កម្លាំងទាំងបីស្ថាប័នជាង៥០០នាក់ ចុះដណ្តើមផលស្រូវពីទឹកជំនន់លិចលង់ជាង២០ហិកតា នៅស្រុកមង្គលបូរី

បន្ទាយមានជ័យ៖ ដើម្បីផលស្រូវរបស់ប្រជាពលរដ្ឋពីទឹកជំនន់ដែលលិចលង់ដោយសារទឹកភ្លៀងនោះ នៅថ្ងៃទី០២ ខែតុលា ឆ្នាំ២០២៣ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ និងជាប្រធានគណៈបញ្ជាការឯកភាពរដ្ឋបាលខេត្ត បានដឹកនាំកម្លាំងទាំងបីស្ថាប័នជាង៥០០នាក់ រួមនិងមានការចូលរួមក្រុមការងារសម្ព័ន្ធយុវជនស្រលាញ់សន្តិភាព បានចុះអន្តរាគមន៍ជួយប្រមូលផលស្រូវបានជាង២០ហិកតាដែលលិចលងដោយទឹកហូរស្រុងពីផ្នែកខាងលើ ស្ថិតនៅខាងលិចភូមិចំណោម ឃុំចំណោម ស្រុកមង្គលបូរី ខេត្តបន្ទាយមានជ័យ។

លោក រ័ត្ន ដាស៊ីណង់ អភិបាលស្រុកមង្គលបូរីបានប្រាប់ថា៖ជំនន់ទឹកធ្លាក់ផ្នែកខាងលើបានហូរស្រុងពីផ្នែកខាងលើបានជន់លិចស្រូវប្រជាកសិករនៅឃុំចំណោម នៅផ្នែកខាងលិចប្រឡាយព្រែក បានស្នើសុំកងកម្លាំងអន្តរាគមន៍ជួយប្រមូលផលស្រូវដែលកំពុងលិចលង់ជាង២០ហិកតា។

ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានលើកឡើងថា៖ជារៀងរាល់ឆ្នាំពេលដែលប្រជាពលរដ្ឋរងគ្រោះដោយគ្រោះធម្មជាតិផ្សេងៗគឺតែងតែមានកងកម្លាំងទាំងបីប្រភេទចុះជួយអន្តរាគមន៍ជានិច្ច ។ ជាក់ស្តែងដូចពេលនេះ ឯកឧត្តមក៏បានដឹកនាំកម្លាំងទាំងបីស្ថាប័ន កងពលតូចថ្មើរជើងលេខ៥១ ចំនួន១៧៦នាក់, កម្លាំងសឹករងខេត្តចំនួន ១១០នាក់, កម្លាំងកងរាជអាវុធហត្ថ ចំនួន៥៥នាក់, កម្លាំងនគរបាល ចំនួន១៨០នាក់ រួមនឹងក្រុមការងារយុវជនបានចូលរួមសរុបចំនួន៥៦៥នាក់ មកជួយច្រូតកាត់ស្រូវប្រជាពលរដ្ឋ ត្រូវទឹកជំនន់ទឹកភ្លៀងហូរធ្លាក់ពីលើបង្កឲ្យលិចលង់។

ឯកឧត្តម អ៊ុំ រាត្រី អភិបាលខេត្តបន្ទាយមានជ័យបានបញ្ជាក់ថា៖ទឹកដែលជនលិចស្រូវប្រជាកសិករនៅខាងលិចប្រឡាយព្រែកឃុំចំណោមនេះ ជាទឹកដែលស្រុងពីផ្នែកខាងលើ បានហូរមកជន់លិចស្រូវប្រជាកសិករដែលកំពុងប្រមូលផលមានចំនួន២៣ហិកតា។

ឯកឧត្តមបន្តថា៖បន្ទប់ពីកងកម្លាំងបានចុះជួយច្រូតរយៈពេល២ថ្ងៃបានចំនួន១៨ហិកតា ដោយកាលពីថ្ងៃទី០១ កម្លាំងប្រតិបត្តការសឹករងខេត្តបានចុះជួយច្រូតបានចំនួន៥ហិកតា។ ហើយស្រូវកសិករដែលនៅសេសសល់កម្លាំងនិងបន្តចុះជួយច្រូតជូនបងប្អូនប្រជាកសិករបន្តទៀត ។

ជាមួយគ្នានោះប្រជាកសិករដែលជាម្ចាស់ស្រែបានថ្លែងអំណរគុណដល់ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ និងអាជ្ញាធរមូលដ្ឋានគ្រប់លំដាប់ថ្នាក់ ពិសេសកងកម្លាំងទាំង៣ប្រភេទដែលតែងតែចុះជួយពេលដែលប្រជាពលរដ្ឋរងគ្រោះដោយគ្រោះធម្មជាតិផ្សេងៗ ដូចពេលនេះគាត់ត្រូវទឹកជំនន់ជន់លិចស្រូវរបស់គាត់ដែលកំពុងប្រមូលផល។ស្តាប់ការបញ្ជាក់របស់ម្ចាស់ស្រែ៕