ឧបនាយករដ្ឋមន្រ្តី ហង់ជួន ណារ៉ុន ទទួលជួបសម្តែងការគួរសម និងពិភាក្សាការងារជាមួយ អគ្គលេខាធិការអាស៊ាន
ភ្នំពេញ៖ កាលពីរសៀលថ្ងៃទី២១ ខែកញ្ញា ឆ្នាំ២០២៣ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា និងជាតំណាងជាតិសម្រាប់សហគមន៍សង្គម-វប្បធម៌អាស៊ាន បានទទួលជួបសម្តែងការគួរសម ពិភាក្សាការងារជាមួយ ឯកឧត្តមបណ្ឌិត កៅ គឹមហួន អគ្គលេខាធិការអាស៊ាន នៅទីស្តីការ។
ឯកឧត្តមបណ្ឌិត បានអបអរសាទរដល់ឯកឧត្តមបណ្ឌិតសភាចារ្យ ហង់ជួន ណារ៉ុន ដែលទទួលបានការទុកចិត្តពីរាជរដ្ឋាភិបាល តែងតាំងជាឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា នៅក្នុងអាណត្តិទី៧នេះ។
ជំនួបនៃកិច្ចពិភាក្សានេះដើម្បីពិនិត្យទៅលើទិដ្ឋភាពជាច្រើនចំណុចរបស់សហគមន៍សង្គម-វប្បធម៌អាស៊ាន ដែលរួមមានការអប់រំ ការបំពុលបរិស្ថាន ការប្រែប្រួលអាកាសធាតុ ចំណាកស្រុក សេដ្ឋកិច្ចវិលជុំ (Circular Economy) ថាមពលបៃតង (Green Energy) និងសុខភាពសាធារណៈ។
ហើយក៏បានឯកភាពគ្នាចំពោះការពង្រឹងតួនាទីរបស់សហគមន៍សង្គម-វប្បធម៌អាស៊ាន សម្រាប់ការធ្វើសមាហរណកម្មអាស៊ានឱ្យកាន់តែទូលំទូលាយជាងមុន។ ឯកឧត្តមអគ្គលេខាធិការអាស៊ាន បានលើកឡើងពីបញ្ហានៃការបង្កើតគណៈកម្មាធិការជាន់ខ្ពស់សម្រាប់ ASCC ការរក្សាកិច្ចប្រជុំសម្របសម្រួលអាស៊ាន (JCM) ការពង្រីកតំណាងនៅក្នុងក្រុមប្រឹក្សាសម្របសម្រួលអាស៊ាន (ACC) ការចាត់តាំងតំណាងអចិន្រ្តៃយ៍ប្រចាំអាស៊ានដែលមានបទពិសោធន៍ច្រើន ការធ្វើកំណែទម្រង់ទៅលើដំណើរការនៃការស្នើសុំគម្រោងពីលេខាធិការដ្ឋានអាស៊ាន និងដៃគូអាស៊ាន ការបង្កើតអាហារូបករណ៍អាស៊ានសម្រាប់ប្រជាជនអាស៊ាន។ ឯកឧត្តមបណ្ឌិតសភាចារ្យឧបនាយករដ្ឋមន្រ្តី បានគាំទ្រចំពោះការលើកឡើងទាំងអស់ និងស្នើឱ្យមានភាពជាតំណាងទូលំទូលាយជាងមុនសម្រាប់ ASCC ទាំងក្នុងការងារសម្របសម្រួល និងការសម្រេចចិត្ត នៅគ្រប់កម្រិតទាំងអស់ក្នុងក្របខណ្ឌអាស៊ាន ៕
