នាយករដ្ឋមន្ត្រី ហ៊ុន ម៉ាណែត មានមហិច្ឆតាធ្វើឱ្យសាលារដ្ឋ ពីថ្នាក់បឋមដល់ទី១២ ក្លាយជាសាលារៀនល្អ មានអាចទទួលយកបាន

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបង្ហាញពីមហិច្ឆិតា ចង់ឱ្យសាលារដ្ឋទាំងអស់ ចាប់ពីថ្នាក់បឋម ដល់ថ្នាក់ថ្នាក់ទី១២ ក្លាយជាសាលារៀនល្អ អាចទទួលយកបាន សម្រាប់ពលរដ្ឋនៅមូលដ្ឋាន ។

ក្នុងឱកាសអញ្ជើញ អបអរទិវាគ្រូបង្រៀនលើកទី២៦ នៅថ្ងៃទី៥ ខែតុលានេះ សម្តេចធិបតីបញ្ជាក់ថា «មហិច្ឆតារបស់ខ្ញុំ ក្នុងមួយអាណត្តិ ពីរអាណត្តិនេះ សាលារដ្ឋទាំងអស់មិនចាំបាច់មានកូនចៅ ប្រជាពលរដ្ឋវេចបង្វេចពីស្រុកមួយទៅស្រុកមួយ ទៅរៀនសាលាមួយទៀត ព្រោះគ្រប់សាលាទាំងអស់ សាលារដ្ឋរបស់យើងចាប់ពីថ្នាក់បឋមដល់ថ្នាក់ទី១២ ក្លាយជាសាលាល្អអាចទទួលបាន​នៅមូលដ្ឋាន»។

សម្តេចបានរំលឹកពីបទពិសោធន៍ ដែលធ្លាប់ជួបសំណេះសំណាល ជាមួយប្រជាពលរដ្ឋតាមមូលដ្ឋាន អំពីរឿងសាលារៀនល្អនេះ គឺប្រជាពលរដ្ឋសុខចិត្ត ចំណាយពេលវេលាដឹកកូនចៅ ទៅរៀនសាលាឆ្ងាយដែលល្អ ជាជាងឱ្យរៀននៅសាលាដែលជិតផ្ទះ ព្រោះយល់ថាការសិក្សាមិនបានល្អ ដោយសារតែមានការខ្វះខាតមួយចំនួន ។

សម្តេចថា តាមរយៈការសិក្សាលើសាលាជាង៥០សាលា សម្តេចរកឃើញសាលាមួយចំនួន ដែលលោកគ្រូអ្នកគ្រូ មានការច្នៃប្រឌិតខ្ពស់ ក្នុងការអប់រំសិស្សានុសិស្សបានយ៉ាងល្អ ដោយមិនបាច់មានការចំណាយបន្ថែមនោះទេ ហើយបានក្លាយជាគំរូមួយ សម្រាប់យកទៅអនុវត្តន៍ នៅតាមសាលាផ្សេងៗទៀត ៕