រាជរដ្ឋាភិបាលអាណត្តិថ្មី បន្តអនុវត្តអនុសាសន៍ចំនួន១០ចំណុចរបស់សម្តេចតេជោ ហ៊ុន សែន អតីតនាយករដ្ឋមន្ត្រី ដែលផ្តល់អត្ថប្រយោជន៍ដល់កម្មករនិយោជិត
ភ្នំពេញ៖ រាជរដ្ឋាភិបាលកម្ពុជាអាណត្តិទី៧ នៅបន្តអនុវត្តអនុសាសន៍ចំនួន១០ចំណុចរបស់សម្តេចតេជោ ហ៊ុន សែន អតីតនាយករដ្ឋមន្ត្រី ដែលផ្តល់អត្ថប្រយោជន៍ដល់កម្មករនិយោជិត។
នេះគឺជាការបញ្ជាក់របស់សម្តេចមហាបរវធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបានថ្លែងក្នុងពិធីសំណេះសំណាលជាមួយកម្មកកាលពីកន្លងទៅថ្មីៗ។
អត្ថប្រយោជន៍១០ចំណុចនោះ រួមមាន៖
ទី១. ប្រាក់ឈ្នួលអប្បរមាចំនួន២០០ដុល្លារអាមេរិក ដោយមិនទាន់រាប់បញ្ចូលប្រាក់អត្ថប្រយោជន៍ចំនួន៥ផ្សេងទៀត ដែលកម្មករម្នាក់ទទួលបានជាមធ្យមទទួលបានប្រាក់ឈ្នួលចន្លោះ ២១៧-២៥៩ដុល្លារអាម៉េរិក ហើយបើក១ខែចំនួន២ដង។
ទី២. ការទទួលបានការពិនិត្យព្យាបាលជំងឺដោយមិនបង់ប្រាក់ តាមរយៈបណ្ណរបបសន្តិសុខសង្គម (ប.ស.ស.)។
ទី៣. ការទទួលបានប្រាក់ឈ្នួល ១២០% និងឈប់សម្រាករយៈពេល៣ខែក្នុងពេលសម្រាលកូន។
ទី៤. ទទួលបានប្រាក់ឧបត្ថម្ភក្រោយពេលសម្រាលកូន ដោយកូន១នាក់ទទួលបានថវិកា៨០ម៉ឺនរៀល កូន២នាក់ទទួលបាន១.២លានរៀល និងកូន៣នាក់ទទួលបាន១.៦លានរៀល ព្រមទាំងទទួលបានថវិកាបន្ថែមចំនួន៥លានរៀល ពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិតផ្ទាល់។
ទី៥. និយោជកបានបង់ភាគទានរបបសន្តិសុខសង្គមផ្នែកថែទាំសុខភាព ១០០% ជំនួសកម្មករនិយោជិត។
ទី៦. បន្តត្រួតពិនិត្យថ្លៃឈ្នួលផ្ទះដោយមិនឱ្យដំឡើងថ្លៃខ្ពស់ហួសពេក ខណៈដែលថ្លៃទឹកនិងថ្លៃអគ្គិសនីនៅតាមផ្ទះជួលតភ្ជាប់បណ្តាញអគ្គិសនី និងទឹកស្អាតពីរដ្ឋ និងតម្លៃរបស់រដ្ឋ។
ទី៧. ពង្រឹងការអនុវត្តច្បាប់ស្ពីពីរបបសន្តិសុខសង្គម ជាពិសេសរបបសន្តិសង្គមផ្នែកប្រាក់សោធន។
ទី៨. ការអនុវត្តច្បាប់ស្តីពីការងារដើម្បី កំណត់ការបើកប្រាក់បំណាច់អតីតភាពការងារជូនកម្មករនិយជិត៦ខែម្តង។
ទី៩. ការដោះស្រាយបញ្ហាសុវត្ថិភាពក្នុងការដឹកជញ្ជូន និងការធ្វើដំណើររបស់កម្មករនិយោជិត កែសម្រួលមធ្យោបាយដឹកជញ្ជូន និងពង្រឹងការអនុវត្តច្បាប់ចរាចរណ៍។
ទី១០. ការពង្រីកកិច្ចសហការជាមួយប្រទេសជាដៃគូ ដើម្បីផ្តល់ឱកាសការងារ ការពារសិទ្ធិ និងផលប្រយោជន៍ពលករនៅក្រៅប្រទេស ដើម្បីទទួលបានរបបគាំពារសង្គមទាំងបច្ចុប្បន្ន និងពេលដែលវិលត្រឡប់មកវិញ។
សូមបញ្ជាក់ថា រាជរដ្ឋាភិបាលអាណត្តិទី៧ ក្រៅពីបន្តអនុវត្តអនុសាសន៍១០ចំណុចខាងលើហើយ ក៏នៅដាក់ចេញនូវគោលការណ៍១០ចំណុចទៀត ដោយ៦ចំណុចត្រូវអនុវត្តនៅឆ្នាំ២០២៣នេះ ហើយ៤ចំណុចផ្សេងទៀតត្រូវបន្តអនុវត្តក្នុងរយៈពេល២ឆ្នាំ ដើម្បីពង្រឹងផលិតភាពការងារ និងភាពសុខដុមរមនាក្នុងរោងចក្រ ក្នុងគោលបំណងពង្រឹងនិងលើកកម្ពស់ជីវភាពរបស់កម្មករនិយោជិត។ វិធានការរបស់រាជរដ្ឋាភិបាលយ៉ាងដូច្នេះ ត្រូវបានគេមើលឃើញថាជាការយកចិត្តទុកដាក់ជាអាទិភាពចំពោះកម្មករនិយោជិត៕
