សម្តេចធិបតី ហ៊ុន ម៉ាណែត និងលោកជំទាវ រ៉ាប់រ៉ងការចំណាយទាំងអស់ ក្នុងការព្យាបាលកុមារា ឃុន សុខបញ្ញា ដែលមានជំងឺទឹកដក់ក្នុងថង់ពងស្វាសពីកំណើត

ភ្នំពេញ៖ កុមារា ឃុន សុខបញ្ញា អាយុ ០៥ឆ្នាំ រស់នៅភូមិកោះគោ ឃុំមានជ័យ ស្រុកស្រីសន្ធរ ខេត្តកំពង់ចាម មានជំងឺទឹកដក់ក្នុងថង់ពងស្វាសពីកំណើត (Hydrocele) ប៉ុន្តែស្ថានភាពគ្រួសារមានជីវភាពខ្វះខាត ទើបពុំមានលទ្ធភាពព្យាបាល។

ដោយទឹកចិត្តសប្បុរសធម៌ពីសំណាក់សម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី, លោកទាំងទ្វេ បានបញ្ជូនកុមារាមកទទួលការវះកាត់ និងព្យាបាលនៅមន្ទីរពេទ្យកុមារជាតិ តាមរយៈក្រុមគ្រូពេទ្យស្ម័គ្រចិត្តសម្តេចតេជោ (TYDA)។ បន្ទាប់ពីបានទទួលការវះកាត់យ៉ាងយកចិត្តទុកដាក់ រហូតទទួលភាពជោគជ័យ បច្ចុប្បន្ន កុមារាបានជាសះស្បើយ និងបានអនុញ្ញាតអោយចេញទៅផ្ទះវិញហើយ។

ការចំណាយទាំងអស់ទាំងក្នុងការព្យាបាល វះកាត់ ការស្នាក់នៅ និងហូបចុក គឺត្រូវបានឧបត្ថម្ភទំនុកបម្រុងដោយសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី៕