នាយឧត្តមសេនីយ៍ សែម សុវណ្ណនី និងឧត្តមសេនីយ៍ឯក ខៀវ ឆេន អញ្ជើញពិនិត្យនៅសាលាហ្វឹកហ្វឺន កងកម្លាំងរក្សាសន្តិភាពពហុសាសន៍ ដើម្បីត្រៀមលក្ខណៈទទួល រដ្ឋមន្រ្តីការពារជាតិ

ភ្នំពេញ៖ ឯកឧត្តម នាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិរក្សាសន្តិភាព និងឯកឧត្តម ឧត្តមសេនីយ៍ឯក ខៀវ ឆេន នាយកខុទ្ទកាល័យ​ ឧបនាយករដ្ឋមន្ត្រី​ រដ្ឋមន្រ្តីក្រសួងការពារជាតិ នាថ្ងៃទី៩ ខែកញ្ញា ឆ្នាំ២០២៣ បានអញ្ជើញចុះត្រួតពិនិត្យនៅសាលាហ្វឹកហ្វឺនកងកម្លាំងរក្សាសន្តិភាពពហុសាសន៍ ដើម្បីត្រៀមលក្ខណៈទទួលវត្តមានដ៏ខ្ពង់ខ្ពស់ ឯកឧត្តម ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ដែលនឹងអញ្ជើញជាអធិបតី ក្នុងពិធីបិទវគ្គលំហាត់ហ្វឹកហ្វឺនប្រតិបត្តិការពហុជាតិលើទីលានបោសសំអាតមីនមនុស្សធម៌ និងយុទ្ធភ័ណ្ឌមិនទាន់ផ្ទុះ ក្នុងក្របខ័ណ្ឌកិច្ចប្រជុំរដ្ឋមន្ត្រីការពារជាតិអាស៊ាន-បូក ក្រោមប្រធានបទ “មាតុភូមិដ៏បវរ-ឆ្នាំ២០២៣” នាពេលខាងមុខនេះ។

លំហាត់ហ្វឹកហ្វឺនប្រតិបត្តិការពហុជាតិ ក្រោមប្រធានបទ “មាតុភូមិដ៏បវរ-ឆ្នាំ២០២៣” មានបណ្តាប្រទេសជាមិត្តចំនួន១២ប្រទេស បានឆ្លើយតបចូលរួម ដែលមានកម្ពុជាជាម្ចាស់ផ្ទះសហប្រធានជាមួយមិត្តចិន ។ លំហាត់ហ្វឹកហ្វឺននេះធ្វើឡើងដើម្បីពង្រឹងកិច្ចសហប្រតិបត្តិការ​ និងចំណងមិត្តភាព កម្ពុជា-ចិន​ ព្រមជាមួយបណ្តាប្រទេសចូលរួម​ លើផ្នែកបោសសំអាតមីនមនុស្សធម៌​ និងយុទ្ធភ័ណ្ឌមិនទាន់ផ្ទុះ។

ទន្ទឹមនឹងនោះ ឯកឧត្តម នាយឧត្តមសេនីយ៍ សែម សុវណ្ណនី ក៏បានអញ្ជើញសួរសុខទុក្ខកងកម្លាំងកម្ពុជា និងស្វាគមន៍កងកម្លាំងមិត្តចិន ដែលកំពុងហ្វឹកហ្វឺន តាមទីតាំងនីមួយៗ រួមទាំងបានចុះពិនិត្យការដ្ឋានសាងសង់អាគារទាំង៣ខ្នង ដែលកំពុងលេចរូបរាងម្តងបន្តិចៗ ក្នុងបរិវេណសាលា PKO ផងដែរ៕