នាយឧត្តមសេនីយ៍ ប៉ោ ភក្តិ ដឹកនាំកិច្ចប្រជុំ ធ្វើបទបង្ហាញស្តីពីប្រព័ន្ធបច្ចេកវិទ្យាឌីជីថល ដែលនឹងដាក់ដំណើរការនៅទីស្តីការក្រសួងមហាផ្ទៃ នាពេលឆាប់ៗខាងមុខ
ភ្នំពេញ៖ នៅទីស្ដីការក្រសួងមហាផ្ទៃ នាព្រឹកថ្ងៃទី១៣ ខែកញ្ញា ឆ្នាំ២០២៣នេះ ឯកឧត្តម នាយឧត្តមសេនីយ៍ ប៉ោ ភក្តិ រដ្ឋលេខាធិការ ក្រសួងមហាផ្ទៃ បានអញ្ជើញជាអធិបតីដឹកនាំកិច្ចប្រជុំធ្វើបទបង្ហាញរបស់អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ស្តីពីគម្រោងនៃការរៀបចំដាក់ឱ្យប្រើប្រាស់ប្រព័ន្ធបច្ចេកវិទ្យាឌីជីថល ជូនដល់អគ្គលេខាធិការដ្ឋាន នាពេលឆាប់ៗខាងមុខ ដោយមានការអញ្ជើញចូលរួមពី ឯកឧត្តម ឧត្តមសេនីយ៍ឯក ផាត សុផានិត អគ្គលេខាធិការ នៃអគ្គលេខាធិការដ្ឋាន និងថ្នាក់ដឹកនាំចំណុះអគ្គលេខាធិការដ្ឋាន ព្រមទាំងមន្ដ្រីបច្ចេកទេសជាច្រើនរូបទៀត។
ក្នុងកិច្ចប្រជុំនេះដែរ ឯកឧត្តម ប៉ោ ភក្តិ បានមានប្រសាសន៍រំលឹកថា នាពេលថ្មីៗនេះ ឯកឧត្តម បានអញ្ជើញដឹកនាំកិច្ចប្រជុំត្រួតពិនិត្យលើប្រព័ន្ធបច្ចេកវិទ្យា ដែលមានសារៈសំខាន់មួយចំនួន របស់អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ក្រសួងមហាផ្ទៃ ក្នុងគោលបំណងពិនិត្យវឌ្ឍនភាពរួម ដោយផ្ដោតទៅលើកិច្ចការងារមួយចំនួន ដើម្បីធ្វើទំនើបកម្មចរន្តការងារទៅជាលក្ខណឌីជីថល។
ឯកឧត្តម រដ្ឋលេខាធិការ បានលើកឡើងថា ចំពោះប្រព័ន្ធបច្ចេកវិទ្យាឌីជីថល ដែលកំពុងដាក់សាកល្បងឱ្យប្រើប្រាស់ នៅអគារទីស្ដីការក្រសួងមហាផ្ទៃនេះ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ គួរធ្វើការបណ្ដុះបណ្ដាលពីការប្រើប្រាស់ដល់មន្ដ្រី ដែលជាអ្នកគ្រប់គ្រងអគារទីស្ដីការក្រសួងមហាផ្ទៃ ដើម្បីធ្វើយ៉ាងណាឱ្យប្រព័ន្ធបច្ចេកវិទ្យានេះ ដំណើរការបានដោយរលូន សម្រាប់ថ្នាក់ដឹកនាំ និងមន្ដ្រីទាំងអស់ ដែលកំពុងបំពេញការងារនៅទីស្ដីការក្រសួងមហាផ្ទៃ៕
