ឯកឧត្តម គង់ សោភ័ណ្ឌ និងឯកឧត្តម នូ សាខន អញ្ជើញជួបសំណេះសំណាលជាមួយមន្ត្រីរាជការ មន្ត្រីជាប់កិច្ចសន្យា និងកម្មសិក្សាការីស្ម័គ្រចិត្ត នៃរដ្ឋបាលខេត្តកណ្ដាល ក្នុងឱកាសបុណ្យភ្ជុំបិណ្ឌ

ភ្នំពេញ៖ ឯកឧត្តម គង់ សោភ័ណ្ឌ អភិបាល នៃគណៈអភិបាលខេត្តកណ្ដាល និងឯកឧត្តម នូ សាខន ប្រធានក្រុមប្រឹក្សាខេត្តកណ្ដាល នាព្រឹកថ្ងៃព្រហស្បតិ៍ ១៣រោច ខែភទ្របទ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១២ ខែតុលា ឆ្នាំ២០២៣ បានអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីសំណេះសំណាលជាមួយមន្ត្រីរាជការ មន្ត្រីជាប់កិច្ចសន្យា និងកម្មសិក្សាការីស្ម័គ្រចិត្ត នៃរដ្ឋបាលខេត្តកណ្ដាល ក្នុងឱកាសពិធីបុណ្យភ្ជុំបិណ្ឌ ប្រពៃណីជាតិខ្មែរ នៅសាលប្រជុំសាលាខេត្ត។

ឯកឧត្តមអភិបាលខេត្ត បានមានប្រសាសន៍ថា ពិធីជួបជុំ សំណេះសំណាលមន្រ្តីរាជការ ក្នុងឱកាសពិធី បុណ្យកាន់បិណ្ឌ និងភ្ជុំបិណ្ឌ គឺត្រូវបានរៀបចំ ជារៀងរាល់ឆ្នាំ ដែលនេះជាទំនៀមទំលាប់ប្រពៃណីដ៏ល្អរបស់មន្រ្តីរាជការខេត្តកណ្តាល ផ្តល់ឱ្យកាសឱ្យមន្រ្តីរាជការបានជួបជុំសួរសុខទុក្ខ សំណេះសំណាលគ្នា មុននឹងពិធីបុណ្យភ្ជុំបិណ្ឌចូលមកដល់។

ឯកឧត្តមអភិបាលខេត្ត ក៏បានបួងសួងដល់គុណបុណ្យព្រះរតនត្រ័យ ទេវតាថែរក្សាទឹកដីព្រះរាជាណា ក្រកម្ពុជា វត្ថុស័ក្តិសិទ្ធិក្នុងលោក សូមជួយអភិបាលប្រោះព្រំ ប្រសិទ្ធពរជ័យជូន ឯកឧត្តម លោកជំទាវ លោក លោកស្រី មន្រ្តីរាជការ កងកម្លាំង និងអង្គពិធីទាំងមូល សូមបានប្រកបតែនឹងពុទ្ធពរទាំង ៤ប្រការគឺ៖ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕