អភិបាលខេត្តកំពង់ធំ ជំរុញមន្រ្តីមានសមត្ថកិច្ចផ្សព្វផ្សាយ ពីបញ្ហាសុខភាព រដូវទឹកជំនន់ដល់ប្រជាពលរដ្ឋ
ភ្នំពេញ៖ ឯកឧត្តម ងួន រតនៈ អភិបាលខេត្តកំពង់ធំ និងជាប្រធានគណៈបញ្ជាការឯកភាពរដ្ឋបាលខេត្ត បានជំរុញមន្រ្តីមានសមត្ថកិច្ច ផ្សព្វផ្សាយអំពីបញ្ហាសុខភាព រដូវទឹកជំនន់ដល់ប្រជាពលរដ្ឋ និងត្រៀម ដើម្បីជៀសវាងមានគ្រោះថ្នាក់ជាយថាហេតុ។
ថ្លែងក្នុងកិច្ចប្រជុំប្រចាំខែកញ្ញា របស់គណៈបញ្ជាការឯកភាពរដ្ឋបាលខេត្ត នៅថ្ងៃទី៤ ខែតុលា ឆ្នាំ២០២៣ ឯកឧត្តមអភិបាលខេត្ត មានប្រសាសន៍ថា អាជ្ញាធរក្រុងស្រុក ត្រូវធ្វើរបាយការណ៍ឲ្យបានច្បាស់លាស់ពីការលិចលង់ខ្នងផ្ទះ ក៏ដូចជាការខូចខាត់ដំណាំស្រូវ និងជំរុញឲ្យអាជ្ញាធរ និងមន្ត្រីជំនាញផ្សព្វផ្សាយបញ្ហាសុខភាព និងការផ្គត់ផ្គង់ស្បៀងដល់ប្រជាពលរដ្ឋរងគ្រោះដោយសារទឹកជំនន់ ជាពិសេស ត្រូវមានការប្រុងប្រយ័ត្ននៅទីកន្លែងមានការគ្រោះថ្នាក់។
លើសពីនេះទៀត ឯកឧត្តម ងួន រតនៈ ណែនាំដល់មន្ទីរព័ត៌មានខេត្តត្រូវៀបចំកម្មវិធីសន្ទនាមតិ ដោយមានការចូលរួមពីគ្រប់ប្រធានមន្ទីរទាំងអស់ចូលរួមជាវាលគ្មិន (វិលជុំ) ដើម្បីផ្សព្វផ្សាយដល់បងប្អូនប្រជាពលរដ្ឋទៅតាមជំនាញរបស់ខ្លួន ដូចជា បញ្ហាការជួញដូរគ្រឿងញៀន ការជួញដូរផ្លូវភេទ ចរាចរណ៍ អនាម័យបរិស្ថាន សុខភាព អត្តសញ្ញាណកម្ម ដែលបញ្ហាទាំងអស់នេះ បណ្តាលឲ្យប៉ះពាល់សណ្តាប់ធ្នាប់សន្តិសង្គម។ ហើយចំពោះកិច្ចការអ្នកនាំពាក្យក្នុងអង្គភាព ត្រូវធ្វើការឆ្លើយបំភ្លើយឲ្យបានច្បាស់លាស់ និងឆាប់រហ័ស ព្រមទាំងជំរុញការដោះស្រាយបញ្ហាទំនាស់ក្រៅប្រព័ន្ធតុលា ឲ្យបានច្រើន ជាពិសេសបញ្ហាទំនាស់រឿងដីធ្លី នេះជាការងារមួយប្រៀបដូចជាអាហារប្រចាំថ្ងៃរបស់យើង ៕
