ប្រធានាធិបតីរុស្ស៊ី វ៉្លាឌីមៀ ពូទីន សរសើរមិត្តសម្លាញ់ ស៊ី ជីនពីង ចំពោះគំនិតផ្តួចផ្តើម «ផ្លូវមួយខ្សែក្រវាត់មួយ»
ប្រធានាធិបតីរុស្ស៊ី លោក វ្ល៉ាឌីមៀ ពូទីន បានលើកសរសើរប្រធានាធិបតីចិន លោក ស៊ី ជីនពីង សម្រាប់គំនិតផ្តួចផ្តើមខ្សែក្រវាត់មួយ ផ្លូវមួយ ហៅកាត់ថា BRI និងបានបើកការអញ្ជើញសម្រាប់ការវិនិយោគជាសកលនៅក្នុងផ្លូវសមុទ្រភាគខាងជើង ដែលលោកបាននិយាយថាអាចធ្វើឱ្យពាណិជ្ជកម្មរវាងភាគខាងកើត និងភាគខាងលិចកាន់តែមានភាពស៊ីជម្រៅ។
ថ្លែងនៅក្នុងដំណើរទស្សនកិច្ចក្រៅប្រទេសលើកទីពីររបស់ខ្លួន ចាប់តាំងពីសង្គ្រាមអ៊ុយក្រែនមក លោក ពូទីន បានថ្លែងអំណរគុណដល់មេដឹកនាំចិនសម្រាប់ការអញ្ជើញ ហើយបានលើកឡើងថា ប្រទេសរុស្ស៊ីអាចដើរតួយ៉ាងសំខាន់ក្នុងការរស់ឡើងវិញនៃផ្លូវសូត្របុរាណរបស់ប្រទេសចិនសម័យទំនើប។ ដែនដីចិន ធ្លាប់មានតួនាទីសំខាន់បំផុត ក្នុងអតីតកាល។
លោក ពូទីន បានហៅលោក ស៊ី ថាជា «មិត្តសម្លាញ់» ហើយបានសរសើរយ៉ាងខ្លាំងចំពោះគំនិតផ្តួចផ្តើមខ្សែក្រវាត់មួយ ផ្លូវមួយ សម្រាប់ការនាំពិភពលោកឱ្យរួមបញ្ចូលគ្នា។ យ៉ាងណា មិនយូរប៉ុន្មានមុនពេលលោក ពូទីន ចាប់ផ្តើមថ្លែងសុន្ទរកថា គណៈប្រតិភូអឺរ៉ុបមួយចំនួនតូច រួមទាំងអតីតនាយករដ្ឋមន្ត្រីបារាំង លោក Jean-Pierre Raffarin បានដើរចេញពីបន្ទប់ប្រជុំ។
លោក ពូទីន បានកត់សម្គាល់យ៉ាងដូច្នេះថា៖ «រុស្ស៊ី និងចិន ក៏ដូចជាប្រទេសភាគច្រើននៃពិភពលោក ចែករំលែកបំណងប្រាថ្នាសម្រាប់កិច្ចសហប្រតិបត្តិការស្មើភាព និងផលប្រយោជន៍ទៅវិញទៅមក ដើម្បីសម្រេចបាននូវវឌ្ឍនភាពសេដ្ឋកិច្ចជាសកល និងយូរអង្វែងប្រកបដោយនិរន្តរភាព និងសុខុមាលភាពសង្គម ខណៈពេលដែលគោរពភាពចម្រុះនៃអរិយធម៌ និងសិទ្ធិរៀងៗខ្លួន»។
លោកបានបន្តថា គម្រោង BRI សក្ដិសមនឹងផែនការរបស់រុស្ស៊ី ដោយសារតែក្រុងមូស្គូកំពុងអភិវឌ្ឍហេដ្ឋារចនាសម្ព័ន្ធដឹកជញ្ជូនជាច្រើន ដើម្បីឆ្លងកាត់ប្រទេសដ៏ធំបំផុតរបស់ពិភពលោក ជាពិសេសពីផ្លូវសមុទ្រខាងជើង ដែលភ្ជាប់ពីទីក្រុង Murmansk នៅជិតព្រំដែនរុស្ស៊ីជាមួយន័រវេស ឆ្ពោះទៅកាន់ច្រកសមុទ្រ Bering នៅជិតរដ្ឋ Alaska។
ទន្ទឹមគ្នានោះ លោកបានបន្ថែមថា៖«ចំពោះផ្លូវសមុទ្រខាងជើង រុស្ស៊ីមិនត្រឹមតែអនុញ្ញាតឱ្យដៃគូរបស់យើងប្រើប្រាស់សក្តានុពលដឹកជញ្ជូនយ៉ាងសកម្មប៉ុណ្ណោះទេ ប៉ុន្តែយើងសូមអញ្ជើញរដ្ឋដែលចាប់អារម្មណ៍ ឱ្យចូលរួមដោយផ្ទាល់នៅក្នុងការអភិវឌ្ឍ។ រុស្ស៊ីក៏បានត្រៀមខ្លួនជាស្រេច ដើម្បីផ្តល់ឧបករណ៍បំបែកទឹកកកដែលអាចទុកចិត្តបាន ការទំនាក់ទំនង និងការផ្គត់ផ្គង់នានា។ ចាប់ពីឆ្នាំក្រោយទៅ ការធ្វើនាវាចរណ៍សម្រាប់កប៉ាល់ដឹកទំនិញ តាមបណ្តោយផ្លូវសមុទ្រខាងជើង នឹងអាចធ្វើទៅបានពេញមួយឆ្នាំ»។ គម្រោងផ្លូវមួយខ្សែក្រវាត់មួយរបស់ចិននេះ គឺជាគម្រោងហេដ្ឋារចនាសម្ព័ន្ធផ្លូវថ្នល់ ខ្សែរថភ្លើង បំពង់បង្ហូរឧស្ម័ន និងកំពង់ផែជាច្រើន ដើម្បីផ្សារផ្ជាប់ចិន ជាមួយនឹងទ្វីបអឺរ៉ុប អាស៊ី និងអាហ្វ្រិក។
ក្នុងដំណើរទស្សនកិច្ចនេះ លោក ពូទីន ត្រូវបានអមដំណើរដោយគណៈប្រតិភូជាន់ខ្ពស់ពីទីក្រុងមូស្គូជាច្រើននាក់ ក្នុងនោះរួមមាន៖ រដ្ឋមន្ត្រីការបរទេស លោក សឺហ្គី ឡាវរ៉ូវ (Sergei Lavrov) ដែលនឹងទៅបំពេញទស្សនកិច្ចនៅកូរ៉េខាងជើងក្នុងពេលឆាប់ៗនេះ ឧបនាយករដ្ឋមន្ត្រី អេឡិកសាន់ឌ័រ ណូវ៉ាក់ Alexander Novak ជាអ្នកគ្រប់គ្រងប្រេង និងឧស្ម័នរុស្ស៊ី និងឧបនាយករដ្ឋមន្ត្រី ឌីមីទ្រី ឈឺនីសហ្សិនឆ្កូ Dmitry Chernyshenko។
ក្នុងនោះក៏មានអ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ (Dmitry Peskov) ជំនួយការសេដ្ឋកិច្ចរបស់វិមានក្រឹមឡាំង លោក ម៉ាហ្ស៊ីម អូរ៉េស្គីន Maxim Oreshkin ជំនួយការគោលនយោបាយការបរទេសរបស់វិមានក្រឹមឡាំង លោក យូរី យូសាកូវ Yuri Ushakov រដ្ឋមន្ត្រីក្រសួងសេដ្ឋកិច្ច ម៉ាហ្ស៊ីម រ៉េស៊ែតនីកូវ Maxim Reshetnikov និងលោក អ៊ីហ្គ័រ ម៉ូហ្គូឡូវ Igor Morgulov ឯកអគ្គរដ្ឋទូតរុស្ស៊ីប្រចាំនៅប្រទេសចិនផងដែរ៕
