ក្រសួងធនធានទឹក៖ ទឹកស្ទឹងព្រែកត្នោត ពុំទាន់មានអ្វីជាបញ្ហានោះទេ
ភ្នំពេញ៖ រដ្ឋលេខាធិការ និងជាអ្នកនាំពាក្យ ក្រសួងធនធានទឹក និងឧតុនិយម ឯកឧត្ដម ចាន់ យុត្ថាបានឱ្យដឹងថា ទឹកស្ទឹងព្រែកត្នោត ពុំទាន់មានអ្វីជាបញ្ហាគួរឱ្យព្រួយបារម្ភនៅឡើយនោះទេ។
តាមរយៈបណ្ដាញសង្គមនៅល្ងាចថ្ងៃ ទី១៧ ខែតុលា ឆ្នាំ២០២៣នេះ ឯកឧត្ដម ចាន់ យុត្ថា បញ្ជាក់បន្ថែមថា ទឹកនៅផ្នែកខាងលើមិនមានការកើនឡើងនោះទេ។ ចំពោះទ្វារទឹករលាំងជ្រៃដែលបានបើកចំនួន ៥ ទ្វារ មានធារទឹកប្រមាណពី ៣០០ ទៅ ៣៥០ ម៉ែត្រត្រីគុណក្នុងមួយវិនាទី។
ឯកឧត្ដមបន្ថែមថា បរិមាណទឹកកម្រិតនេះ ក៏មិនចោទជាបញ្ហាដល់ការរំដោះទឹកនៅផ្នែកខាងក្រោមដែរ។ស្ទឹងព្រែកត្នោតផ្នែកខាងក្រោមផ្លូវជាតិលេខ ៣ មានលទ្ធភាពរំដោះទឹកបានប្រមាណ ៩០០ ម៉ែត្រត្រីគុណក្នុងមួយវិនាទី៕
