យោធភូមិភាគទី៤ ប្រជុំផ្សព្វផ្សាយ សភាពការណ៍ថ្មីៗ ជាតិ និងអន្តរជាតិ ជូនដល់នាយទាហាន នាយទាហានរង ពលទាហាន និងគ្រប់បណ្តាកងឯកភាពចំណុះ
ភ្នំពេញ៖ នាព្រឹកថ្ងៃទី២៣ ខែតុលា ឆ្នាំ២០២៣ ឯកឧត្តម ឧត្តមសេនីយ៍ឯក ពៅ ហេង មេបញ្ជាការរង កងទ័ពជើងគោក មេបញ្ជាការ យោធភូមិភាគទី៤ អញ្ជើញជាអធិបតីក្នុងពិធីប្រជុំបូកសរុបលទ្ធផលការងារយោធាសន្តិសុខ ប្រចាំខែកញ្ញា ឆ្នាំ២០២៣ និងទិសដៅអនុវត្តបន្ត ខែតុលា ឆ្នាំ២០២៣ នៅបញ្ជាការដ្ឋានយោធភូមិភាគទី៤។
ពិធីនេះមានការអញ្ជើញចូលរួមពីសំណាក់ មេបញ្ជាការ មេបញ្ជាការរង នាយសេនាធិការ នាយសេនាធិការរង កងពលតូចថ្មើរជើងលេខ៤១, ៤២ តំបន់ប្រតិបត្តិការសឹករងខេត្តទាំង៤, កងការពារព្រំដែនគោកលេខ៤០២, ៤០៣ នាយការិយាល័យទាំង១៨ និងលេខាធិការដ្ឋាន នាយកសាលាពលទាហានទី៤ នាយកមន្ទីរពេទ្យ និងបណ្តាកងឯកភាពចំណុះយោធភូមិភាគទី៤។
ថ្លែងក្នុងពិធីប្រជុំបូកសរុប ឧត្តមសេនីយ៍ឯក ពៅ ហេង មានប្រសាសន៍លើកឡើង អំពីសភាពការណ៍ជាតិ និងអន្តរជាតិថ្មីៗ ជូនដល់នាយទាហាន នាយទាហានរង និងពលទាហានបានជ្រាប។
ឯកឧត្តម បានបន្តដាក់បទបញ្ជាដល់បណ្តាកងឯកភាពដែលឈរជើងនៅជាប់តាមខ្សែបន្ទាត់ព្រំដែនកម្ពុជា- ថៃ-ឡាវ ត្រូវបន្តយកចិត្តទុកដាក់ឱ្យបានម៉ឺងម៉ាត់ ម្ចាស់ការត្រួតពិនិត្យ និងដើរល្បាតឱ្យបានជាប់ជាប្រចាំ ដើម្បីធានាការពារអោយបាននូវបូរណភាពដឹកដី និងទប់ស្កាត់អោយបាននូវរាល់បទល្មើសផ្សេងៗ។
ឯកឧត្តម មេបញ្ជាការ បានធ្វើការកោតសរសើរដល់បណ្តាកងឯកភាពទាំងអស់ ដែលតែងតែខិតខំប្រឹងប្រែងបំពេញកិច្ចការងារបានយ៉ាងល្អកន្លងមក។ និងបានផ្តាំផ្ញើដល់ នាយទាហាន នាយទាហានរង និងពលទាហាន ទាំងអស់ សូមជៀសវាងអោយឆ្ងាយពីការប្រើប្រាស់គ្រឿងញៀនគ្រប់ប្រភេទ៕