លោកជំទាវ ចម និម្មល៖ បើគ្មាននយោបាយឈ្នះ-ឈ្នះ និងការលះបង់ខ្ពស់បំផុត របស់សម្ដេចតេជោ ប្រទេសជាតិនឹងមិនមានសន្តិភាពពេញលេញ ដូចសព្វថ្ងៃឡើយ
ភ្នំពេញ៖ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានថ្លែងថា បើគ្មាននយោបាយ ឈ្នះ-ឈ្នះ និងការលះបង់ខ្ពស់បំផុត របស់សម្ដេចតេជោ ហ៊ុន សែន ប្រទេសជាតិ នឹងមិនមានសន្តិភាពពេញលេញ ដូចសព្វថ្ងៃឡើយ ។
ដើម្បីចូលរួម អបអរសាទរ ពិធីបុណ្យភ្ជុំបិណ្ឌ ប្រពៃណីជាតិខ្មែរ កំពុងប្រារព្ធពិធីបុណ្យកាន់បិណ្ឌ នៅថ្ងៃទី១០ ខែតុលា ឆ្នាំ២០២៣ លោកជំទាវរដ្ឋមន្ត្រី ចម និម្មល បានអញ្ជើញចុះសាកសួរសុខទុក្ខកងទ័ព នៃបញ្ជាការដ្ឋានកាំភ្លើងធំកងទ័ពជើងគោក និងកាតខ្សែបូ សម្ពោធដាក់ឲ្យប្រើប្រាស់ អគារគិលានដ្ឋាន និងអគារសាលប្រជុំ ដែលជាអំណោយរបស់ក្រសួងពាណិជ្ជកម្មផ្តល់ជូនបញ្ជាការដ្ឋានកាំភ្លើងធំកងទ័ពជើងគោក ។
ឯកឧត្តម ឧត្តមសេនីយ៍ឯក ពៅ សុខា មេបញ្ជាការរងកងទ័ពជើងគោក មេបញ្ជាការ បញ្ជាការដ្ឋានកាំភ្លើងធំ
តំណាងឲ្យនាយទាហាន នាយទាហានរង និងពលទាហានទូទាំងបញ្ជាការដ្ឋានកាំភ្លើងធំ បានឲ្យដឹងថា
ចាប់តាំងពីមានសម្ព័ន្ធមេត្រីភាពជាមួយក្រសួងពាណិជ្ជកម្មមក ថ្នាក់ដឹកនាំក្រសួងតែងតែយកចិត្តទុកដាក់ចាត់តាំងតំណាង ក្រសួងចុះមកសំណេះ សំណាលនិងសាកសួរសុខទុក្ខអង្គភាពបាន ជាប្រចាំ(ក្នុង១ឆ្នាំចំនួន ២លើកគឺរដូវចូលឆ្នាំ នឹងរដូវបុណ្យភ្ជុំបិណ្យ ប្រពៃណីជាតិ) ដោយនាំមកនូវ គ្រឿងឧបភោគបរិភោគ មួយចំនួន ផ្តល់ជូនបញ្ជាការដ្ឋានកាំភ្លើងធំ កងទ័ពជើងគោកជាបន្តបន្ទាប់ ។ ជាក់ស្តែងអគារសាលប្រជុំ ១ខ្នង មានទំហំ ១២ម៉ែត្រ គុណ ២០ម៉ែត្រ ប្រក់ក្បឿងក្បាច់ និងអគារគិលានដ្ឋាន ១ខ្នង ជាអំណោយរបស់ក្រសួងពាណិជ្ជកម្មត្រូវបានសម្ពោធធដាក់ឲ្យប្រើប្រាស់នាពេលនេះ ។
ក្នុងនាមមេបញ្ជាការ មេបញ្ជាការរង នាយទាហាន នាយទាហានរង និងពលទាហានទាំងអស់ ក្នុងកងកម្លាំងកាំភ្លើងធំ កងទ័ពជើងគោក សូមសម្តែងនូវការគោរព ស្មោះត្រង់ដាច់ខាត ការពារជាតិ សាសនា ព្រះមហាក្សត្រ ការពាររដ្ឋធម្មនុញ្ញ ការពាររាជរដ្ឋាភិបាលដែលប្រសូត្រចេញពីការបោះឆ្នោត ដឹកនាំដោយ សម្តេចមហាបវរធិបតីហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ។ កងទ័ពទូទាំងបញ្ជាការដ្ឋានកាំភ្លើងធំ ប្តេជ្ញា ជឿជាក់ ស្មោះត្រង់ដាច់ខាត ការពារបូរណភាពទឹកដី ការពាជាតិ សាសនា ព្រះមហាក្សត្រ ការពាររដ្ឋធម្មនុញ្ញ មិនឲ្យខ្មាំងសត្រូវ ណារំលោភបំពានបានឡើយ ។
លោកជំទាវ ចម និម្មល ក្នុងនាមជាអង្គភាព សម្ព័ន្ធមេត្រីភាព ជាមួយបញ្ជាការដ្ឋានកាំភ្លើងធំកងទ័ពជើងគោក
បានសម្តែងនូវការនឹករលឹកជាខ្លាំងចំពោះ បងប្អូនកងទ័ព និងបានពាំនាំនូវការផ្តាំផ្ញើ សាកសួរសុខទុក្ខ ពីសំណាក់សម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវ ពេជ្រ ចន្ទមុន្នី ដែលជានិច្ចកាល សម្តេចទាំងទ្វេ តែងតែយកចិត្តទុក្ខដាក់គិតគូរជាខ្លាំង ចំពោះសុខទុក្ខរបស់ បងប្អូនកងទ័ព យើងទូទាំងប្រទេស។
លោកជំទាវ ចម និម្មល បានមានប្រសាសន៍ថា សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី តាមរយៈការដាក់ចេញនូវនយោបាយ ឈ្នះ ឈ្នះ បានដឹកនាំស្តារកសាង និងអភិវឌ្ឍប្រទេសពីបាតដៃទទេ រហូតទទួលបានសុខសន្តិភាពពេញលេញ ស្ថិរភាពនយោបាយ និងមានការអភិវឌ្ឍលើគ្រប់វិស័យ។ បើគ្មាននយោបាយ ឈ្នះ ឈ្នះ និងការលះបង់ខ្ពស់បំផុត របស់សម្ដេចតេជោ ហ៊ុន សែន ប្រទេសជាតិ នឹងមិនមានសន្តិភាពពេញលេញ ដូចសព្វថ្ងៃឡើយ ។
លោកជំទាវ ចម និម្មល បានថ្លែងនូវការដឹងគុណជាពន្លឹក និងមិនអាចកាត់ថ្លៃបាន ចំពោះគំរូវីរភាពដ៏អង់អាចក្លាហានរបស់កងទ័ព ដែលបានប្រយុទ្ធ តស៊ូ ប្តូរផ្តាច់ ការពារឯករាជ្យ អធិបតេយ្យជាតិ បូរណភាពទឹកដី ការពាជាតិ សាសនា ព្រះមហាក្សត្រ ការពាររដ្ឋធម្មនុញ្ញ ការពាររាជរដ្ឋា ភិបាល ស្របច្បាប់ដែលដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។
លោកជំទាវ ចម និម្មល បានលើកឡើងអំពីគោលនយោបាយរបស់រាជរដ្ឋាភិបាលនីតិកាលទី៧ នៃរដ្ឋសភា ការដឹកនាំរបស់ សម្តេចមហាបវរធិបតី ហ៊ុន ម៉ាណែត បានដាក់ចេញនូវកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ ដោយផ្តោតលើការកែទម្រង់ ការពង្រឹង អភិបាលកិច្ច និងការធ្វើទំនើបកម្មស្ថាប័នរដ្ឋ ជាស្នូលនៃយុទ្ធសាស្ត្រ ដើម្បីឈានទៅក្នុងការពន្លឿនការអភិវឌ្ឍប្រទេសជាតិ ឲ្យមានការ រីកចំរើនរុងរឿងពីមួយថ្ងៃទៅមួយថ្ងៃ កាត់បន្ថយភាពក្រីក្រពីប្រជាពលរដ្ឋដែលងាយរងគ្រោះទូទាំង ប្រទេស ។
ក្នុងឱកាសនោះ លោកជំទាវ ចម និម្មល និងសការី
បានជូនអំណោយរួមមាន៖ អង្ករ ២៥០ការ៉ុង ស្រាបៀរ ១០០កេស ទឹកស៊ីអ៊ីវ ១០០យួរ ទឹកត្រី ១០០យួរ ទឹកក្រូច ២០កេស មី ២០០កេស និងថវិកា ១០ លានរៀល ៕
