នាយឧត្តមសេនីយ៍ គន់ គីម និង នាយឧត្តមសេនីយ៍ ស ថេត អញ្ជើញប្រកាសប្រធានគណៈកម្មាធិការសមាគមអតីតយុទ្ធជនកម្ពុជា រាជធានីភ្នំពេញ
ភ្នំពេញ៖ ឯកឧត្តម នាយឧត្តមសេនីយ៍ កត្តិសង្គហបណ្ឌិត គន់ គីម ទេសរដ្ឋមន្រ្តីទទួលបន្ទុកបេសកកម្មពិសេស អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ និងជាអគ្គលេខាធិការសមាគមអតីតយុទ្ធជនកម្ពុជា តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន ប្រធានឧត្តមក្រុមប្រឹក្សាផ្ទាល់ព្រះមហាក្សត្រ និងប្រធានសមាគមអតីតយុទ្ធជនកម្ពុជា និងឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នៅថ្ងៃព្រហស្បតិ៍ ៧កើត ខែភទ្របទ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២១ ខែកញ្ញា ឆ្នាំ២០២៣ បានអញ្ជើញជាអធិបតីដ៏ខ្ពង់ខ្ពស់ ក្នុងពិធីប្រកាសប្រធានគណៈកម្មាធិការសមាគមអតីតយុទ្ធជនកម្ពុជា រាជធានីភ្នំពេញ នៅស្នងការដ្ឋាននគរបាលរាជធានីភ្នំពេញ។
ពិធីនេះ ក៏មានការអញ្ជើញចូលរួមពីសំណាក់ ឯកឧត្តម ឧត្តមសេនីយ៍ឯក អ៊ំ សុខ គណៈចាត់តាំងសមាគមអតីតយុទ្ធជនកម្ពុជា, ឯកឧត្តម ឧត្តមសេនីយ៍ទោ ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ, លោកស្រី មុំ ចាន់ដានី ប្រធានមន្ទីរសង្គមកិច្ច អតីតយុវជន និងយុវនីតិសម្បទា និងជាអនុប្រធានប្រចាំការគណៈកម្មាធិការសមាគមអតីតយុទ្ធជនកម្ពុជារាជធានីភ្នំពេញ ព្រមទាំងសមាជិក សមាជិកា និងភ្ញៀវកិត្តិយសមកពីស្ថាប័នពាក់ព័ន្ធមួយចំនួនទៀតផងដែរ។
ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ មានប្រសាសន៍ក្នុងកម្មវិធីជម្រុញដល់ប្រធានគណៈកម្មាធិការសមាគមអតីតយុទ្ធជនកម្ពុជា រាជធានីភ្នំពេញ ត្រូវយកចិត្តទុកដាក់គ្រប់គ្រងឲ្យបានជាប់លាប់ចំពោះសុខទុក្ខគ្រួសារសមាជិកអតីតយុទ្ធជនកម្ពុជារាជធានីភ្នំពេញ។
ជាមួយគ្នានោះ ឯកឧត្តម នាយឧត្តមសេនីយ៍ អគ្គស្នងការនគរបាលជាតិ បានជម្រុញ ឯកឧត្តម ឧត្តមសេនីយ៍ទោ ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ដែលត្រូវប្រកាសជាប្រធានគណៈកម្មាធិការសមាគមអតីតយុទ្ធជនកម្ពុជា រាជធានីភ្នំពេញ ត្រូវយកចិត្តទុកដាក់គ្រប់គ្រងឲ្យបានត្រឹមត្រូវនូវក្រដាសស្នាមឯកសារផ្សេងៗ របស់គ្រួសារអតីតយុទ្ធជននីមួយៗ ដេីម្បីឲ្យមានប្រសិទ្ធភាពក្នុងការរៀបចំនូវដីធ្លី ផ្ទះ សម្បែងជូនពួកគាត់។
ឯកឧត្តម នាយឧត្តមសេនីយ៍ ស ថេត បានគូសបញ្ជាក់ថា ការងារគ្រប់គ្រងគ្រួសារសមាជិកអតីតយុទ្ធជននេះ អាចនឹងមានភាពខ្វះចន្លោះ បើសិនជារុញឲ្យស្នងការនគរបាលរាជធានីភ្នំពេញ គ្រប់គ្រងជារួម ដូច្នេះទាមទារឲ្យមានការបែងចែកការទទួលខុសត្រូវ។ ទន្ទឹមនោះ ឯកឧត្តម ក៏បានណែនាំគ្រប់បណ្តាអធិការដ្ឋានទាំង១៤ខណ្ឌ ត្រូវរៀបចំអធិការរងម្នាក់ទទួលបន្ទុកការងារនេះ និងតាមបណ្តាប៉ុស្តិ៍ទាំងអស់ ត្រូវរៀបចំឲ្យមានម្នាក់សម្រាប់តាមដានព័ត៌មានចេញចូលរបស់គ្រួសារអតីតយុទ្ធជនក្នុងមូលដ្ឋានរបស់ខ្លួន ដោយគ្រប់គ្រងព័ត៌មានឲ្យបានត្រឹមត្រូវ ដេីម្បីរាយការណ៍ជូនទៅលេីប្រមូលទុកឯកសារ។
ឯកឧត្តម នាយឧត្តមសេនីយ៍ ស ថេត បានមានប្រសាសន៍ជម្រុញឲ្យប្រធានគណៈកម្មារធិការសមាគមថ្មី ឯកឧត្តម ឧត្តមសេនីយ៍ទោ ជួន ណារិន្ទ ត្រូវត្រួតពិនិត្យ និងគ្រប់គ្រងឲ្យបានត្រឹមត្រូវនូវព័ត៌មានដែលមន្ត្រីថ្នាក់ក្រោមរាយការណ៍ជូន និងត្រូវរាយការណ៍បន្តទៅ ឯកឧត្តម ឃួង ស្រេង អភិបាលរាជធានីភ្នំពេញ និងជាប្រធានកិត្តិយស ដើម្បីការពិភាក្សារដោះស្រាយ បញ្ហាដីធ្លីផ្ទះសម្បែងជូនគ្រួសារសមាជិកអតីតយុទ្ធជន នូវចំនួនគ្រួសារពិតប្រាកដ។
ឯកឧត្តម នាយឧត្តមសេនីយ៍ អគ្គស្នងការ បានបញ្ជាក់ថា ដោយសារការងារទាំងនេះ ត្រូវធ្វើចលនា មិនមែនមានកញ្ចប់ថវិកាផ្ទាល់សម្រាប់ដោះស្រាយភ្លាមៗទេ។ ឯកឧត្តម បានបញ្ជាក់ផងដែរថា ការដែលមានការប្រគល់ការងារនេះ អោយអង្គភាពនគរបាលធ្វេីជាប្រធាន ដោយសារតែអង្គភាពផ្សេងមិនមានរចនាសម្ព័ន្ធដល់ប៉ុស្តិ៍រដ្ឋបាលទេ គឺមានតែត្រឹមស្រុក។ ដូច្នេះកម្លាំងនគរបាលត្រូវសហការធ្វើការងារនេះឲ្យមានប្រសិទ្ធភាពខ្ពស់។ ក្រៅពីនោះត្រូវមានការចុះជួយរាល់កម្មវិធីក្នុងឃុំសង្កាត់ ដើម្បីជាការលើកទឹកចិត្តដល់គ្រួសារសមាជិកអតីតយុទ្ធជន អោយពួកគាត់មានភាពកក់ក្តៅផងដែរ។
ថ្លែងទៅកាន់អង្គពិធី ឯកឧត្តម នាយឧត្តមសេនីយ៍ កត្តិសង្គហបណ្ឌិត គន់ គីម បានលើកឡើងពីយុទ្ធសាស្រ្តបញ្ចកោណ របស់រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានធ្វើឲ្យប្រទេសជាតិ មានការអភិវឌ្ឃរីកចម្រើនលើគ្រប់វិស័យ ទាំងវិស័យសេដ្ឋកិច្ច សង្គមកិច្ច។ ទន្ទឹមនោះ អតីតយុទ្ធជនត្រូវបានយកចិត្តដាក់ និងគាំពារសំដៅធ្វើយ៉ាងណាឲ្យពួកគាត់មានសេដ្ឋកិច្ចជីវភាពរស់នៅសមរម្យ។
ឯកឧត្តម នាយឧត្តមសេនីយ៍ កត្តិសង្គហបណ្ឌិត ក៏បានថ្លែងអំណរគុណ និងកោតសរសើរដល់ គណៈកម្មាធិការសមាគមអតីតយុទ្ធជនកម្ពុជា រាជធានីភ្នំពេញ ដែលកន្លងមកបានខិតខំយកចិត្តទុកដាក់លើជីវភាពរស់នៅរបស់បងប្អូនអតីតយុទ្ធជន នៅក្នុងមូលដ្ឋានរបស់ខ្លួន។ ពិសេស ស្នើសុំឲ្យ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ដែលទើបតែងតាំងជាអគ្គលេខាធិការរងសមាគមអតីតយុទ្ធជនកម្ពុជា បន្តជួយជ្រោមជ្រែង និងគាំទ្រ ក៏ដូចជាជំរុញឲ្យ គណៈកម្មាធិការសមាគមអតីតយុទ្ធជនកម្ពុជា រាជធានី-ខេត្ត បន្តយកចិត្តទុកដាក់បន្ថែមទៀតដល់បងប្អូនអតីតយុទ្ធជន។គួរបញ្ជាក់ថា ក្នុងឱកាសនោះ ឯកឧត្តម នាយឧត្តមសេនីយ៍ ស ថេត ត្រូវបានសមាគមអតីតយុទ្ធជនកម្ពុជា តែងតាំងជាអគ្គលេខាធិការរងសមាគមអតីតយុទ្ធជនកម្ពុជា និងឯកឧត្តម ឧត្តមសេនីយ៍ទោ ជួន ណារិន្ទ ជាប្រធានគណៈកម្មាធិការសមាគមអតីតយុទ្ធជនកម្ពុជា រាជធានីភ្នំពេញ ៕
