នាយករដ្ឋមន្ត្រី ហ៊ុន ម៉ាណែត ឯកភាពដកទ័ពមួកខៀវ ចេញពីម៉ាលី ដោយសាររងការវាយប្រហារពីក្រុមឧទ្ទាម
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថារាជរដ្ឋាភិបាលកម្ពុជាបានឯកភាព ជាមួយអង្គការសហប្រជាជាតិ ដើម្បីជម្លៀសកងទ័ពមួកខៀវ កំពុងបំពេញបេសកកម្មនៅប្រទេសម៉ាលី ដោយសាររងការវាយប្រហារពីក្រុមឧទ្ទាម ។
នាឱកាសជួបសំណេះសំណាលជាមួយកម្មករនិយោជិតប្រមាណជាង១ម៉ឺន២ពាន់នាក់ ខេត្តកំពង់ចាម នាថ្ងៃទី២៥ ខែតុលា ឆ្នាំ២០២៣ សម្ដេចធិបតី បានឱ្យដឹងថា អង្គការសហប្រជាជាតិបានសម្រេចដកកងទ័ពថែរក្សាសន្តិសុខរាប់ម៉ឺននាក់ចេញពីប្រទេសម៉ាលី (នៅភាគខាងលិចនៃទ្វីបអាហ្វ្រិក) ក្នុងនោះមានទាំងកងទ័ពមួកខៀវកម្ពុជាជិត១០០នាក់ផងដែរ ហើយក៏សម្រេចកម្ទេចចោលសម្ភារសឹក គ្រឿងសព្វាវុធទាំងអស់នៅទីនោះ។
សម្ដេចធិបតីបញ្ជាក់ថា «ប៉ុន្មានថ្ងៃមុន ខ្ញុំត្រូវផ្ដល់ការឯកភាពដើម្បីដកទ័ពមួកខៀវយើងចេញពីប្រទេសម៉ាលី ដោយសារ UN ចាប់ផ្ដើមជម្លៀសទ័ព ព្រោះដោយសារកន្លែងខ្លះទ័ពនៅលែងបានហើយ ទោះបីទ័ព UN មួកខៀវក៏គេវ៉ៃដែរ»។
សូមបញ្ជាក់ថា គិតត្រឹមឆ្នាំ២០២៣នេះ កម្ពុជាបានបញ្ជូលកងកម្លាំងជិត៩ពាន់នាក់ចេញទៅបំពេញបេសកកម្មនៅប្រទេសចំនួន១១ ក្រោមក្របខណ្ឌអង្គការសហប្រជាជាតិ (UN) ក្នុងនោះរួមមាន៖ សាធារណរដ្ឋស៊ូដង់ ប្រទេសស៊ូដង់ខាងត្បូង ឆាដ អាហ្វ្រិកកណ្តាល លីបង់ ម៉ាលី ស៊ីរី ស៉ីប និងយេម៉ែន លើជំនាញបោសសម្អាតមីន កម្ទេចគ្រាប់មិនទាន់ផ្ទុះ វិស្វកម្ម អាវុធហត្ថ មន្ទីរពេទ្យ ព្រលានយន្តហោះ នាយទាហាន សេនាធិការ សង្កេតការណ៍យោធាជាដើម៕
