ឧត្តមសេនីយ៍ឯក សុខ វាសនា ដឹកនាំគណៈប្រតិភូ ចូលរួមកិច្ចប្រជុំពិភាក្សា ផ្លាស់ប្ដូរបទពិសោធន៍ រវាងនាយកដ្ឋានគ្រប់គ្រងការចេញ-ចូលឆ្លងដែន នៃក្រសួងនគរបាលវៀតណាម

ភ្នំពេញ៖ ឯកឧត្តម ឧត្តមសេនីយ៍ឯក សុខ វាសនា អគ្គនាយកអន្តោប្រវេសន៍ នាព្រឹកថ្ងៃចន្ទ ៩កើត ខែអស្សុជ ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី២៣ ខែតុលា ឆ្នាំ២០២៣ បានអញ្ជើញដឹកនាំគណៈប្រតិភូនៃអគ្គនាយកដ្ឋានអន្តោប្រវេសន៍កម្ពុជា ចូលរួមកិច្ចប្រជុំពិភាក្សា ផ្លាស់ប្ដូរបទពិសោធន៍ រវាងនាយកដ្ឋានគ្រប់គ្រងការចេញ-ចូលឆ្លងដែន នៃក្រសួងនគរបាលវៀតណាម និងអគ្គនាយកដ្ឋានអន្តោប្រវេសន៍ ក្រសួងមហាផ្ទៃ ព្រះរាជាណាចក្រកម្ពុជា នៅទីក្រុងហាណូយ ប្រទេសវៀតណាម។

ក្នុងកិច្ចប្រជុំនេះភាគីខាងវៀតណាមដឹកនាំកិច្ចប្រជុំដោយលោកឧត្តមសេនីយ៍ត្រី ផាម ដាំង ខ្វា ប្រធាននាយកដ្ឋានគ្រប់គ្រងការចេញ-ចូលឆ្លងដែន និងសហការីនៃនាយកដ្ឋានគ្រប់គ្រងការចេញ-ចូលឆ្លងដែន នៃក្រសួងនគរបាលវៀតណាម។

កិច្ចប្រជុំនេះដែរភាគីទាំងពីរបានពិភាក្សា ផ្លាស់ប្ដូរបទពិសោធន៍ ពីស្ថានភាពប្រជាជននៃប្រទេសទាំងពីរចេញ ចូលឆ្លងដែន និងស្នាក់នៅប្រទេសទាំងពីរ​ បន្តសម្របសម្រួលជូនប្រជាពលរដ្ឋទាំងសងខាង ក្នុងនាមជាអ្នកជិតខាងល្អ។​ ពិសេសបន្តការសហការផ្លាស់ប្តូរព័ត៌មាន និងបទពិសោធន៍លើការទប់ស្កាត់បទឧក្រិដ្ឋកម្មឆ្លងដែន គ្រប់រូបភាព និងបានឯកភាពបន្តពង្រឹងកិច្ចសហប្រតិបត្តិការទ្វេភាគី ដើម្បីបន្តធានាទប់ស្កាត់ឧក្រិដ្ឋកម្មឆ្លងដែន។

ឯកឧត្តម​ ឧត្តមសេនីយ៍ឯក​ សុខ​ វាសនា​ ក៏បានថ្លែងអំណរគុណដល់នាយកដ្ឋានគ្រប់គ្រងការចេញចូលឆ្លងដែនវៀតណាម ដែលបានផ្តល់ជូននូវវគ្គបណ្តុះបណ្តាលជូនដល់មន្ត្រី របស់អគ្គនាយកដ្ឋានអន្តោប្រវេសន៍ ចំនួន ២០រូប លើវគ្គគ្រប់គ្រងការចេញចូលឆ្លងដែន និងបានស្នើសុំបន្តផ្តល់ជូនវគ្គបណ្តុះបណ្តាលជូនមកអគ្គនាយកដ្ឋានអន្តោប្រវេសន៍ ដើម្បីបន្តពង្រីកសមត្ថភាពរបស់មន្ត្រីអគ្គនាយកដ្ឋានអន្តោប្រវេសន៍។

ជាកិច្ចបញ្ចប់ នៃកិច្ចប្រជុំ ភាគីទាំងពីរបានឯកភាពរឹតចំណងកិច្ចសហប្រតិបត្តិការទ្វេភាគីឱ្យកាន់តែប្រសើរឡើង ៕