មន្ត្រីជាន់ខ្ពស់ធនធានទឹក ចុះត្រួតពិនិត្យគម្រោងការងារថែទាំជាប្រចាំប្រព័ន្ធធារាសាស្ត្រការពារទឹកជំនន់ និងស្រោចស្រព ស្ថិតក្នុងខេត្តព្រៃវែង

ភ្នំពេញ៖ កាលពីថ្ងៃទី២៥ ខែកញ្ញា ឆ្នាំ២០២៣ ឯកឧត្តម ប៊ុន ហ៊ាន រដ្ឋលេខាធិការក្រសួងធនធានទឹក និងឧតុនិយម បានដឹកនាំក្រុមការងារ ដោយសហការជាមួយលោក ស៊ន សេរី អនុប្រធាននាយកដ្ឋានធារាសាស្រ្តកសិកម្ម និងលោក ឃុន សាខឿន ប្រធានមន្ទីរធនធានទឹក និងឧតុនិយមខេត្តព្រៃវែង ចុះត្រួតពិនិត្យគម្រោងការងារថែទាំជាប្រចាំប្រព័ន្ធធារាសាស្ត្រការពារទឹកជំនន់ និងស្រោចស្រពកំពង់ត្របែក ស្ថិតក្នុងឃុំកំពង់ត្របែក ស្រុកកំពង់ត្របែក ខេត្តព្រៃវែង។

សូមបញ្ជាក់ថា ប្រព័ន្ធធារាសាស្ត្រនេះបានជួសជុល និងស្តារឡើងវិញក្នុងឆ្នាំ២០១០ ហើយបានបញ្ចប់នៅឆ្នាំ២០១៣ អនុវត្តដោយក្រុមហ៊ុនក្វាងតុង ហ្វរ៉េន និង ក្វាងតុងយេនធាន ត្រួតពិនិត្យបច្ចេកទេសដោយក្រុមហ៊ុនវ៉ាន់អាន និងប្រើប្រាស់ថវិកាឥណទានសម្បទានពីសាធារណរដ្ឋប្រជាមានិតចិន។

ចាប់តាំងពីឆ្នាំ២០១៦ រហូតមកដល់បច្ចុប្បន្ន ប្រព័ន្ធធារាសាស្ត្រការពារទឹកជំនន់ និងស្រោចស្រពកំពង់ត្របែក ទទួលបាននូវកិច្ចដំណើរការការងារថែទាំជាប្រចាំលើបណ្តាញហេដ្ឋារចនាសម្ព័ន្ធនៃប្រព័ន្ធទាំងមូលបានប្រមាណ ៨០% ដែលធានាបាននូវនិរន្តរភាព និងប្រសិទ្ធភាពស្រោចស្រពផ្ទៃដីស្រូវវស្សាចំនួន ៩.០០០ហិកតា ស្រូវប្រាំងលើកទី១ចំនួន ៦.០០០ហិកតា ស្រូវប្រាំងលើកទី២ចំនួន ៦.០០០ហិកតា និងដំណាំរួមផ្សំមួយចំនួន ជូនប្រជាពលរដ្ឋចំនួន ១១ឃុំ ក្នុងស្រុកចំនួន៣ ស្រុកកំពង់ត្របែក ស្រុកព្រះស្តេច និងស្រុកបាភ្នំ។ ប្រព័ន្ធធារាសាស្ត្រនេះទទួលបានប្រភពទឹកពីស្ទឹងកំពង់ត្របែក ដែលតភ្ជាប់ពីទន្លេមេគង្គក្រោមតាមរយៈស្ថានីយចំនួន៤ បូមទឹកបញ្ចូលប្រឡាយមេ និងប្រឡាយរងសម្រាប់ស្រោចស្រព និងស្ថានីយចំនួន ២ទៀត បូមរំដោះទឹកជំនន់ចេញពីតំបន់ដែលមានការលិចលង់ដោយជំនន់ទឹកភ្លៀងក្នុងរដូវវស្សា។

គួរបញ្ជាក់ថា ប្រព័ន្ធធារាសាស្ត្រនេះបានដើរតួនាទីយ៉ាងសំខាន់សម្រាប់ការងារស្រោចស្រព ការគ្រប់គ្រងទឹកជំនន់ក្នុងតំបន់ ជាផ្លូវគមនាគមន៍ ជាមធ្យោបាយសម្រាប់ដឹកកសិផលទៅកាន់ទីផ្សារ បម្រើដល់ជីវភាពរស់នៅប្រចាំថ្ងៃរបស់ប្រជាពលរដ្ឋ៕