រដ្ឋមន្ត្រីទេសចរណ៍៖ អាកាសយានដ្ឋានអន្តរជាតិសៀមរាបថ្មី នឹងរួមចំណែកទាក់ទាញភ្ញៀវអន្តរជាតិ

ភ្នំពេញ៖ ឯគឧត្ដម សុខ សូកេន រដ្ឋមន្ត្រីក្រសួងទេសចរណ៍ បានចាត់ទុកអាកាសយានដ្ឋានអន្តរជាតិសៀមរាបអង្គរ ដែលជិតនឹងបើកដំណើរការជាផ្លូវការឆាប់ៗនោះ ថានឹងរួមចំណែកក្នុងការទាក់ទាញភ្ញៀវទេសចរអន្តរជាតិប្រមាណ៨លាននាក់ សម្រាប់ឆ្នាំ២០២៨។

ឯគឧត្ដមរដ្ឋមន្ត្រីបង្ហាញសុទិដ្ឋិនិយមបែបនេះគឺនាអំឡុងពេលទស្សនកិច្ចនៅអាកាសយានដ្ឋានអន្តរជាតិសៀមរាបអង្គរ ខេត្តសៀមរាប នៅសប្ដាហ៍មុន។

នាឱកាសនោះ ឯគឧត្ដមមើលឃើញថាក្រុមហ៊ុនវិនិយោគអាកាសយានដ្ឋានអន្តរជាតិអង្គរ (Angkor International Airport Investment (AIAI)) បានសាងសង់និងអភិវឌ្ឍអាកាសយានដ្ឋានសៀមរាបអង្គរថ្មីដ៏ធំ ទំនើប និងប្រកបដោយភាពទាក់ទាញ។

ឯគឧត្ដមបានលើកឡើងថា សមិទ្ធផលថ្មីមួយនេះពិតជាមានសក្តានុពលក្រៃលែង ដែលអាចជួយបង្កើនភាពទាក់ទាញទេសចរណ៍បន្ថែមទៀតមកកាន់ទឹកដីខេត្តសៀមរាប ដែលជាគោលដៅទេសចរណ៍ដ៏សំខាន់មួយសម្រាប់កម្ពុជា និងអាចទាក់ទាញសក្តានុពលវិនិយោគមកកាន់ទឹកដីខេត្តសៀមរាប និងប្រទេសកម្ពុជាទាំងមូលផងដែរ។ អាកាសយានដ្ឋានថ្មីនេះ ពិតជាបានបង្កើតការងារដោយផ្ទាល់ និងប្រយោលជាច្រើនកន្លែង ទាំងនៅក្នុងដំណាក់កាលសាងសង់ និងប្រតិបត្តិការ ដែលរួមចំណែកបង្កើនប្រាក់ចំណូលជាតិ និងលើកកម្ពស់ជីវភាពប្រជាពលរដ្ឋ ជាពិសេសអ្នករស់នៅក្នុងខេត្តសៀមរាប។

ឯគឧត្ដមបានថ្លែងយ៉ាងដូច្នេះថា «ខ្ញុំជឿជាក់ថាអាកាសយានដ្ឋាននេះនឹងជួយទាក់ទាញភ្ញៀវទេសចរ ដែលនឹងរួមចំណែកក្នុងការឈានទៅសម្រេចឱ្យបាននូវចំនួនភ្ញៀវទេសចរអន្តរជាតិប្រមាណ៨លាននាក់ នៅឆ្នាំ២០២៨ តាមរយៈការបង្កើនការតភ្ជាប់ជើងហោះហើរត្រង់ទាំងនៅក្នុងតំបន់ និងពិភពលោក»។

ឯគឧត្ដមរដ្ឋមន្ត្រី សុខ សូកេន បានបន្ថែមថា ការអភិវឌ្ឍហេដ្ឋារចនាសម្ពន្ធ និងការតភ្ជាប់ គឺជាការងារអាទិភាពបំផុតមួយរបស់រាជរដ្ឋាភិបាលនីតិកាលទី៦ ក្រោមការដឹកនាំរបស់សម្តេចតេជោ ហ៊ុន សែន ហើយសម្រាប់រាជរដ្ឋាភិបាលនីតិកាលទី៧នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក៏បានបន្តជំរុញឱ្យកាន់តែសកម្មថែមទៀត ដែលនៅពេលនេះកម្ពុជាកំពុងខិតខំបន្ដផ្ដល់អាទិភាពខ្ពស់ទៅលើការស្ដារ និងកសាងប្រព័ន្ធគមនាគមន៍ដឹកជញ្ជូនគ្រប់រូបភាព រួមមាន ថ្នល់ ស្ពាន ផ្លូវដែក ផ្លូវទឹក កំពង់ផែ និងអាកាសយានដ្ឋានខ្នាតអន្តរជាតិ ដែលជាការតភ្ជាប់យ៉ាងសំខាន់គ្រប់តំបន់នៅទូទាំងប្រទេស ទាំងទីក្រុង ទីប្រជុំជន ជាពិសេសជំរុញការតភ្ជាប់ជាមួយបណ្ដាប្រទេសនានាទូទាំងពិភពលោក ដែលធ្វើឱ្យការធ្វើដំណើរ និងដឹកជញ្ចូនរបស់កម្ពុជាមានភាពងាយស្រួល សុវត្ថិភាព ប្រសិទ្ធភាព និងមានតម្លៃទាប ក្នុងទិសដៅសម្រួលដល់ការជំរុញវិស័យទេសចរណ៍ ពង្រីកការធ្វើដំណើរមកកម្ពុជា ការធ្វើពាណិជ្ជកម្ម ការធ្វើសមាហរណកម្មសេដ្ឋកិច្ច ក៏ដូចជាការតភ្ជាប់កម្ពុជាឱ្យកាន់តែជិតទៅក្នុងតំបន់ និងក្នុងសកលលោក។

ឯគឧត្ដមរដ្ឋមន្ត្រីក៏បានបញ្ជាក់ពីការរៀបចំតំបន់ច្រកទ្វារព្រំដែនអន្តរជាតិ និងច្រកទ្វារអន្តរជាតិទូទាំងប្រទេសឱ្យមានហេដ្ឋារចនសម្ពន្ធ និងរចនាសម្ពន្ធគ្រប់គ្រាន់ ដើម្បីសម្រួលដល់ការធ្វើដំណើរ និងដឹកជញ្ជូនអ្នកដំណើរនិងភ្ញៀវទេសចរ។កាត់បន្ថយរបាំងមិនចាំបាច់ធ្វើឱ្យប៉ះពាល់ដល់ការធ្វើដំណើរចូល-ចេញរបស់ភ្ញៀវទេសចរ។ ដោះស្រាយនូវរាល់បញ្ហាដែលកើតមានឡើងតាមច្រកទ្វារព្រំដែនអន្តរជាតិ និងច្រកទ្វារអន្តរជាតិទូទាំងប្រទេស។

ឯគឧត្ដមរដ្ឋមន្ត្រីក៏នឹងអនុវត្តការលុបបំបាត់និងបោសសម្អាតភាពអសកម្មទាំងឡាយ និងភាពអនាធិបតេយ្យគ្រប់បែបយ៉ាងដែលនាំឱ្យប៉ះពាល់ និងរំខានដល់ការធ្វើដំណើរនិងការដឹកជញ្ជូនអ្នកដំណើរនិងភ្ញៀវទេសចរណ៍៕