អាជ្ញាធរខេត្តបន្ទាយមានជ័យ ចុះពិនិត្យមើលស្ថានភាពស្រូវប្រជាកសិករដែលប្រឈម ជំនន់ទឹកភ្លៀង ស្រុកមង្គលបូរី
បន្ទាយមានជ័យ៖ នៅថ្ងៃទី១ ខែតុលា ឆ្នាំ២០២៣ លោក ឃ្លោក នួយ អភិបាលរងខេត្តបន្ទាយមានជ័យ និងជាប្រធានលេខាធិការដ្ឋាន គណៈកម្មការគ្រប់គ្រងគ្រោះមហន្តរាយខេត្តបន្ទាយមានជ័យ អមដំណើរដោយ លោក ប៉ាង វណ្ណាសេដ្ឋ ប្រធានមន្ទីរកសិកម្ម បានចុះពិនិត្យមើលស្ថានភាពស្រូវប្រជាកសិករដែលប្រឈម ជំនន់ទឹកភ្លៀង ស្ថិតនៅភូមិសាស្រ្តឃុំរហាត់ទឹក និងឃុំចំណោម ស្រុកមង្គលបូរី ខេត្តបន្ទាយមានជ័យ។
លោក ភូ សុឆាត សមាជិកក្រុមប្រឹក្សាឃុំរហាត់ទឹក បានប្រាប់ឱ្យថា ស្រូវក្នុងឃុំរហាត់ទឹកនេះ មានប្រមាណជិត៤ពាន់ហិកតា ដែលបច្ចុប្បន្ន បងប្អូនកសិករប្រមូលផលបានប្រមាណ៧០ទៅ៨០% ស្រូវនៅសល់កសិករកំពុងតែប្រមូលជាបណ្តើរៗ ដោយសារស្ថានភាពទឹកធ្លាក់មកពីប៉ែកខាងលើខេត្តបាត់ដំបង ធ្វើឱ្យទឹកនៅតំបន់នេះមានការកើនឡើង ដែលធ្វើឱ្យស្រូវខ្លះប្រឈមនិងការជន់លិច ទើបកសិរបង្ខំចិត្តច្រូតកាត់ទាំងស្រូវមិនទាន់ទុំល្អ។ មួយវិញទៀតដោយសារទឹកបន្តកើនឡើង កសិករប្រើមធ្យោបាយ ទូកស្មាច ដើម្បីដឹកជញ្ជូន ទីកាន់ទីទួល ឬយកទៅក្នុងភូមិដើម្បីលក់ឱ្យឈ្មួញ រីឯតម្លៃថ្លៃច្រូតវិញក៏មានតម្លៃថ្លៃដោយសារស្រែនៅឆ្ងាយពីផ្លូវ។
លោក ឃ្លោក នួយ អភិបាលរងខេត្តបន្ទាយមានជ័យ និងជាប្រធានលេខាធិការដ្ឋានគណៈកម្មាធិការគ្រប់គ្រងគ្រោះមហន្តរាយខេត្តបន្ទាយមានជ័យ បានឱ្យដឹងថា ស្ថានភាពទឹកនៅតាម បណ្តារក្រុង-ស្រុក ទាំង៩ មិនទាន់មានការកើនឡើងគួរឱ្យព្រួយបារម្ភនោះទេ។
ជាមួយគ្នានោះលោកក៏បានបញ្ជាក់ថាក្នុងនាមអាជ្ញាធរខេត្ត ឯកឧត្តម អ៊ុំ អភិបាលខេត្ត ក៏ដូចជាកងកម្លាំងពាក់ព័ន្ធគ្រប់ជាន់ថ្នាក់ បានត្រៀមខ្លួនរួចជាស្រេចនៅទីទួលសុវត្ថិភាព ក៏ដូចជាសម្ភារៈ ឧបករណ៍សម្រាប់ជួយសង្គ្រោះ ដើម្បីចេញអន្តរាគមន៍២៤ម៉ោងលើក២៤ម៉ោង ក្នុងករណីទឹកជំនន់កើតមានឡើង។
លោកក៏បានអំពាវនាវដល់បងប្អូនប្រជាពលរដ្ឋដែលរស់នៅតាមបណ្ដោយដងស្ទឹង ឬតំបន់ដែលប្រឈមនឹងទឹកជំនន់ ត្រូវមានការប្រុងប្រយ័ត្នឱ្យបានខ្ពស់បំផុត ជាពិសេសកូនចៅតូចៗ៕
