រដ្ឋមន្ត្រីក្រសួងបរិស្ថាន ផ្តល់អនុសាសន៍ អាទិភាព ៣ចំនុច ដល់មន្ត្រីក្រោមឱវាទ ដើម្បីពង្រឹងសក្តានុពលបរិស្ថានខេត្តកំពង់ឆ្នាំង
ភ្នំពេញ៖ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន នាព្រឹកថ្ងៃទី១៦ ខែកញ្ញា ឆ្នាំ២០២៣ បានអញ្ជើញជួបសំណេះសំណាលជាមួយ មន្ត្រីឧទ្យានុរក្ស និងប្រជាសហគមន៍តំបន់ការពារធម្មជាតិ ក្នុងខេត្តកំពង់ឆ្នាំង។
ថ្លែងក្នុងឱកាសនោះ ឯកឧត្តមបណ្ឌិត អ៊ាង សុផល្លែត បានថ្លែងនូវការកោតសសើរដល់មន្ត្រីបម្រើការងារនៅមន្ទីរបរិស្ថាន ក៏ដូចជាប្រជាសហគមន៍ដែលកន្លងមកនេះ បានបំពេញតួនាទីបានយ៉ាងល្អ ក្នុងរយៈកាលកន្លងមកនេះ។
បន្ថែមពីនេះ ឯកឧត្តមរដ្ឋមន្រី ក៏បានផ្តល់អនុសាសន៍សំខាន់ៗ សម្រាប់បន្តអនុវត្តអាទិភាពការងារ ៣ចម្បងៗរួមមាន៖
១. ការគ្រប់គ្រងប្លាស្ទិក ចូលរួមចំណែកថែរក្សាបរិស្ថាន នៅតាមបណ្តាសាលារៀន តំបន់រមណីយដ្ឋាន និងទីសារណៈសំខាន់មួយចំនួននៅក្នុងខេត្តកំពង់ឆ្នាំង។
២. ការគ្រប់គ្រងធនធានធម្មជាតិ ដើម្បីលើកកម្ពស់ជីវភាពរស់នៅរបស់ប្រជាសហគមន៍ឲ្យកាន់តែមានលក្ខណៈល្អប្រសើរ និងប្រែក្លាយតំបន់ទេសចរណ៍នៅក្នុងខេត្តឲ្យទៅជារបៀងទេសចរណ៍កាន់តែមានភាពទាក់ទាញដល់ភ្ញៀវទេសចរណ៍មកកាន់តំបន់រមណីយដ្ឋាននៅក្នុងខេត្តកាន់តែច្រើន និងមានភាពប្រទាក់ក្រឡាគ្នាទៅវីញទៅមក។
៣. កត្តាផ្សពផ្សាយនូវសក្តានុបរិស្ថានទៅលើឆាកអន្តរជាតិនូវសមិទ្ធផលទាំងឡាយ តាមរយៈអ្នកចូលរួម ដែលនឹងប្រែក្លាយពីអ្នកចូលរួមទៅជាអ្នកដឹកនាំលើវិស័យបរិស្ថាន ដើម្បីបង្ហាញអន្តរជាតិអំពីស្នាដៃ និងសមិទ្ធិផលដែលយើងបានធ្វើកន្លងមក ជួយឲ្យយើងអាចរកចំណូលបាន តាមរយៈ ប្រទេសដែលមានអព្យាក្រឹត្យកាបោននៅឆ្នាំ២០៥០ ស្របតាមយុទ្ធសាស្ត្របញ្ជកោណរាជរដ្ឋាភិបាលកម្ពុជានីតិកាលទី៧នេះ។
ជាមួយគ្នានេះ ការដាំដុះ និងស្តារព្រៃឡើងវិញ ឯកឧត្តមរដ្ឋមន្ត្រី បានស្នើឲ្យមន្ទីរបរិស្ថានត្រូវរៀបចំថ្នាលបណ្តុះកូនឈើ និងបណ្តុះកូនឈើឱ្យបាន ១ឆ្នាំ ១០ម៉ឺនដើម សម្រាប់ចែកជូនដល់សាធារណៈជន។ ការអនុវត្តបែបនេះ គឺជាភាពវៃឆ្លាតក្នុងការបំពេញការងារខណៈមន្ទីរយើងមានគ្នាតិច ហើយចង់សម្រេចបានលទ្ធផលធំ និងលឿនរហ័ស គឺត្រូវជំរុញឱ្យប្រជាពលរដ្ឋជួយ និងសហការជាមួយមន្ទីរ ទើបការងារទទួលបានលទ្ធផលល្អ ហើយជាការចាំបាច់ណាស់ ដែលមន្ត្រីរាជការនៃមន្ទីរបរិស្ថានខេត្តកំពង់ឆ្នាំងទាំងអស់ ត្រូវធ្វើការដោយមានការទទួលខុសត្រូវ មានការតាមដានការងារជាប្រចាំ និងធ្វើការដោយប្រាកដនិយម ដើម្បីរួមគ្នាសម្រេចបាននូវជោគជ័យរបស់យើងទាំងអស់គ្នា ក្នុងការចូលរួមចំណែកថែរក្សានូវបរិស្ថាននៅក្នុងតំបន់ ៕
