ឯកឧត្ដម ប៉ុញ សច្ចៈ ចុះពិនិត្យស្ថានភាពប្រព័ន្ធរំដោះទឹកជំនន់ទឹកភ្លៀង និងទឹកជំនន់ស្ទឹងព្រែកត្នោតក្នុងភូមិសាស្ត្ររាជធានីភ្នំពេញ និងខេត្តកណ្តាល

ភ្នំពេញ៖ ឯកឧត្ដម ប៉ុញ សច្ចៈ រដ្ឋលេខាធិការក្រសួងធនធានទឹក និងឧតុនិយម និងជាប្រធានមុខព្រួញរាជធានីភ្នំពេញ ខេត្តកណ្តាល និងខេត្តកំពង់ស្ពឺ អមដំណើរដោយឯកឧត្តម ជួន ប៊ិតថុល អនុរដ្ឋលេខាធិការ ឯកឧត្តមអគ្គាធិការ អនុប្រធាននាយកដ្ឋានចំណុះក្រសួង នារសៀលថ្ងៃព្រហស្បតិ៍ ១៤រោច ខែស្រាពណ៍ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១៤ ខែកញ្ញា ឆ្នាំ២០២៣ បានអញ្ជើញចុះពិនិត្យស្ថានភាពប្រព័ន្ធរំដោះទឹកជំនន់ទឹកភ្លៀង និងទឹកជំនន់ស្ទឹងព្រែកត្នោតក្នុងភូមិសាស្ត្ររាជធានីភ្នំពេញ និងខេត្តកណ្តាល ដោយសហការជាមួយលោក ប្រាក់ ឡាក់ ប្រធានមន្ទីរធនធានទឹក និងឧតុនិយមខេត្តកណ្តាល និងលោក ម៉ៅ ប៊ុនធឿន ប្រធានមន្ទីរធនធានទឹក និងឧតុនិយមរាជធានីភ្នំពេញ។

ក្រោយចុះពិនិត្យ និងពិភាក្សារកបញ្ហាប្រឈមក្នុងតំបន់នីមួយៗរួចមក ឯកឧត្ដមរដ្ឋលេខាធិការបានមានប្រសាសន៍ឱ្យដឹងថា សម្រាប់ភូមិសាស្រ្តខេត្តកណ្តាលគឺ៖
ទី១.សិក្សាតភ្ជាប់ចុងកន្ទុយប្រឡាយ៦២ ត្រង់ចំណុចប្រឡាយ៩៤ ទៅប្រឡាយ៩៦។
ទី២.សិក្សាបន្តប្រឡាយ៩៦ ចាប់ពីបឹងរានទៅភ្ជាប់នឹងទំនប់៥៤ និងពីទំនប់៥៤ ទៅភ្ជាប់នឹងស្ទឹងព្រែកអំបិល។
ទី៣.សម្រាប់ប្រឡាយ៥៩,៦០ និង៦១ នាយកដ្ឋានវិស្វកម្មនៃក្រសួងធនធានទឹក សិក្សាគ្រោងប្លង់។
ទី៤.សិក្សាទំនប់សណ្តអូរចាមានប្រវែង ៧,៥០០ម៉ែត្រ។

ដោយឡែក សម្រាប់ក្នុងភូមិសាស្ត្ររាជធានីភ្នំពេញ ទាំង ភាគខាងត្បូង និងខាងជើង ប្រឡាយស្រោចស្រព ដែលមានស្រាប់ទាំងអស់បានក្លាយជាប្រឡាយសម្រាប់រំដោះទឹកភ្លៀង និងទឹកកខ្វក់ជាបណ្តើៗរួចស្រេចទៅហើយ ដូច្នេះ ឯកឧត្តមរដ្ឋលេខាធិការ បានណែនាំឱ្យមន្ទីរធនធានទឹក និងឧតុនិយមរាជធានីភ្នំពេញ រៀបចំបញ្ចូលក្នុងផែនការសម្រាប់ធ្វើការស្តារដំឡើងស្ថានីយបូមទឹក អមដោយសំណង់ទ្វារទឹក សំណង់សិល្បការមួយចំនួន និងអាងសម្រាប់ធ្វើប្រព្រឹត្តិកម្ម ទឹកកខ្វក់មុននឹងទម្លាក់ចូលក្នុងស្ទឹងព្រែកត្នោត និងបឹងតាមោក ឬចូលទន្លសាប និងទន្លេបាសាក់ ៕