ទីតាំងបុស្បុកតម្កល់រូបសំណាក ព្រះគ្រូធម្មាចារ្យ គឹម ច្រែង និងសម្ដេចអគ្គមហាសេនាបតីតេជោ ហ៊ុន សែន គ្រោងនឹងសម្ពោធឆ្លងជាផ្លូវការ

ភ្នំពេញ៖ ឯកឧត្តម វ៉ា ថន អភិបាលខេត្តក្រចេះ និងឯកឧត្តម ជា ធារិទ្ធ នាយករងខុទ្ធការល័យសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នាព្រឹកថ្ងៃអង្គារ ៤រោច ខែភទ្របទ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី០៣ ខែតុលា ឆ្នាំ២០២៣ អញ្ជើញចុះពិនិត្យដំណើរការសាងសង់បុស្បុកតម្កល់រូបសំណាក ព្រះគ្រូធម្មាចារ្យ គឹម ច្រែង និងសម្ដេចអគ្គមហាសេនាបតីតេជោ ហ៊ុន សែន កាលពីកុមារភាព ស្ថិតនៅគល់ស្ពានទេ ត្រើយខាងត្បូង ស្ថិតក្នុងឃុំបុសលាវ ស្រុកចិត្របុរី ខេត្តក្រចេះ ដែលសាងសង់សម្រេចបាន៩៨% នឹងគ្រោងសម្ពោធបើកជាផ្លូវការ ជាទីរំលឹកគុណ និងជារម្មណីយ៍ដ្ឋានថ្មីមួយផងដែរ។

ឯកឧត្តម វ៉ា ថន អភិបាលខេត្ត បានគូសបញ្ជាក់ថា សំណង់បុស្បុកតម្កល់រូបសំណាក ព្រះគ្រូធម្មាចារ្យ គឹម ច្រែង និងសម្ដេចអគ្គមហាសេនាបតីតេជោ ហ៊ុន សែន នេះមានទំហំខាងក្នុងប្រវែង ៣,៦ម៉ែត្រ x ៣,៦ម៉ែត្រ កម្ពស់ប្រវែង ២៤,៣ម៉ែត្រ រូបសំណាកព្រះគ្រូធម្មាចារ្យ គឹម ច្រែង កំពស់២,៧ម៉ែត្រ រូបសំណាកសម្តេចអគ្គមហាសេនាបតីតេជោ ហ៊ុន សែន កម្ពស់ ១,៦៨ម៉ែត ធ្វើអំពីស្ពាន់ និងមានរៀបចំសួនច្បារ ដាំដើមឈើ ខឿនសួន បង្គោលភ្លើង ចំណតរថយន្ត ម៉ាប និងការងារតុបតែងលំអស្ពាន។

ឯកឧត្តមអភិបាលខេត្ត បន្តថាទីតាំងនៃបុស្បុកនេះ គ្រោងនឹងបើកសម្ពោធដាក់ឲ្យដំណើរការ ក្រោយថ្ងៃបញ្ចប់នៃពិធីបុណ្យភ្ជុំបិណ្ឌខាងមុខនេះ ៕