លោក លី សារី ជម្រុញដល់អាជ្ញាធរនិងកងកម្លាំងសមត្ថកិច្ចត្រៀម ២៤ម៉ោងលើ២៤ម៉ោង សម្រាប់ត្រូលរាល់សភាពការណ៍ ដើម្បីបង្ការ បង្ក្រាបនិងសង្គ្រោះ

បន្ទាយមានជ័យ៖ គណៈកម្មការថ្នាក់ខេត្ត និងស្រុកមង្គលបូរី បានបើកកិច្ចប្រជុំគណៈបញ្ជាការឯកភាព ស្រុកមង្គលមង្គលបូរី ដើម្បីចុះស្រង់ទិន្នន័យត្រួតពិនិត្យហាងបញ្ចាំ និងចុះជម្រុញផ្សព្វផ្សាយ និងត្រួតពិនិត្យគ្រឿងញៀនក្នុងភូមិសាស្រ្ត ស្រុកមង្គលបូរី ក្រោមអធិបតីភាពលោក លី សារី អភិបាលរងខេត្ត តំណាងឯកឧត្ដម អ៊ុំ រាត្រី អភិបាលខេត្តបន្ទាយមានជ័យ ថ្ងៃទី៧ ខែកញ្ញា ឆ្នាំ២០២៣ម្សិលមិញ នៅសាលប្រជុំស្រុកមង្គលបូរី។

ឆ្លៀតក្នុងឱកាសនោះលោក លី សារី ក៏បានថ្លែង កោតសរសើរ និងវាយតម្លៃខ្ពស់ចំពោះការខិតខំប្រឹងប្រែង របស់ថ្នាក់ដឹកនាំស្រុក កងកម្លាំងទាំង៣ ដែលបានបំពេញតួរនាទី ភារកិច្ច និងបេសសកម្មបម្រើសេវាសាធារណៈ និងរក្សាសន្តិសុខ សណ្តាប់ធ្នាប់ជូនប្រជាពលរដ្ឋ និងបានល្អប្រសើរក្នុងមូលដ្ឋាន ។

ជាមួយគ្នានោះលោកក៏បាន ក្រើនរំលឹកដល់លោក លោកស្រីអាជ្ញាធរមូលដ្ឋានស្រុក ឃុំ ភូមិ ត្រូវបន្តផ្សព្វផ្សាយពីភូមិឃុំមានសុវត្ថិភាពទាំង ៧ចំណុចដល់ប្រជាពលរដ្ឋឲ្យចូលរួមអនុវត្តនិងយកចិត្តទុកដាក់បម្រើសេវាជូនប្រជាពលរដ្ឋឲ្យបានល្អ។ ជាពិសេស កងកម្លាំងទាំងអស់ត្រូវគ្រប់គ្រងផែនការ ត្រូវត្រៀមកម្លាំង២៤ម៉ោងលើ២៤ម៉ោង សម្រាប់ត្រូលសភាពការណ៍ បង្ការ បង្ក្រាប សង្គ្រោះ ដោយសព្វថ្ងៃនេះយើងសង្កេតឃើញថាក្នុងខេត្តបន្ទាយមានជ័យយើងបច្ចុប្បន្ន មានបញ្ហាក្មេងទំនើងដេញវ៉ៃកាប់ចាក់គ្នាតាមដងផ្លូវជាញឹកញាប់ដែលបង្កឲ្យបាត់បង់នូវសណ្តាប់ធ្នាប់សាធារណៈ៕