ផ្លូវជាតិលេខ៣៣អា ស្ថិតក្នុងខេត្តកែប ជាផ្លូវដ៏សំខាន់មួយ ត្រូវបានរៀបចំកែលំអ និងលើកកម្ពស់សោភ័ណ
ភ្នំពេញ៖ ក្រសួងសាធារណការ និងដឹកជញ្ជូន បានឱ្យដឹងថា ផ្លូវជាតិលេខ៣៣អា ស្ថិតក្នុងខេត្តកែប ជាផ្លូវដ៏សំខាន់មួយ ត្រូវបានរៀបចំកែលំអ និងលើកកម្ពស់សោភ័ណភាពឱ្យកាន់តែស្រស់បំព្រងឡើង។
ក្រសួងបន្តថា ផ្លូវជាតិលេខ៣៣អា មានប្រវែងប្រមាណ៨គីឡូម៉ែត្រ ចាប់ពីរង្វង់មូលសេះស ដល់ឆ្នេរលេងទឹក ក្រុងកែប មានការរៀបការ៉ូឡា បំពាក់សំណង់សិល្បការ និងបំពាក់បង្គោលភ្លើងបំភ្លឺតាមដងផ្លូវផងដែរ ដើម្បីជួយសម្រួលដល់ការធ្វើដំណើររបស់ប្រជាពលរដ្ឋ និងទាក់ទាញចំណាប់អារម្មណ៍ភ្ញៀវជាតិ និងអន្តរជាតិឱ្យធ្វើដំណើរមកកម្សាន្តនៅខេត្តដ៏មានសក្តានុពលនេះ។
ក្រសួងសាធារណការបញ្ជាក់បន្ថែមថា ទន្ទឹមនឹងនេះដែរ ខេត្តកែបក៏បានត្រៀមខ្លួនធ្វើជាម្ចាស់ផ្ទះរៀបចំបុណ្យសមុទ្រលើកទី១០ ដែលនឹងប្រព្រឹត្តទៅនៅអំឡុងខែធ្នូ ចុងឆ្នាំ២០២៣ នេះ ខណៈថ្មីៗនេះរដ្ឋាភិបាលកម្ពុជាទើបធ្វើពិធីផ្សព្វផ្សាយជាផ្លូវការស្តីពីការដាក់ឱ្យអនុវត្តផែនការមេអភិវឌ្ឍន៍ទេសចរណ៍ខេត្តកែប ឆ្នាំ ២០២៣-២០៣៥៕
