ថ្នាក់ដឹកនាំរដ្ឋបាលខេត្តក្រចេះ ប្រារព្ធពិធីគោរពវិញ្ញណក្ខន្ធ ព្រះបរមរតនកោដ្ឋ ក្នុងខួបគម្រប់១១ឆ្នាំ

ភ្នំពេញ៖ ឯកឧត្តម ហឿ ស៊ីយ៉ែម ប្រធានក្រុមប្រឹក្សាខេត្តក្រចេះ នឹងឯកឧត្តម វ៉ា ថន អភិបាលខេត្តក្រចេះ នារសៀលថ្ងៃពុធ ៤កើត ខែអស្សុជ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៨ ខែតុលា ឆ្នាំ២០២៣ បានអញ្ជើញប្រារព្ធពិធីគោរពវិញ្ញណក្ខន្ធ ព្រះបាទសម្ដេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ គម្រប់ខួប១១ឆ្នាំ ដោយមានការចូលរួមពីសំណាក់ឯកឧត្តម លោកជំទាវ សមាជិកក្រុមប្រឹក្សា អភិបាលរងខេត្ត លោក លោកស្រី ប្រធាន អនុប្រធាន មន្ទីរ អង្គភាពជុំវិញខេត្ត កងកម្លាំងប្រដាប់អាវុធគ្រប់លំដាប់ថ្នាក់ ព្រះសង្ឃ អភិបាលក្រុង-ស្រុក សិស្ស និស្សិត យុវជន លោកតាលោកយាយ និងប្រជាពលរដ្ឋ ដែលធ្វើឡើងនៅសាលមហោស្រពខេត្ត។

នាឱកាសនោះ ឯកឧត្ដម វ៉ា ថន អភិបាលខេត្ត ក៏បានរំលឹកអំពីជីវប្រវត្តិសង្ខេបរបស់ព្រះបាទសម្ដេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ ក្នុងព្រះរាជសកម្មភាពដើម្បីបុព្វហេតុឯករាជ្យជាតិ បូរណភាពទឹកដី ផ្សះផ្សារបង្រួបបង្រួមជាតិ និងអភិវឌ្ឍន៍លើគ្រប់វិស័យ និងបានសម្ដែងនូវទឹកចិត្តពោរពេញដោយសេចក្តីទុក្ខក្រៀមក្រំ និងសោកស្តាយស្រណោះអាឡោះអាល័យយ៉ាងក្រៃលែង ចំពោះការយាងចូលព្រះទីវង្គត់ គម្រប់ខួប១១ឆ្នាំ របស់ព្រះករុណាព្រះបាទសម្តេចព្រះនរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ «ព្រះបរមរតនកោដ្ឋ» ជាទីសក្ការៈដ៏ខ្ពង់ខ្ពស់បំផុត។

បន្ទាប់មកឯកឧត្ដមគណៈអធិបតី រួមនឹងមន្ត្រីរាជការ កងកម្លាំងប្រដាប់អាវុធ សិស្ស និស្សិត និងប្រជាពលរដ្ឋ បានសម្រួមកាយឈរស្មឹងស្មាតដើម្បីគោរពតបស្នងនូវព្រះគុណូបការៈដ៏ថ្ងៃថ្លា និងព្រហ្មវិហារធម៌ដ៏ថ្លៃថ្លា ឧត្តុង្គឧត្តម វិសេសវិសាលក្រៃលែង និងព្រះសង្ឃសូត្រមន្តបង្សុកូលឧទ្ទិសថ្វាយនូវព្រះរាជកុសលផលបុណ្យ ជូនចំពោះវិញ្ញណក្ខន្ធ ព្រះបាទសម្ដេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ ជាទីគោរពសក្ការដ៏ខ្ពង់ខ្ពស់បំផុត។

ជាមួយគ្នានោះឯកឧត្តម វ៉ា ថន អភិបាលខេត្តក៏បានបួងសួង ដល់គុណបុណ្យព្រះរតនត្រ័យ ថ្វាយព្រះរាជកុសល ព្រះវិញ្ញាណក្ខន្ធព្រះករុណា ព្រះមហាវីរក្សត្រ នរោត្តម សីហនុ ព្រះវររាជបិតាជាតិខ្មែរ ព្រះបរមរតនកោដ្ឋ សូមបានយាងទៅសោយព្រះបរមសុខក្នុងសុគតិភព និងសូមឱ្យព្រះវិញ្ញាណក្ខន្ធ ដ៏ស័ក្កិសិទ្ធិរបស់ព្រះអង្គតាមជួយប្រោសប្រទានសាធុការពរជ័យ ដល់ទឹកដីនៃព្រះរាជាណាចក្រកម្ពុជា និងជាប្រជានុរាស្រ្តខ្មែរទូទាំងប្រទេស ប្រកបដោយវឌ្ឍនភាព វិបុលសុខ និងសុខកេក្សាន្ត រុងរឿងជាយូរអង្វែងតរៀងទៅ។ ចុងបញ្ចប់គណៈអធិបតីក៏បានចែកថវិកាជូនតាជីយាយជីដែលបានចូលរួមផងដែរ ៕