អភិបាលខេត្តតាកែវ ដឹកនាំមន្រ្តីជំនាញ ចុះពិនិត្យមើលស្ថានភាពទឹកជន់លិចដំណាំស្រូវពលរដ្ឋ ចំនួន១៤៩ហិកតា នៅក្នុងឃុំអង្គប្រាសាទ ស្រុកគិរីវង់

ភ្នំពេញ៖ ឯកឧត្តម អ៊ូច ភា អភិបាលខេត្តតាកែវ នាព្រឹកថ្ងៃសុក្រ ទី២៩ ខែកញ្ញា ឆ្នាំ២០២៣នេះ បានដឹកនាំ លោកប្រធានមន្ទីរ ធនធានទឹក និងឧតុនិយមខេត្ត លោកប្រធានមន្ទីរកសិកម្ម រុក្ខា ប្រមាញ់ និងនេសាទខេត្ត លោក ងួន ឌីណា អភិបាលស្រុកគិរីវង់ លោកវរសេនីយ៍ឯក ជា សុផល អធិការនគរបាលស្រុក ព្រមទាំងមន្រ្តីជំនាញពាក់ព័ន្ធ បានចុះពិនិត្យមើលស្ថានភាពទឹកជន់លិចដំណាំស្រូវរបស់បងប្អូនប្រជាកសិករ ស្ថិតនៅចំនួន២ភូមិ ក្នុងឃុំអង្គប្រសាទ ស្រុកគិរីវង់ ដែលបានជន់លិចដោយជំនន់ទឹកភ្លៀង រងផលប៉ះពាលខូចខាតទាំងស្រុង ចំនួន ១០ហិកតា និងរងផលប៉ះពាល់អាជ្ញាធរកំពុងរកវិធីរំដោះទឹកចេញ ជួយសង្រ្គោះ ចំនួន ១៤៩ហិកតា។

មានប្រសាសន៍នាសឱកានោះដែរ ឯកឧត្តម អ៊ូច ភា អភិបាលខេត្ត បានធ្វើការណែនាំដល់ អាជ្ញាធរពាក់ព័ន្ធទាំងអស់ ជាពិសេស អាជ្ញាធរស្រុកគិរីវង់ និងឃុំ ភូមិ ត្រូវពិនិត្យមើលលទ្ធភាពជាក់ស្ដែង ដើម្បីរកវិធីរំដោះមុខទឹក និងជួយសង្រ្គោះដំណាំស្រូវរបស់ពលរដ្ឋ ដែលនៅសល់ជិត ១០ថ្ងៃទៀតប៉ុណ្ណោះ ទើបប្រមូលផលបាន ប៉ុន្តែត្រូវបានជន់លិខដោយសារជំនន់ទឹកភ្លៀងនេះ។ ដូច្នេះហើយ សូមមន្ទីរធនធានទឹក និងឧតុនិយមខេត្ត ត្រូវធ្វើការចុះពិនិត្យមើលជាបន្ទាន់ បើកមាត់ទ្វារបង្ហូរទឹក តាមបណ្ដាប្រឡាយ និងបឹងផ្សេងៗ ជាប៉ុណ្ណោះអាសន្នសិន អោយបានកាន់តែលឿន ក្នុងការជួយសង្រ្គោះដំណាំស្រូវទាំងនោះឡើងវិញ។

បន្ថែមពីនេះទៀត ឯកឧត្តមអភិបាលខេត្ត ក៏បានណែនាំដល់ អាជ្ញាធរស្រុកគិរីវង់ ត្រូវចុះពិនិត្យតាមដានស្ថានភាពជំនន់ទឹកភ្លៀង នៅតាមមូលដ្ឋានភូមិ ឃុំ និងរាយការណ៍ជូន រដ្ឋបាលខេត្តតាកែវ អោយបានទាន់ពេលវេលា ដើម្បី គណៈបញ្ជាការឯកភាពរដ្ឋបាលខេត្ត ចុះអន្តរាគមន៍បានទាន់សភាពការ ជួយសង្រ្គោះពលរដ្ឋ ប្រសិនមានករណីគ្រោះមហន្តរាយណ៍ផ្សេងៗ កើតមានឡើងជាយថាហេតុ។

តំណាងបងប្អូនប្រជាពលរដ្ឋ ដែលជាម្ចាស់ដំណាំស្រូវ រងផលប៉ះពាល់ដោយសារជំនន់ទឹកភ្លៀងនេះ សូមថ្លែងអំណរគុណ ដល់ឯកឧត្តម អភិបាលខេត្ត ព្រមទាំងអស់ អាជ្ញាធរពាក់ព័ន្ធទាំងអស់ ដែលបានចុះមកជួយអន្តរាគមន៍ រិះរកគ្រប់មធ្យោបាយនានាៗ ដើម្បីជួយសង្រ្គោះដំណាំស្រូវរបស់ ពួកយើងខ្ញុំ ដែលជិតប្រមូលផល ប៉ុន្តែត្រូវបានជន់លិចដោយសារជំនន់ទឹកភ្លៀង ៕