ក្រសួងមហាផ្ទៃ រៀបចំកិច្ចប្រជុំកែសម្រួលអនុក្រឹត្យស្ដីពី ការរៀបចំ និងការប្រព្រឹត្តទៅរបស់ អគ្គលេខាធិការដ្ឋាន គ.ជ.ប.ជ

ភ្នំពេញ៖ នាថ្ងៃចន្ទ ទី២ ខែតុលា ឆ្នាំ២០២៣នេះ ក្រសួងមហាផ្ទៃ បានរៀបចំកិច្ចប្រជុំកែសម្រួលអនុក្រឹត្យស្ដីពី ការរៀបចំ និងការប្រព្រឹត្តទៅរបស់ អគ្គលេខាធិការដ្ឋាន នៃគណៈកម្មាធិការជាតិ ប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) ក្រោមអធិបតីភាព លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្រ្តៃយ៍ គ.ជ.ប.ជ ដោយមានការអញ្ជើញចូលរួមពី លោកជំទាវ អគ្គលេខាធិការ, ឯកឧត្តម លោកជំទាវ ជាអគ្គលេខាធិការរង នៃ គ.ជ.ប.ជ និងអ្នកពាក់ព័ន្ធជាច្រើនរូបទៀត ពិធីនេះធ្វើឡើងនៅទីស្ដីការក្រសួមហាផ្ទៃ។

សូមជម្រាបជូនដែរថា អនុក្រឹត្យនេះ មានគោលបំណងកែសម្រួលតួនាទី ភារកិច្ចរបស់ អគ្គលេខាធិការដ្ឋាន នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ក្នុងការពង្រឹងទំនាក់ទំនង សម្របសម្រួលកិច្ចសហប្រតិបត្តិការ រវាង ក្រសួង ស្ថាប័ន ថ្នាក់ជាតិ ថ្នាក់ក្រោមជាតិ និងជាមួយអន្ដរជាតិ ព្រមទាំងអង្គការ ដៃគូជាតិ អន្ដរជាតិ និងវិស័យឯកជនដែលពាក់ព័ន្ធ ក្នុងការងារប្រយុទ្ធប្រឆាំងរាល់ទម្រង់ នៃអំពើជួញដូរមនុស្ស និងអំពើធ្វើអាជីវកម្មផ្លូវភេទ ជាពិសេសស្ដ្រី កុមារ ជនមានពិការភាព និងក្រុមជនងាយរងគ្រោះដទៃទៀត ក៏ដូចជា ទម្រង់ នៃទាសភាពសម័យទំនើប ដែលកើតមាននៅក្នុងដែនដី និងនៅក្រៅដែនដី នៃព្រះរាជាណាចក្រកម្ពុជា៕