តំបន់ប្រតិបត្តិការសឹករងសៀមរាប ទទួលអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត និងលោកជំទាវ

ភ្នំពេញ៖ ឯកឧត្តម គីម ប៊ុនថាន រដ្ឋមន្ត្រី ប្រតិភូអមនាយករដ្ឋមន្ត្រី តំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៅថ្ងៃទី៥​ ខែតុលា ឆ្នាំ២០២៣ បានអញ្ជើញសំណេះសំណាល និងប្រគល់រថយន្តសង្គ្រោះចំនួន ០១គ្រឿង អង្ករចំនួន ២តោន មីចំនួន៥០កេស ត្រីខចំនួន១០កេស នឹងថវិកាចំនួន ៥លានរៀល ដែលជាអំណោយដ៏ថ្លៃថ្លា របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុនី ហ៊ុន ម៉ាណែត ឧបត្ថម្ភដល់ តំបន់ប្រតិបត្តិការសឹករងសៀមរាប ។

នៅក្នុងរបាយការណ៍ស្វាគមន៍ របស់ ឧត្តមសេនីយ៍ទោ
ស៊ិន ភាត់ មេបញ្ជាការ តំបន់ប្រតិបត្តិការសឹងរងសៀមរាបបានបញ្ជាក់ថា សម្ដេចមហាបវរធិបតីនាយករដ្ឋមន្ត្រី នៃព្រះរាជាណាចក្រកម្ពុជា ជានិច្ចជាកាលបានឧបត្ថម្ភអាគារទីបញ្ជាការកងវរសេនាតូចលេខ១សម្ភារទំនាក់ទំនង សម្ភារការិយាល័យ បរិក្ខាពេទ្យ ឧបត្ថម្ភដល់សមាគអតីតយុទ្ធជនកម្ពុជានិងក្នុងឪកាសដែលសម្តេចធិបតីហ៊ុន ម៉ាណែត​ អញ្ជើញមកបំពេញការងារនៅទីបញ្ជាការតំបន់ប្រតិបត្តិការសឹករងសៀមរាប បានឧបត្តម្ភអាគារទីបញ្ជាការផ្នែកសឹករង អាគារស្នាក់នៅ ឃ្លាំងអាវុធគ្រាប់ សម្ភារសំណង់ ស័ង្កសី រថយន្តHyundai XE-8 Military Truck ម៉ូតូHonda Wave គោយន្តកន្ត្រៃ ​វិទ្យុទាក់ទងធំ វិទ្យុទាក់ទងតូច ម៉ាស៊ីនGPS ផែនទីភូមិសាស្ត្រខេត្តសៀមរាប ថវិការមួយនិង គ្រឿងសំណង់ជាច្រើនដល់អង្គភាព។

មានមតិសំណេះសំណាល ក្នុងឱកាសនេះដែរ ឯកឧត្តម រដ្ឋមន្ត្រី ប្រតិភូអមនាយករដ្ឋមន្ត្រី បានពាំនាំនូវការសួរសុខទុក្ខ ពីសំណាក់សម្តេចធិបតីនាយករដ្ឋមន្ត្រី និងលោកជំទាវ ជូនចំពោះ នាយ-ពលទាហាន ទាំងអស់ ដោយក្តីនឹករលឹក និងការគិតគូរជានិច្ចពីសុខទុក្ខរបស់បងប្អូនកងទ័ពជាប់ជាប្រចាំ ។

ជំនួសមុខឲ្យ ថ្នាក់ដឹកនាំ នាយទាហាន នាយទាហានរង និងពលទាហាន ទាំងអស់ទូទាំង តំបន់ប្រតិបត្តិការសឹករងសៀមរាប សូមគោរពថ្លែងអំណរគុណ យ៉ាងជ្រាលជ្រៅបំផុតចំពោះ សម្តេចមហាបវរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុនី ដែលតែងតែឧបត្ថម្ភ គ្រឿងឧបភោគបរិភោគ ឧបករណ៍ សម្ភារប្រើប្រាស់ ដល់ទីបញ្ជាការតំបន់ប្រតិបត្តិការសឹករងសៀមរាប និងសូមប្តេជ្ញាថែរក្សា និងប្រើប្រាស់សម្ភារទាំងអស់ឲ្យចំគោលដៅ ដើម្បីបុព្វហេតុជាតិមាតុភូមិ និងប្រជាជន៕