ឯកឧត្តម ជា ជេដ្ឋ អញ្ជើញចូលរួមមហាសន្និបាតប្រចាំឆ្នាំលើកទី៥ នៃបណ្តាញក្រមសីលធម៌សមាជិកសភាប្រើភាសាបារាំង តាមប្រព័ន្ធនិម្មិត

ភ្នំពេញ៖ គណៈប្រតិភូទទួលបន្ទុក បណ្តាញក្រមសីលធម៌សមាជិកសភាប្រើភាសាបារាំង ដឹកនាំដោយឯកឧត្តមកិត្តិសេដ្ឋាបណ្ឌិត ជា ជេដ្ឋ ជាប្រធានគណៈកម្មការទី២ នៃព្រឹទ្ធសភា និងជាសមាជិកអចិន្រ្តៃយ៍នៃបណ្តាញក្រមសីលធម៌សមាជិកសភាប្រើភាសាបារាំង នារាត្រីថ្ងៃទី១២ ខែតុលា ឆ្នាំ២០២៣ បានអញ្ជើញចូលរួម មហាសន្និបាតប្រចាំឆ្នាំលើកទី៥ នៃបណ្តាញក្រមសីលធម៌សមាជិកសភាប្រើភាសាបារាំង តាមប្រព័ន្ធនិម្មិត នៅសាលសិក្ខាសាលា VI3 វិមានព្រឹទ្ធសភា ដែលប្រព្រឹត្តទៅនៅ ទីក្រុងកេប៊ិច-ខេត្តកេប៊ិច ប្រទេសកាណាដា។

មហាសន្និបាតនេះ បានប្រព្រឹត្តទៅក្រោមអធិបតីភាពលោកជំទាវ Ariane Mignolet ប្រធាន បណ្តាញក្រមសីលធម៌សមាជិកសភាប្រើភាសាបារាំង និងបានពិភាក្សាលើរបៀបវារៈដូចខាងក្រោម៖
-អនុម័តរបៀបវារៈ
– អនុម័តកំណត់ហេតុនៃមហាសន្និបាតប្រចាំឆ្នាំកាលពីថ្ងៃទី៧ និងថ្ងៃទី៨ ខែវិច្ឆិកា ឆ្នាំ២០២២
– សេចក្តីព្រាងនៃការសើរើលក្ខន្តិកៈ
-ការចូលរួម (ការបោះឆ្នោតផ្លាស់ប្តូរលក្ខន្តិកៈរបស់សមាជិកណាមួយដែលមិនបានចូលរួមបង់វិភាគទានប្រចាំឆ្នាំអស់រយៈពេល២ឆ្នាំ)
-សកម្មភាពរបស់គណៈកម្មាធិការអចិន្រ្តៃយ៍
-ថវិកា
-ផែនការសកម្មភាព៖
*តុល្យភាពកាលពីឆ្នាំ២០២២
*ផែនការសកម្មភាពសម្រាប់ឆ្នាំ២០២៤
*សាលាសិក្សាអំពីកិច្ចការសភាសម្រាប់ឆ្នាំ២០២៤។
-ដៃគូនានា៖
*មជ្ឈមណ្ឌលកិច្ចការសភា
-សភាប្រើភាសាបារាំង៖
*ការចូលរួមរបស់រដ្ឋសភាកូឌីវ័រ (Côte d’Ivoire)
*បទអន្តរាគមន៍របស់ឯកឧត្តម Joël Godin ប្រធានគណៈកម្មការកិច្ចការសភានៃសភាប្រើភាសាបារាំង។
-បោះឆ្នោតជ្រើសតាំងសមាជិកា សមាជិកគណៈកម្មាធិការអចិន្រ្តៃយ៍។

នៅក្នុងឱកាសបោះឆ្នោតជ្រើសតាំងសារជាថ្មីនៃសមាជិកគណៈកម្មាធិការអចិន្រ្តៃយ៍ ឯកឧត្តម កិត្តិសេដ្ឋាបណ្ឌិត ជា ជេដ្ឋ ប្រធានគណៈកម្មការទី២ នៃព្រឹទ្ធសភា និងជាសមាជិកផ្តួចផ្តើមក្នុងការចូលរួមបង្កើតបណ្តាញក្រមសីលធម៌សមាជិកសភាប្រើភាសាបារាំង បានត្រូវអង្គមហាសន្និបាតបោះឆ្នោតជ្រើសតាំងជាឯកច្ឆន្ទ ជូនឯកឧត្តមកិត្តិសេដ្ឋាបណ្ឌិត ជា ជេដ្ឋ ជាអនុប្រធាននៃបណ្តាញក្រមសីលធម៌សមាជិកសភាប្រើភាសាបារាំងសម្រាប់អាណត្តិពីរឆ្នាំ ៕