អភិបាលខេត្តបន្ទាយមានជ័យ សំណេះសំណាលជាមួយអ្នកបើកបររថយន្តក្រុង ដឹកអ្នកដំណើរ និងប្រជាពលរដ្ឋ វិលត្រឡប់ទៅរាជធានីភ្នំពេញវិញ
ភ្នំពេញ៖ ដើម្បីជូនដំណើរដល់អ្នកបើកបររថយន្តក្រុង ដឹកអ្នកដំណើរនិងប្រជាពលរដ្ឋអ្នកធ្វើដំណើរវិលត្រឡប់ទៅរាជធានីភ្នំពេញវិញ ។ នៅចំណតរថយន្តធំក្រុងសិរីសោភ័ណ ស្ថិតក្នុងភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ នាថ្ងៃទី១៦ ខែតុលាឆ្នាំ២០២៣ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានជួបសំណេះសំណាលជាមួយអ្នកបើកបររថយន្តក្រុងដឹកអ្នកដំណើរចំនួន ១០០នាក់ និងប្រជាពលរដ្ឋវិលត្រឡប់ទៅរាជធានីភ្នំពេញវិញជាច្រើន ។
មានប្រសាសន៍នាឱកាសនោះ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានថ្លែងអំណរគុណដល់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាដែលបានគឹតគូរពីសុខទុក្ខ និងជីវភាពរបស់បងប្អូនប្រជាពលរដ្ឋនៅខេត្តបន្ទាយមានជ័យ ដោយបានធ្វើការសម្របសម្រួលជាមួយ ឯកឧត្តម ឃួង ស្រេង អភិបាលរាជធានីភ្នំពេញដែលតែងតែគឹតគូរ ដល់ការធ្វើដំណើររបស់ប្រជាពលរដ្ឋដោយឥតគឹតថ្លៃក្នុងការមកលេងស្រុកកំណើតក្នុងធិធីបុណ្យធំៗជារៀងរាល់ឆ្នាំ ពិសេសគឺបុណ្យភ្ជុំបិណ្ឌនិងបុណ្យចូលឆ្នាំថ្មីប្រពៃណីជាតិខ្មែរ ដោយឡែកក្នុងខេត្តបន្ទាយមានជ័យមានរថយន្តក្រុងដឹកអ្នកដំណើរចំនួន៥០គ្រឿង បានដឹកប្រជាពលរដ្ឋពីភ្នំពេញមកលេងស្រុកកំណើតរបស់ពួកគាត់។ នេះគឺជាមោទនភាពយ៉ាងក្រៃលែងដែលរាជរដ្ឋាភិបាលតែងយកចិត្តទុកដាក់ពីសុខទុក្ខនិងជីវភាពរស់នៅ ពិសេសគឺកាត់បន្ថយារចំណាយថវិកាក្នុងពេលធ្វើដំណើររបស់បងប្អូនមកលេងស្រុកកំណើត ។
ជាមួយគ្នានោះដែរ ឯកឧត្តមអភិបាលខេត្តក៏ថ្លែងអំណរគុណដល់អ្នកបើកបររថយន្តក្រុងដឹកអ្នកដំណើរទាំងអស់ក្រោយពីដឹកប្រជាពលរដ្ឋក៏ដូចជាសិស្ស និស្សិតនិងអ្នកធ្វើតាមបណ្តាក្រុមហ៊ុន រោងចក្រ មកពីភ្នំពេញទៅលេងស្រុកកំណើតប្រកបដោយសុវត្ថិភាពនិងនៅរងចាំដឹកជញ្ជូនពួកគាត់វិលត្រឡប់ទៅវិញនិងជូនពរឲ្យការធ្វើដំណើរប្រកបដោយសុវត្ថិភាពផងដែរ។
ទន្ទឹមនោះដែរ អ្នកធ្វើដំណើរតាមរថយន្តក្រុង ក៏បានថ្លែងអំណរគុណដល់រាជរដ្ឋាភិបាលកម្ពុជា ដែលតែងតែយកចិត្តទុកគឹតគូរពីការកាត់បន្ថយការចំណាយក្នុងការធ្វើដំណើររបស់ប្រជាពលរដ្ឋ ពេលមានបុណ្យទានមកលេងស្រុកកំណើតគឺមានរថយន្តក្រុងសម្រាប់ដឹកអ្នកដំណើរដោយមិនគិតថ្លៃ ក្នុង១ឆ្នាំមាន២លើកគឺបុណ្យចូលឆ្នាំថ្មីនិងបុណ្យភ្ជុំបិណ្ឌយើងនេះ ។សូមស្តាប់ការលើកឡើងរបស់អ្នកដំណើរ ។
ក្នុងនោះដែរេកឧត្តម អ៊ុំ រាត្រីក៏បានឧបត្ថម្ភដល់អ្នកបើកបររថយន្តទាំង១០០នាក់ ក្នុង១នាក់ ថវិកាចំនួន១០ម៉ឺនរៀលផងដែរ ៕
