ឯកឧត្តម លី ច័ន្ទតុលា និងលោកជំទាវ ឈីវ ភិរម្យ ដឹកនាំក្រុមការងារប្រារព្ធកម្មវិធីបុណ្យសង្ឃទាន និងស្រោចស្របសុគន្ធវារី ជូនលោកតា លោកយាយ ១០០០នាក់ ក្នុងសង្កាត់វាលពង់ ក្រុងឧដុង្គម៉ែជ័យ

ភ្នំពេញ៖ នៅថ្ងៃទី២៤ ខែកញ្ញា ឆ្នាំ២០២៣ ឯកឧត្តម លី ច័ន្ទតុលា ជាប្រធានក្រុមការងារគណបក្សប្រជាជនកម្ពុជាចុះជួយសង្កាត់វាលពង់ និងលោកជំទាវ ឈីវ ភិរម្យ ដឹកនាំក្រុមការងារប្រារព្ធកម្មវិធីបុណ្យសង្ឃទាន និងស្រោចស្របសុគន្ធវារី ជូនលោកតា លោកយាយ ១០០០នាក់ ក្នុងសង្កាត់វាលពង់ ក្រុងឧដុង្គម៉ែជ័យ ខេត្តកំពង់ស្ពឺ ក្រោមអធិបតីភាពដ៏ខ្ពង់ខ្ពស់ ឯកឧត្តម ហ៊ុន ម៉ានី អនុប្រធានទី១ក្រុមការងារគណបក្សចុះជួយខេត្តកំពង់ស្ពឺ ។

ឯកឧត្តម លី ច័ន្ទតុលា និងលោកជំទាវ ឈីវ ភិរម្យ ប្រារព្ធកម្មវិធីបុណ្យសង្ឃទាន និងស្រោចស្របសុគន្ធវារី បានបញ្ជាក់ពីកតញ្ញូកតវេទិតាធម៌របស់កុលបុត្រកុលធីតា នៃពុទ្ធមាមិកៈជន ដែលតែងតែគោរពដឹងគុណ ចំពោះបុព្វការីជនខ្មែររបស់យើង ។

ឯកឧត្តម លី ច័ន្ទតុលា បានបញ្ជាក់ដែរថា ដោយយល់ឃើញថាប្រជាពលរដ្ឋក្នុងមូលដ្ឋានសង្កាត់វាលពង់ អ្នកខ្លះមានលទ្ធភាពធ្វើបុណ្យ អ្នកខ្លះពុំសូវមានលទ្ធភាពធ្វើបុណ្យ ហេតុនេះហើយបានជា ឯកឧត្តម លី ច័ន្ទតុលា និងលោកជំទាវ ឈីវ ភិរម្យ មានចិត្តសប្បុរស ទឹកចិត្តសទ្ធាមុតមាំប្រារព្ធពិធីបុណ្យនេះ ដោយរូបភាពប្រមូលផ្តុំជារួម ចំនួន១០០០នាក់ គិតពីអាយុ ៦៥ឆ្នាំឡើងទៅ ដែលប្រារព្ធកម្មវិធីបុណ្យក្នុងបរិវេណវត្តខ្សាច់ពូន ។

ក្នុងកម្មវិធីនេះ មានបម្រើជាអាហារពេលព្រឹក អាហារថ្ងៃត្រង់ និងអាហារសម្រន់ជូនលោកតា លោកយាយ និងអ្នកចូលរួមទាំងអស់ ព្រមទាំងមានការជូនជាខោអាវសម្រាប់លោកតា សំពត់អាវសម្រាប់លោកយាយ រួមជាមួយវត្ថុអនុស្សាវរីយ៏ក្រម៉ា១ និងថវិកា១ម៉ឺនរៀល ។ ក្នុងនោះមានការប្រគេនចង្ហាន់ថ្ងៃត្រង់ និងវេរប្រគេនទេយ្យទានដល់ព្រះសង្ឃ១២០អង្គ ។

បន្ទាប់ពីអាហារថ្ងៃត្រង់ក្រុមការងារក៏បានរៀបចំកម្មវិធីស្រោចស្របសុគន្ធវារីជូនលោកតា លោកយាយ ទាំង១០០០នាក់ ។ ជាចុងក្រោយពេលបញ្ចប់កម្មវិធីក៏មាននំកញ្ចប់ ប្រហុកខ្ទិះ និងកាពិផាវ ជាមួយស្វាយខ្ចី ជូនលោកតា លោកយាយ ត្រឡប់ទៅផ្ទះវិញផងដែរ៕