ក្រសួងមហាផ្ទៃ បើកកិច្ចប្រជុំ ពិនិត្យ កែសម្រួលអនុក្រឹត្យ ស្ដីពីតួនាទី ភារកិច្ច របស់អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ និងនាយកដ្ឋានចំណុះ
ភ្នំពេញ៖ ក្រសួងមមហាផ្ទៃ នាព្រឹកថ្ងៃសុក្រ ទី២២ ខែកញ្ញា ឆ្នាំ២០២៣ បានបើកកិច្ចប្រជុំ ពិនិត្យ កែសម្រួលអនុក្រឹត្យ ស្ដីពីតួនាទី ភារកិច្ចរបស់អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ និងនាយកដ្ឋានចំណុះអគ្គនាយកដ្ឋាន ក្រោមអធិបតីភាព ឯកឧត្តម សន្តិបណ្ឌិត ម៉ៅ ច័ន្ទតារា រដ្ឋលេខាធិការប្រចាំការ ក្រសួងមមហាផ្ទៃ ដោយមានការចូលរួមពី ឯកឧត្តម រដ្ឋលេខាធិការ អនុរដ្ឋលេខាធិការ អគ្គលេខាធិការ ប្រធានក្រុមប្រឹក្សា និងតំណាងថ្នាក់ដឹកនាំមួយចំនួនទៀតផងដែរ។
ឯកឧត្តម សន្តិបណ្ឌិត ម៉ៅ ច័ន្ទតារា មានប្រសាសន៍ថា ដោយអនុលោមតាមការណែនាំដ៏ខ្ពង់ខ្ពស់ ពីសំណាក់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងការប្រគល់ភារកិច្ចដ៏ខ្ពង់ខ្ពស់ពី ឯកឧត្តម សន្តិបណ្ឌិត នេត សាវឿន នាយករដ្ឋមន្ត្រីស្ដីទី និង ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ស្នើសុំឱ្យមានការប្រជុំមន្ត្រីជំនាញពាក់ព័ន្ធពិនិត្យ និងពិភាក្សាឡើងវិញលើតួនាទី ភារកិច្ចរបស់អគ្គនាយកដ្ឋាន ដែលជាអង្គភាពថ្មីនេះឱ្យមានភាពគ្រប់ជ្រុងជ្រោយ។ ឯកឧត្តមបានបញ្ជាក់ថា កិច្ចប្រជុំពិនិត្យកែសម្រួលអនុក្រឹត្យ នៅក្នុងថ្ងៃនេះ គឺសំដៅធ្វើយ៉ាងណាឱ្យអគ្គនាយកដ្ឋាន និងនាយកដ្ឋានក្រោមចំណុះអាចអនុវត្តការងារ តួនាទី ភារកិច្ច បានយ៉ាងងាយស្រួល មានសង្គតិភាព និងប្រកបដោយប្រសិទ្ធភាព ៕