កម្លាំងនគរបាល បង្រ្កាបក្រុមក្មេងទំនើង ០១ក្រុម ដែលធ្វើសកម្មភាពបង្កហិង្សា និងអុកឡុកក្នុងមូលដ្ឋានស្រុកទ្រាំង និងក្រុងដូនកែវ
ភ្នំពេញ៖ ដោយមានកិច្ចសហប្រតិបត្តិការណ៍ល្អសមត្ថកិច្ច នៃអធិការដ្ឋាននគរបាលក្រុងដូនកែវ និងសមត្ថកិច្ច នៃអធិការដ្ឋាននគរបាលស្រុកទ្រាំង បានធ្វើការបង្រ្កាបក្រុមក្មេងទំនើង ០១ក្រុម ដែលតែងតែធ្វើសកម្មភាពបង្កហិង្សា និងបង្កអុកឡុកក្នុងមូលដ្ឋានស្រុកទ្រាំង និងក្រុងដូនកែវជាញឹកញាប់។
ដោយមានបទបញ្ជាយ៉ាងម៉ឺងម៉ាត់ពីសំណាក់ លោកឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្តតាកែវ និងមានការសម្របសម្រួលនីតិវិធីពី ឯកឧត្តម ឯក ឆេងហួត ព្រះរាជអាជ្ញាអមសាលាដំបូងខេត្តតាកែវ។
កាលពីថ្ងៃទី២០ ខែកញ្ញា ឆ្នាំ២០២៣ វេលាម៉ោង១៥និង០០នាទី នៅចំណុចខាងលិចមន្ទីរពេទ្យបង្អែកខេត្តតាកែវ ដែលស្ថិតនៅភូមិបី សង្កាត់រកាក្នុង ក្រុងដូនកែវ ខេត្តតាកែវ មានករណី(ហិង្សាដោយចេតនាមានស្ថានទម្ងន់ទោស) មួយបានកើតឡើងបង្កឡើងដោយជនសង្ស័យចំនួន១០នាក់៖
១. ឈ្មោះ សារ៉ាន់ វាសនា តារាយុទ្ធ ហៅយុទ្ធ ភេទប្រុស អាយុ ១៥ឆ្នាំ មុខរបរសិស្ស មានទីលំនៅបច្ចុប្បន្នរស់នៅក្នុងភូមិត្របែក ឃុំស្រង៉ែ ស្រុកទ្រាំង ខេត្តតាកែវ (ជនដៃដល់ធ្វើសកម្មភាពយកកាំបិតតាំងតោកាប់ជនរងគ្រោះ)។
២. ឈ្មោះ សួស មករា ហៅបារាំង ភេទប្រុស អាយុ១៦ឆ្នាំ មុខរបរសិស្ស មានទីលំនៅបច្ចុប្បន្នរស់នៅក្នុងភូមិពោធិ៍ ឃុំសំបួរ ស្រុកទ្រាំង ខេត្តតាកែវ (អ្នកបើកម៉ូតូឌុបជនដៃដល់)។
៣. ឈ្មោះ វន សូរិយា ហៅយ៉ា ភេទប្រុស អាយុ១៦ឆ្នាំ មុខរបរសិស្ស មានទីលំនៅបច្ចុប្បន្នរស់នៅក្នុងភូមិព្រៃរុន ឃុំស្រង៉ែ ស្រុកទ្រាំង ខេត្តតាកែវ (ជនដៃដល់ធ្វើសកម្មភាព យកមួកសុវត្ថិភាពវាយជនរងគ្រោះបណ្តាលឲ្យដួលម៉ូតូ)។
៤. ឈ្មោះ ធា សុវណ្ណារ៉ា ភេទប្រុស អាយុ១៥ឆ្នាំ មុខរបរសិស្ស មានទីលំនៅបច្ចុប្បន្នរស់នៅក្នុងភូមិត្នោត ឃុំស្រង៉ែ ស្រុកទ្រាំង ខេត្តតាកែវ(ឃាត់ខ្លួនបាន)។
៥. ឈ្មោះ ម៉ាញ អូន ហៅកណ្ដុរ ភេទប្រុស អាយុ១៥ឆ្នាំ មុខរបរសិស្ស មានទីលំនៅបច្ចុប្បន្នរស់នៅក្នុងភូមិព្រៃរុន ឃុំស្រង៉ែ ស្រុកទ្រាំង ខេត្តតាកែវ(ឃាត់ខ្លួនបាន)។
៦. ឈ្មោះ ហ៊ន ចំរើន ហៅស៊ីល ភេទប្រុស អាយុ១៧ឆ្នាំ មុខរបរសិស្ស មានទីលំនៅបច្ចុប្បន្នរស់នៅក្នុងភូមិព្រៃរុន ឃុំស្រង៉ែ ស្រុកទ្រាំង ខេត្តតាកែវ(ឃាត់ខ្លួនបាន) និងបក្សពួកចំនួន០៤នាក់ទៀតរត់គេចខ្លួន(អត់ស្គាល់អត្តសញ្ញាណ) បានធ្វើសកម្មភាពដោយឈ្មោះវន សូរិយ៉ា បានយកមួកសុវត្ថិភាពវាយទៅលើជនរងគ្រោះចំនួន០២នាក់បណ្ដាលឲ្យដួលម៉ូតូ ហើយឈ្មោះ សារ៉ាន់ វាសនាតារាយុទ្ធ ក៏បានយកកាំបិតតាំងតោកាប់ទៅជនរងគ្រោះ០១ នាក់បណ្ដាលឲ្យរងរបួសត្រង់ក្បាលផ្នែកខាងក្រោយ(រងរបួសធ្ងន់)។
ជនរងគ្រោះទី១ឈ្មោះ ប៉ាក ឡៃហុង ភេទប្រុស អាយុ ១៨ឆ្នាំ មុខរបរសិស្ស មានទីលំនៅរស់នៅភូមិគោកញ័រ ឃុំព្រៃស្លឹក ស្រុកទ្រាំង ខេត្តតាកែវ(រងរបួសធ្ងន់) និងជនរងគ្រោះទី២ឈ្មោះ ម៉ន់ រ៉ង ភេទប្រុស អាយុ ១៨ឆ្នាំ មុខរបរសិស្ស មានទីលំនៅរស់នៅភូមិត្រពាំងជ័យ ឃុំរនាម ស្រុកទ្រាំង ខេត្តតាកែវ(រងរបួសស្រាល)ក្រោយធ្វើសកម្មភាពជនសង្ស័យទាំង១០នាក់ខាងលើ បានជិះម៉ូតូរត់គេចខ្លួនបាត់។
ចំណែកជនរងគ្រោះទាំង០២នាក់ខាងលើ និងមិត្តភ័ក្តរបស់គេបានយកជនរងគ្រោះឈ្មោះប៉ាក ឡៃហុង ទៅសង្គ្រោះនៅមន្ទីរពេទ្យបង្អែកស្រុកទ្រាំង។ រហូតដល់ថ្ងៃទី២១ ខែកញ្ញា ឆ្នាំ២០២៣ វេលាម៉ោង១៥ និង០០នាទីជនរងគ្រោះ ឈ្មោះប៉ាក់ ឡៃហុង បានដាក់ពាក្យបណ្តឹង នៅអធិការដ្ឋាននគរបាលក្រុងដូនកែវ។
ក្រោយពីទទួលបាននូវពាក្យបណ្ដឹងពីជនរងគ្រោះឈ្មោះ ប៉ាក ឡៃហុង លោកវរសេនីយ៍ឯក ឥន្ទ មណ្ឌល អធិការ នៃអធិការដ្ឋាននគរបាលក្រុងដូនកែវ បានបញ្ជាដឹកនាំកម្លាំងជំនាញ នៃអធិការដ្ឋាននគរបាលក្រុងដូនកែវ សហការជាមួយកម្លាំងប៉ុស្តិ៍នគរបាលរដ្ឋបាលទាំង០៣ និងសហការជាមួយសមត្ថកិច្ច នៃអធិការដ្ឋាននគរបាលស្រុកទ្រាំង ធ្វើការស្រាវជ្រាវដើម្បីកំណត់មុខសញ្ញាខាងលើ រហូតដល់ថ្ងៃទី២២ ខែកញ្ញា ឆ្នាំ២០២៣ វេលាម៉ោង២៣និង០០នាទី កម្លាំងសមត្ថកិច្ច បានធ្វើការឃាត់ខ្លួនជនសង្ស័យចំនួន០៦នាក់ រួមនិងវត្ថុតាងខាងលើ យកមកកាន់អធិការដ្ឋាននគរបាលក្រុងដូនកែវ ដើម្បីធ្វើការសាកសួរ និងកសាងសំណុំរឿងតាមនីតិវិធីច្បាប់។ ចំណែកបក្សពួកជនសង្ស័យចំនួន០៤នាក់ បានរត់គេចខ្លួន កម្លាំងសមត្ថកិច្ចយើង កំពុងបន្តស្រាវជ្រាវដើម្បីចាប់ខ្លួនយកមកផ្តន្ទាទោសតាមច្បាប់ ៕
