អគ្គនាយកមជ្ឈមណ្ឌលជាតិរក្សាសន្តិភាព ស្នើដល់ភាគីកាណាដា ផ្តល់នូវវគ្គហ្វឹកហ្វឺន ដល់យោធិននារី ទៅលើជំនាញបោសសំអាតមីន សេនាធិការ និងសង្កេតការណ៍
ភ្នំពេញ៖ ឯកឧត្តម នាយឧត្តមសេនីយ៍ សែម សុវណ្ណនី អនុប្រធានទី១គណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព នាព្រឹកថ្ងៃទី២០ ខែកញ្ញា ឆ្នាំ២០២៣ បានទទួលជួបសាវនាការ និងពិភាក្សាការងារជាមួយ វរសេនីយ៍ទោ Paul Payne អនុព័ន្ធយោធាកាណាដាប្រចាំកម្ពុជា-វៀតណាម-ចិន នៅមជ្ឈមណ្ឌលជាតិរក្សាសន្តិភាព។
ឯកឧត្តម នាយឧត្តមសេនីយ៍ សែម សុវណ្ណនី ស្វាគមន៍យ៉ាងកក់ក្តៅចំពោះការអញ្ជើញមកដល់កម្ពុជារបស់លោកវរសេនីយ៍ទោ ជាពិសេសក្នុងការសិក្សាស្វែងយល់បន្ថែមពីចូលរួមប្រតិបត្តិការសន្តិភាព អ.ស.ប. របស់មជ្ឈមណ្ឌលជាតិរក្សាសន្តិភាព។
ឯកឧត្តម នាយឧត្តមសេនីយ៍ បានមានប្រសាសន៍ថា កម្ពុជា តែងតែលើកទឹកចិត្ត និងបញ្ជូនកងកម្លាំងជានារីចូលរួមបេសកកម្មរក្សាសន្តិភាព ដោយទទួលបានលំដាប់លេខរៀងទី ១០ លើ ១២៣ប្រទេសបរិច្ចាគកងកម្លាំង និងលេខ១ ក្នុងអាស៊ាន។
ឯកឧត្តម នាយឧត្តមសេនីយ៍ បានបន្តថា កងកម្លាំងនារី ពោរពេញទៅភាពទន់ភ្លន់ តែមោះមុត មានការប្រុងប្រយ័ត្នខ្ពស់ និងតែងដោះស្រាយបានរាល់បញ្ហា ក្នុងតំបន់បេសកកម្ម។
ត្រង់ចំណុចនេះ វរសេនីយ៍ទោ Paul Payne បានកោតសរសើរយ៉ាងខ្លាំងដល់កងកម្លាំងនារីកម្ពុជា និងបានលើកឡើងថា កម្ពុជា ជាប្រទេសមានប្រវត្តិយូរអង្វែងមកហើយក្នុងប្រតិបត្តិការរក្សាសន្តិភាព ។
លោកវរសេនីយ៍ទោ ក៏បានទទួលការចែករំលែកបទពិសោធន៍របស់កងកម្លាំងនារីកម្ពុជាពីររូប ក្នុងកិច្ចពិភាក្សានេះផងដែរ។ ជាមួយគ្នានោះ លោកវរសេនីយ៍ទោ ក៏ចង់មានវត្តមានចូលរួមក្នុងសកម្មភាពច្រើន របស់មជ្ឈមណ្ឌលជាតិរក្សាសន្តិភាព រួមទាំងគម្រោងត្រីភាគី កម្ពុជា-កូរ៉េ-អង្គការសហប្រជាជាតិ ដែលកម្ពុជា ធ្វើជាម្ចាស់ផ្ទះនាចុងឆ្នាំ២០២៣នេះ និងគម្រោងត្រីភាគី កម្ពុជា-ជប៉ុន-អង្គការសហប្រជាជាតិ នាឆ្នាំ២០២៤ ឬ ដើមឆ្នាំ២០២៥។
ឯកឧត្តម នាយឧត្តមសេនីយ៍ សែម សុវណ្ណនី សង្ឃឹមថាកិច្ចសហប្រតិបត្តិការរវាងកម្ពុជា និងកាណាដា នឹងកាន់តែរឹងមាំល្អទៅមុខបន្តទៀត។ ទន្ទឹមនោះ ឯកឧត្តម នាយឧត្តមសេនីយ៍ ក៏បានស្នើដល់ភាគីកាណាដា ផ្តល់នូវវគ្គហ្វឹកហ្វឺន បណ្តុះបណ្តាល ដល់យោធិននារី ទៅលើជំនាញបោសសំអាតមីន សេនាធិការ និងសង្កេតការណ៍ រួមទាំងផ្លាស់ប្តូរនូវដំណើរទស្សនកិច្ចរវាងប្រទេសទាំងពីរផងដែរ។ លោកវរសេនីយ៍ទោ ទទួលយកសំណើរដោយក្តីរីករាយ និងមានឆន្ទៈក្នុងការបង្កើតកិច្ចសហប្រតិបត្តិការឱ្យកាន់តែច្រើន ជាពិសេសរៀបចំឱ្យមានវគ្គហ្វឹកហ្វឺន ជាមួយមជ្ឈមណ្ឌលជាតិរក្សាសន្តិភាព ៕
