សម្តេច ម៉ែន សំអន ប្រកាសគាំទ្រ រាជរដ្ឋាភិបាល អាណត្តិទី៧ ដែលមាន សម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តី

ភ្នំពេញ៖ នៅថ្ងៃចន្ទ ១១រោច ខែស្រាពណ៍ ឆ្នាំថោះ បញ្ចស័ក ព.ស. ២៥៦៧ ត្រូវនឹង ថ្ងៃទី១១ ខែកញ្ញា ឆ្នាំ២០២៣ សម្តេចកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា និងជាឧត្តមប្រឹក្សាផ្ទាល់ព្រះមហាក្សត្រ បានប្រកាសឥតងាករេគាំទ្រគោលនយោបាយ រាជរដ្ឋាភិបាល អាណត្តិទី៧ នៃរដ្ឋសភា ដែលមាន សម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តី។

ការប្រកាសនេះ បានធ្វើឡើង បន្ទាប់ពីក្រុមប្រឆាំងមួយចំនួន នៅតែបន្តលើកឡើង ប្រតិដ្ឋនូវព័ត៌មាននានាក្នុងបំណងបំបែកបំបាក់ផ្ទៃក្នុងគណបក្សប្រជាជនកម្ពុជា និងការបង្កើតរាជរដ្ឋាភិបាលកម្ពុជាស្របច្បាប់ដែលកើតចេញពីការបោះឆ្នោត។

សម្តេចកិត្តិសង្គហបណ្ឌិត ម៉ែន សំអន បានអំពាវនាវដល់ជនរួមជាតិ កុំជឿតាមការញុះញង់របស់ក្រុមអគតិទាំងនោះ ដែលតែងព្យាយាមបំផ្លិចបំផ្លាញ សន្តិភាព ស្ថិរភាពនយោបាយ និងរាំងស្ទះដល់ការអភិវឌ្ឍសង្គម សេដ្ឋកិច្ចកម្ពុជា និងធ្វើឲ្យសាធារណជនមានការភ័ន្តច្រឡំលើគោលការណ៍ដឹកនាំដ៏ត្រឹមត្រូវ របស់គណបក្សប្រជាជនកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខ។

សម្តេចកិត្តិសង្គហបណ្ឌិត បានអំពាវនាវដល់ជនរួមជាតិទាំងអស់ សូមបន្តគាំទ្រ និងលើកទឹកចិត្តដល់ សម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តី បានបំពេញភារកិច្ចរបស់ខ្លួនឲ្យបានសម្រេច និងទទួលបានជោគជ័យយ៉ាងល្អប្រសើរ តាមយុទ្ធសាស្រ្តបញ្ចកោណ ដំណាក់កាលទី ១ និងកម្មវិធីនយោបាយរបស់រាជរដ្ឋាភិបាល ៕