្ញើជូនដល់ថ្នាក់ដឹកនាំទទួលបន្ទុក និងមន្ត្រីរាជការក្រោមឱវាទនាយកដ្ឋានទាំងពីរ ដូចខាងក្រោម៖

១. ផ្អែកលើសមិទ្ធផលដែលមានស្រាប់ នាយកដ្ឋានទាំងពីរត្រូវខិតខំជំរុញបង្កើតសមិទ្ធផល និងស្នាដៃថ្មីៗបន្ថែមទៀត ដើម្បីរួមចំណែកអភិវឌ្ឍនៅជនបទឱ្យកាន់តែរីកចម្រើនបន្ថែមទៀត ស្របតាមយុទ្ធសាស្ត្របញ្ចកោណរបស់រាជរដ្ឋាភិបាលនីតិកាលទី៧ ឈានទៅសម្រេចចក្ខុវិស័យកម្ពុជាឆ្នាំ២០៣០ ជាប្រទេសចំណូលមធ្យមកម្រិតខ្ពស់ និងឆ្នាំ២០៥០ ជាប្រទេសមានប្រាក់ចំណូលខ្ពស់។

២. នាយកដ្ឋានអភិវឌ្ឍន៍សហគមន៍ ត្រូវខិតខំពង្រឹងសមត្ថភាពគណៈកម្មការអភិវឌ្ឍន៍ភូមិ (គ.អ.ភ.)។

៣. នាយកដ្ឋានអភិវឌ្ឍន៍ជនជាតិដើមភាគតិច ត្រូវខិតខំពង្រឹងសមត្ថភាពគណៈកម្មការអភិវឌ្ឍន៍សហគមន៍ជនជាតិដើមភាគតិច និងត្រូវខិតខំរៀបចំបញ្ចប់ផែនទីទីតាំងរស់នៅនៃសហគមន៍ជនជាតិដើមភាគតិច។

៤. សិក្សាបង្កើតឱ្យមានភូមិគំរូ ដោយជ្រើសរើសយកភូមិដែលមានសក្ដានុពល និងអំណោយផលលើផ្នែកសេដ្ឋកិច្ច ទេសចរណ៍ ឬកសិផលផ្សេងៗ តាមស្ថានភាពភូមិសាស្ដ្រ ជាពិសេសនៅតំបន់សហគមន៍ជនជាតិដើមភាគតិច។

៥. រៀបចំឱ្យមានវគ្គបណ្ដុះបណ្ដាលបំណិនជីវិត ឬជំនាញចាំបាច់ជូនដល់សហគមន៍ឱ្យស្របតាមតម្រូវការ និងស្ថានភាពជាក់ស្ដែង។

៦. បណ្ដុះបណ្ដាលជំនាញទន់ពាក់ព័ន្ធនឹងការផ្លាស់ប្ដូរឥរិយាបថ ការផ្លាស់ប្ដូរផ្នត់គំនិត សីលធម៌នៃការរស់នៅប្រកបដោយកិច្ចសហការ និងសាមគ្គីភាពខ្ពស់។

៧. ថ្នាក់ដឹកនាំ និងមន្ត្រីនៃនាយកដ្ឋានទាំងពីរ ត្រូវគោរពវិន័យ របៀបរបបធ្វើការ កំណត់របបប្រជុំតាមដាន និងត្រួតពិនិត្យជាប្រចាំខែ ត្រីមាស ឆមាសឱ្យបានទៀងទាត់ និងត្រូវរាយការណ៍និងសុំយោបល់ឱ្យបានទាន់ពេលវេលា។

៨. នាយកដ្ឋានទាំងពីរត្រូវត្រៀមរបាយការណ៍សមិទ្ធផលរបស់ខ្លួនសម្រាប់រៀបចំសន្និបាតបូកសរុបលទ្ធផលការងារប្រចាំឆ្នាំ២០២៣ និងទិសដៅការងារឆ្នាំបន្ត ដែលគ្រោងនឹងប្រារព្ធនៅថ្ងៃទី២២ ខែធ្នូ ឆ្នាំ២០២៣។

៩. ពង្រឹងសាមគ្គីភាពផ្ទៃក្នុងឱ្យរឹងមាំ ដើម្បីបំពេញការងារឱ្យកាន់តែមានប្រសិទ្ធភាពខ្ពស់ ដោយយកចិត្តទុកដាក់លើសុខទុក្ខរបស់មន្រ្ដីរាជការមានជំងឺ មន្រ្ដីរាជការមានពិការភាព ជាពិសេសមន្ដ្រីរាជការជាស្រ្ដីមានផ្ទៃពោះ តាមរយៈការលើកទឹកចិត្ត និងការអនុគ្រោះពេលវេលាបំពេញការងារ ៕