ឯកឧត្តម សុខ ឥសាន៖ ការចងសម្ព័ន្ធភាព រវាងបក្សក្រៅរដ្ឋាភិបាលចំនួន៤ ជាសិទ្ធិនយោបាយរបស់បក្សទាំងនោះ
ភ្នំពេញ៖ ឯកឧត្តម សុខ ឥសាន អ្នកនាំពាក្យគណបក្សប្រជាជនកម្ពុជា បានលើកឡើងថា ការចងសម្ព័ន្ធភាពរវាងគណបក្សក្រៅរដ្ឋាភិបាលចំនួន៤ រួមមាន៖ គណបក្សភ្លើងទៀន គណបក្សឆន្ទៈខ្មែរ គណបក្សប្រជាធិបតេយ្យមូលដ្ឋាន និងគណបក្សកែទម្រង់កម្ពុជា ជាសិទ្ធិនយោបាយរបស់គណបក្សទាំងនោះ ។
ជាមួយគ្នានោះឯកឧត្តមអ្នកនាំពាក្យ បានលើកឡើងពីរចំណុចជុំវិញ ការចងសម្ព័ន្ធភាពរវាងគណបក្សក្រៅរដ្ឋាភិបាលទាំង៤នោះថា៖ ១. ជាសិទ្ធិនយោបាយរបស់គណបក្សទាំងនោះ និង២. ការចងសម្ព័ន្ធភាពនេះហាក់ដូចជានៅលើក្រដាសទេ ប៉ុន្តែរចនាសម្ព័ន្ធរបស់គណបក្សនីមួយៗនៅដដែល ។
ឯកឧត្តម សុខ ឥសាន បានបន្តថា គ្មានអ្នកណាមកហាមឃាត់ការធ្វើនយោបាយទេ គឺបើកជំហរ និងសិទ្ធិសេរីភាពខាងនយោបាយ។ ឯកឧត្តមយល់ថា គណបក្សទាំង៤ ដែលមានសម្ព័ន្ធភាពជាមួយគ្នា ជាគណបក្សចាញ់ឆ្នោត ហើយចាត់ទុកថាជាគណបក្សប្រឆាំង នឹងគណបក្សប្រជាជនកម្ពុជា។
ឯកឧត្តមបន្ថែមថា គណបក្សភ្លើងទៀនជាចំណែកតូចមួយ របស់អតីតគណបក្សសង្គ្រោះជាតិទេ បើអតីតគណបក្សសង្គ្រោះជាតិចាញ់គណបក្សប្រជាជនកម្ពុជា រឿងអីគណបក្សភ្លើងទៀន ទៅយកឧត្តមភាពលើគណបក្សប្រជាជនកម្ពុជាបាន ។
សូមបញ្ជាក់ថា គណបក្សភ្លើងទៀនបានប្រកាស ចងសម្ព័ន្ធភាពជាមួយគណបក្សក្រៅរដ្ឋាភិបាលចំនួន៣ផ្សេងទៀត គឺទី១. គណបក្សឆន្ទៈខ្មែរ ទី២. គណបក្សប្រជាធិបតេយ្យមូលដ្ឋាន និងទី៣.គណបក្សកែទម្រង់កម្ពុជា។ ពិធីចុះហត្ថលេខាលើសេចក្ដីថ្លែងការណ៍រួមស្ដីពី “ការបង្កើតសម្ព័ន្ធភាពឆ្ពោះទៅអនាគត” របស់គណបក្សក្រៅរដ្ឋាភិបាលទាំង៤ ត្រូវបានធ្វើឡើង នៅព្រឹក ថ្ងៃទី១១ ខែតុលា នៅសណ្ឋាគារសូហ្វីតែលភ្នំពេញ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ៕
