ឯកឧត្តម វ៉ា ថន និងឯកឧត្តម ឈឿន ប៊ុណ្ណារត័្ន ដឹកនាំសហការីធ្វើពិធីបួងសួងសុំសេចក្តីសុខចម្រើន ក្នុងឱកាសពិធីបុណ្យកាន់បិណ្ឌនិងភ្ជុំបិណ្ឌ នៅក្នុងបរិវេណវត្តសិរីសុន្ធរវង្ស ហៅវត្តក្រចេះ

ភ្នំពេញ៖ ឯកឧត្តម វ៉ា ថន អភិបាលខេត្តក្រចេះ និងឯកឧត្តម ឈឿន ប៊ុណ្ណារត័្ន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានក្រុងក្រចេះ នាព្រឹកថ្ងៃសៅរ៍ ៨រោច ខែភទ្របទ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៧ ខែតុលា ឆ្នាំ២០២៣ បានអញ្ចើញដឹកនាំសហការីធ្វើពិធីបួងសួងសុំសេចក្តីសុខចម្រើន ក្នុងឱកាសពិធីបុណ្យកាន់បិណ្ឌនិងភ្ជុំបិណ្ឌ និងឧទ្ទិសរំលឹកគុណជូនបុព្វការីជន និងដួងវិញ្ញាណក្ខន្ធយុទ្ធជន យុទ្ធនារី ដែលបានលះបង់តស៊ូដើម្បីបុព្វហេតុជាតិមាតុភូមិ និងជាការរំលឹកដឹងគុណចំពោះកុណបារមីព្រះនាងក្រពុំឈូក ដែលបានជួយថែរក្សាការពារប្រជាពលរដ្ឋ ដែលពិធីធ្វើឡើងនៅក្នុងបរិវេណវត្តសិរីសុន្ធរវង្ស ហៅវត្តក្រចេះ ក្រុងក្រចេះ ខេត្តក្រចេះ។

នាឱកាសនោះ ឯកឧត្តមអភិបាលខេត្ត បានអញ្ជើញអុចធូប ថ្វាយគ្រឿងសក្ការៈ ថ្វាយភ្លេងប្រពៃណីខ្មែរ ដល់បារមីព្រះនាងក្រពុំឈូក ដើម្បីសុំសេចក្តីសុខចម្រើន ជូនដល់ប្រទេសជាតិ និងបានប្រគេនទេយ្យទាន ទេយ្យវត្ថុ និងបច្ច័យមួយចំនួនដល់ព្រះសង្ឃចូលរួមវេនកាន់បិណ្ឌទី៨ ។ ជាពិសេសបានបួងសួងថ្វាយព្រះពរជ័យថ្វាយព្រះមហាក្សត្រី សម្តេចម៉ែ សម្តេចយាយ សម្តេចយាយទួត មុនីនាថ សីហនុ និង ប្រគេនពរដល់ព្រះសង្ឃគ្រប់ព្រះអង្គ និងជូនពរសម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងសម្តេចមហាបវរធីបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ព្រមទាំងប្រជាពលរដ្ឋនៅទូទាំងខេត្ត សូមឲ្យជួបសេចក្តីសុខចម្រើនគ្រប់ៗគ្នា ជៀសផុតនូវជំងឺកាចសាហាវផ្សេងៗ។

សូមបញ្ជាក់ដែរថា ពិធីសាសនានេះ អាចប្រព្រឹត្តទៅបាន ដោយសាតែប្រទេសជាតិមាន សុខសន្តិភាពពេញលេញ ក្រោមការដឹកនាំប្រកបដោយកិត្តិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន និងសម្តេចមហាបវរធីបតី ហ៊ុន ម៉ាណែត នាយករដ្ឋមន្រ្តីថ្មីនៃព្រះរាជាណាចក្រកម្ពុជា បានដឹកនាំប្រទេសឲ្យមានការអភិវឌ្ឍ និងមានការរីកចម្រើនលើគ្រប់វិស័យ ក្នុងនោះវិស័យព្រះពុទ្ធសាសនា ក៏មានការរីកចម្រើនគួរឲ្យកត់សម្គាល់ផងដែរ ៕