នាយករដ្ឋមន្ត្រីកម្ពុជា អរគុណចំពោះអូស្ត្រាលី ដែលផ្តោតយកចិត្តទុកដាក់ដល់ការអភិវឌ្ឍសង្គម-សេដ្ឋកិច្ចកម្ពុជា
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងអំណរគុណចំពោះអូស្ត្រាលី ដែលផ្តោតយកចិត្តទុកដាក់ដល់ការអភិវឌ្ឍសង្គម-សេដ្ឋកិច្ចកម្ពុជា ដូចមានការផ្តល់អាហារូបករណ៍ជូនដល់សិស្ស-និស្សិតកម្ពុជា ដែលជាការចូលរួមចំណែកយ៉ាងសំខាន់ដល់ការបណ្តុះបណ្តាល ធនធានមនុស្សរបស់កម្ពុជាជាសក្ខីភាពស្រាប់។
សម្តេចធិបតីបានថ្លែងបែបនេះក្នុងឱកាសដែលសម្តេច បានជួបពិភាក្សា ជាមួយ លោកជំទាវ ផេននី វ័ង រដ្ឋមន្រ្តីការបរទេស អូស្រា្តលី នៅទីស្នាក់ការកណ្ដាល អង្គការសហប្រជាជាតិ នៅទីក្រុងញូវយ៉ក សហរដ្ឋអាមេរិក នាព្រឹកថ្ងៃសុក្រ ៨កើត ខែភទ្របទ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី២២ ខែកញ្ញា ឆ្នាំ២០២៣។
បន្ទាប់ពីការស្វាគមន៍យ៉ាងកក់ក្តៅ ជូនចំពោះ លោកជំទាវរដ្ឋមន្ត្រីការបរទេសអូស្រ្តាលី និងគណៈប្រតិភូ សម្តេចធិបតី បានជម្រាបជូនអំពីជំហររបស់កម្ពុជា ក្នុងការបន្តកិច្ចសហប្រតិបត្តិការជិតស្និទ្ធជាមួយអូស្ត្រាលី ក្នុងវិស័យសក្ដានុពល ទាំងក្រោមយន្តការទ្វេភាគី និងពហុភាគី។
លោកជំទាវ បានស្វាគមន៍ចំពោះគោលជំហរនេះ និងបានលើកឡើងអំពីចំណងមិត្តភាពយូរអង្វែងរវាងកម្ពុជា និងអូស្ត្រាលី ក៏ដូចជាគំនិតផ្តួចផ្តើមជាច្រើនទៀត ដែលប្រទេសទាំងពីរអាចបង្កើនកិច្ចសហប្រតិបត្តិការ ជាពិសេស នៅលើមាគ៌ានៃការអភិវឌ្ឍសង្គម-សេដ្ឋកិច្ច ៕
