ធនាគារពិភពលោក ប្តេជ្ញាបន្តកិច្ចសហប្រតិបត្តិការជាមួយក្រសួងរៀបចំដែនដី ក្នុងការអនុវត្តគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ច ដំណាក់កាលទី៣ ឱ្យបានជោគជ័យ

ភ្នំពេញ៖ ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ នាព្រឹកថ្ងៃសុក្រ ទី២៩ ខែកញ្ញា ឆ្នាំ២០២៣ បានអនុញ្ញាតិ្តឲ្យលោកស្រី Mariam Sherma ប្រធានធនាគារពិភពលោក​(World Bank) ប្រចាំតំបន់ (ប្រទេសកម្ពុជា​ ឡាវ និងប្រទេសមីយ៉ាន់ម៉ា) ចូលជួបសម្តែងការគួរសម និងពិភាក្សាការងារ។

ក្នុងឱកាសនោះ ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានស្នើឱ្យធនាគារពិភពលោកគិតគូរកាន់តែស៊ីជម្រៅ ក្នុងការលើកកម្ពស់ជីវភាពរបស់ប្រជាពលរដ្ឋ តាមរយៈការធ្វើកសិកម្ម ការចិញ្ចឹមសត្វ និងការធ្វើហេដ្ឋារចនាសម្ព័ន្ធ តភ្ជាប់ពីទីតាំងគម្រោងទៅទីប្រជុំជន។

ជាមួយគ្នានេះ ធនាគារពិភពលោក ប្តេជ្ញាបន្តកិច្ចសហប្រតិបត្តិការជាមួយក្រសួងរៀបចំដែនដី នគរូបនីយកម្ម និងសំណង់​ ក្នុងការអនុវត្តគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ច ដំណាក់កាលទី៣ (LASED III) ឱ្យបានជោគជ័យ ៕