នាយឧត្តមសេនីយ៍ ស ថេត ទទួលជួបពិភាក្សាការងារជាមួយ ឯកអគ្គរាជទូតថៃប្រចាំកម្ពុជា
ភ្នំពេញ៖ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នារសៀលថ្ងៃសុក្រ ១កើត ខែភទ្របទ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១៥ ខែកញ្ញា ឆ្នាំ២០២៣ បានទទួលជួបពិភាក្សាការងារជាមួយឯកឧត្តម ឈើតគៀត អាត់ថាក័រ ឯកអគ្គរាជទូតថៃប្រចាំកម្ពុជា នៅទីស្តីការក្រសួងមហាផ្ទៃ។
បន្ទាប់ពីសំដែងនូវកិច្ចស្វាគមន៍ជូនគ្នាទៅវិញទៅមក ឯកឧត្តម ឈើតគៀត អាត់ថាក័រ បានសម្តែងនូវការអបអរសាទរជូនចំពោះ ឯកឧត្តម នាយឧត្តមសេនីយ៍ ស ថេត ដែលត្រូវបានព្រះមហាក្សត្រ ត្រាស់បង្គាប់តែងតាំងជា អគ្គស្នងការនគរបាលជាតិ។
ជំនួសមុខឲ្យនគរបាលភូមិន្ទថៃ ឯកឧត្តម ឈើតគៀត អាត់ថាក័រ បានលើកឡើងអំពីការបន្តលើកកម្ពស់ ពង្រឹង និងពង្រីកកិច្ចសហប្រតិបត្តិការ ដែលមានស្រាប់រវាងនគរបាលភូមិន្ទថៃ និងនគរបាលជាតិកម្ពុជា លើវិស័យរក្សាសន្តិសុខ សណ្តាប់ធ្នាប់ ជូនប្រជាពលរដ្ឋ និងប្រទេសទាំងពីរ។ ឯកឧត្តម ក៏បានថ្លែងការកោតសរសើរចំពោះការផ្តល់កិច្ចសហការរបស់នគរបាលជាតិកម្ពុជា ក្នុងការតាមចាប់មុខសញ្ញាតាមសំណើរបស់ភាគីថៃ ក៏ដូចជាការជួយគាំទ្រគ្នាទៅវិញទៅមកក្នុងការចាប់ជនល្មើស ដែលលួចឆ្លងដែនសំងំលាក់ខ្លួនក្នុងប្រទេសទាំងពីរ។
ជាការឆ្លើយតប ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ រីករាយស្វាគមន៍ផ្តល់កិច្ចសហការ និងឯកភាពបន្តបង្កើនកិច្ចសហប្រតិបត្តិការឲ្យកាន់តែល្អប្រសើរបន្ថែមទៀត ដោយស្នើឲ្យរាល់សំណូមពរដែលពាក់ព័ន្ធបទល្មើស គឺត្រូវមានព័ត៌មានឲ្យបានច្បាស់លាស់ ពិសេសឯកសារផ្លូវច្បាប់មានដូចជា ភស្តុតាង ដីការបស់តុលាការរបស់ប្រទេសនីមួយៗ ដែលបម្រើឲ្យកិច្ចប្រតិបត្តិការស្វែងរក និងតាមចាប់ខ្លួនឧក្រិដ្ឋជន។
ក្នុងជំនួបនេះដែរ ឯកឧត្តម នាយឧត្តមសេនីយ៍ ស ថេត ក៏បានឯកភាពផ្តល់កិច្ចសហការក្នុងការរក្សាសន្តិសុខ និងសណ្តាប់ធ្នាប់ ជូនភាគីថៃសម្រាប់ព្រឹត្តិការណ៍នានា ផ្អែកតាមសំណូមពរជាក់ស្តែង ៕
