សម្តេចធិបតី ហ៊ុន ម៉ាណែត៖ កម្ពុជាត្រូវបានវាយតម្លៃស្មើមុខស្មើមាត់ នៅក្នុងឆាកអន្តរជាតិ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា កម្ពុជាត្រូវបា នវាយតម្លៃស្មើមុខស្មើមាត់នៅក្នុងកិច្ចប្រជុំកំពូលអាស៊ាន កម្ពុជាត្រូវបានឱ្យតម្លៃស្មើមុខស្មើមាត់នៅលើ ឆាកអន្តរជាតិដូចបណ្តាប្រទេសដទៃទៀតដែរ។

សម្តេចមហាបវរធិបតី ហ៊ុន ម៉ាណែត បានមានប្រសាសន៍បែបនេះក្នុងឱកាសអញ្ជើញចុះជួបសំណេះសំណាលជាមួយកម្មករ និយោជិត ចំនួន ១៨,២៦៥នាក់ មកពីរោងចក្រ សហគ្រាសចំនួន១៤ ដែលមានមូលដ្ឋាននៅក្នុងស្រុកសំរោងទង ខេត្តកំពង់ស្ពឺ នាព្រឹកថ្ងៃទី០៩ ខែកញ្ញា ឆ្នាំ២០២៣។

សម្តេចធិបតី បានបន្តថា មានអ្នកខ្លះបាននិយាយថាកម្ពុជាមិនត្រូវបានទទួល ស្វាគមន៍នៅក្នុងកិច្ចប្រជុំអាស៊ាននោះទេ។ សម្ដេចអធិបតី បញ្ជាក់ថា គ្រាន់តែពិធីទទួលស្វាគមន៍ពេលទៅដល់លើកម្រាលព្រំក្រហម ត្រួតពល ហើយនិងឡានដាក់ទង់ជាតិកម្ពុជា គឺវាគ្រប់គ្រាន់ណាស់ក្នុងការបញ្ជាក់យើងជារាជរដ្ឋាភិបាលស្របច្បាប់ ហើយកន្លែងដែលខ្ញុំអង្គុយនៅក្នុងកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ ក៏បានបង្ហាញថាខ្ញុំជាតំណាងឲ្យព្រះរាជាណាចក្រកម្ពុជា ផងដែរ។ ខ្ញុំមិនមែនជាតំណាងដែលត្រូវគេរៀបចំកៅអីឲ្យអង្គុយនៅខាងក្រោយនោះទេ ៕