សម្តេចមហាបវរធិបតី៖ ម៉ោងនេះមិនមែនម៉ោង យើងបង្ខំដាក់មន្ត្រីបន្ថែមទេ តែយើងត្រូវដាក់ឱ្យចំគោលដៅ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បញ្ជាក់ថា ម៉ោងនេះ មិនមែនជាម៉ោងដែលត្រូវបង្ខំដាក់មន្រ្តីបន្ថែនោះទេ ប៉ុន្តែជាម៉ោងដែលយើងដាក់មន្រ្តីឱ្យចំគោលដៅ ។
ក្នុងឱកាសអញ្ជើញ ប្រារព្ធទិវាគ្រូបង្រៀនលើកទី២៦ នាថ្ងៃទី៥ ខែតុលា សម្តេចធិបតី ហ៊ុន ម៉ាណែត ថ្លែងថា សម្តេចមិនលុបផែនការជ្រើសរើសមន្រ្តី ឆ្នាំ២០២៣ទេ ប៉ុន្តែអាចយឺតយ៉ាវបន្តិច ដោយសាររាជរដ្ឋាភិបាលដាក់ចេញយន្តការថ្មី ។
សម្តេចគូសបញ្ជាក់ថា «ការឧបត្ថម្ភមន្ត្រី លោកគ្រូអ្នកគ្រូ យើងត្រូវលើកទឹកចិត្ត ម៉ោងនេះ មិនមែនម៉ោងយើងចាប់បង្ខំទេ យើងត្រូវដាក់ឱ្យចំគោលដៅ ព្រោះលោកគ្រូអ្នកគ្រូ យើងពឹងគាត់ដើម្បីជួយបណ្តុះបណ្តាលធនធានមនុស្ស» ។
សម្តេចលើកឡើងថា សម្តេចចង់ឱ្យវិនិយោគ ទៅលើមនុស្សច្រើនជាងបង្កើតសាលារៀន តាមរយៈការប្រើប្រាស់ថវិកា ដើម្បីឧបត្ថម្ភលើកទឹកចិត្ត និងអភិវឌ្ឍសមត្ថភាពចំពោះគ្រូបង្រៀន ឱ្យកាន់តែប្រសើរឡើង ៕
