អភិបាលខេត្តស្ទឹងត្រែង៖ ការពង្រឹងការគ្រប់គ្រងដីធ្លី គឺដើម្បីប្រសិទ្ធភាពជូនពលរដ្ឋ និងជំរុញការចុះបញ្ជីដីធ្លីរដ្ឋ និងឯកជន ឲ្យមានការបញ្ជាក់ពីការកាន់កាប់ស្របច្បាប់

ភ្នំពេញ៖ ឯកឧត្តម ស្វាយ សំអ៊ាង អភិបាលខេត្តស្ទឹងត្រែង បានថ្លែងថា ការពង្រឹងការគ្រប់គ្រងដីធ្លី គឺដើម្បីប្រសិទ្ធភាពជូនប្រជាពលរដ្ឋ និងជំរុញការចុះបញ្ជីដីធ្លីរបស់រដ្ឋ និងឯកជន ឲ្យមានការបញ្ជាក់អំពីការកាន់កាប់ត្រឹមត្រូវស្របច្បាប់ ។

ក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុ ក្នុងភូមិកាំងមម៉ាយ និងភូមិកាំងដីស សង្កាត់ព្រះបាទ ក្នុងស្រុកស្ទឹងត្បូង ខេត្តស្ទឹងត្រែង នាថ្ងៃទី២៦ ខែតុលា ឆ្នាំ២០២៣ ឯកឧត្តម ស្វាយ សំអ៊ាង បានមានប្រសាសន៍ថា យោងតាមលក្ខខណ្ឌនេះរាជរដ្ឋាភិបាលក៏បានដាក់ចេញនូវបទបញ្ជាដ៏ខ្ពង់ខ្ពស់មួយដែលចាំបាច់ត្រូវអនុវត្តនៅក្នុងឆ្នាំ២០១១, ២០១២, ២០១៣ រហូតមកដល់បច្ចុប្បន្ននេះ។ ហើយយន្តការនេះក៏ត្រូវបានបញ្ចប់ទៅវិញនៅក្នុងរង្វង់រយៈពេល២ឆ្នាំ ប៉ុន្តែនៅតែបន្តជំរុញការចុះបញ្ជីដីធ្លីតាមលក្ខណៈជាប្រព័ន្ធ ដែលជាផែនការរបស់ក្រសួងរៀបចំដែនដី នគរូបនីយកម្ម និងសំណង់។

ឯកឧត្តមអភិបាលខេត្ត គូសបញ្ជាក់ថា នៅក្នុងដំណាក់កាលចុះអនុវត្តបទបញ្ជាដ៏ខ្ពង់ខ្ពស់ យើងឃើញថានៅក្នុងក្របខណ្ឌទូទាំងប្រទេសប្រជាពលរដ្ឋក៏បានទទួលបានប័ណ្ណកម្មសិទ្ធិស្របច្បាប់ប្រមាណជា ៣លានប័ណ្ណ ស្មើនឹងជិត ២លានគ្រួសារ។ ដោយឡែកនៅក្នុងខេត្តស្ទឹងត្រែង យើងបានជំរុញការចុះបញ្ជីដីធ្លីតាមរយៈបទបញ្ជាដ៏ខ្ពង់ខ្ពស់ និងជំរុញជាបន្តបន្ទាប់នៅឆ្នាំក្រោយដែលមានលទ្ធភាពជាក់ស្ដែង ហើយក៏ជាតម្រូវការពិតរបស់បងប្អូនប្រជាពលរដ្ឋ នេះជាប្រសិទ្ធភាពនៃការគ្រប់គ្រងដែលយើងបានធ្វើកន្លងមក។ ហើយថ្ងៃនេះយើងក៏បានចុះបញ្ជីដីធ្លីប័ណ្ណកម្មសិទ្ធិជូនបងប្អូនប្រជាពលរដ្ឋ ដែលរស់នៅភូមិកាំងមេម៉ាយ និងភូមិកាំងជីស ក្នុងសង្កាត់ព្រះបាទ ក្រុងស្ទឹងត្រែង ដែលមានប្រមាណជា ៧០០ប័ណ្ណ ហើយនេះក៏ជាសមិទ្ធផលថ្មីមួយទៀតដែលកើតចេញពីការយកចិត្តទុកដាក់របស់រាជរដ្ឋាភិបាល ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ក្នុងពិធីនោះដែរប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តស្ទឹងត្រែង លោក គឹម ពិសិទ្ធ បានលើកឡើងថា ការទទួលបានប័ណ្ណកម្មសិទ្ធិដីធ្លី គឺជាឯកសាររដ្ឋបាលបញ្ជាក់ពីសិទ្ធិជាម្ចាស់លើក្បាលដីនីមួយៗ ហើយប្រជាពលរដ្ឋដែលទទួលបានប័ណ្ណកម្មសិទ្ធិ គឺជាម្ចាស់ដីពេញលក្ខណៈដែលត្រូវបានការពារដោយច្បាប់។ លោកប្រធានមន្ទីរ បញ្ជាក់ថា ការសម្រេចបាននូវលទ្ធផលទាំងនេះគឺដោយសារមានការចូលរួមសហការពីអាជ្ញាធរស្រុក ឃុំ ភូមិ ពិសេសការចូលរួមពីប្រជាពលរដ្ឋ ជាម្ចាស់ក្បាលដីពាក់ព័ន្ធទាំងអស់ ដែលបានសហការល្អជាមួយអាជ្ញាធរ និង ក្រុមការងារបច្ចេកទេសចុះវាស់វែងធ្វើឱ្យការចុះបញ្ជីដីធ្លីមានលក្ខណៈជាប្រព័ន្ធក្នុងភូមិកាំងតេជោឃុំថាឡាបរិវ៉ាត់ទទួលជោគជ័យ។

លោកប្រធានមន្ទីរបានឲ្យដឹងថា តាំងពីចាប់ផ្តើមដំណើរការនៃការចុះបញ្ជីដីធ្លីក្នុងខេត្តស្ទឹងត្រែងក្នុង រហូតមកដល់បច្ចុប្បន្ននេះ មន្ទីររៀបចំដែនដីខេត្ត សម្រេចបានលទ្ធផលក្នុងការងារចុះបញ្ជីដីធ្លីមានលក្ខណៈជាប្រព័ន្ធ ដោយបានធ្វើការប្រកាសតំបន់វិនិច្ឆ័យបានចំនួន ៦៣ភូមិលើ ១២៨ភូមិ ក្នុងនោះក្រុមការងារបច្ចេកទេស បានចុះវាស់វែង បញ្ចូលទិន្នន័យ បិទផ្សាយជាសាធារណះចប់សព្វ គ្រប់ចំនួន ៤៧ភូមិ ស្មើនឹង ៤៣,២១៤ក្បាលដី និងចេញប័ណ្ណកម្មសិទ្ធិបាន ៣១,៧១៩ប័ណ្ណ ក្នុងនោះ ចែកដល់ដៃប្រជាពលរដ្ឋបាន ២៧,៧៥៧ប័ណ្ណ កំពុងបន្តនីតិវិធីវាស់វែង និងបិទផ្សាយជាសាធារណៈនូវឯកសារ វិនិច្ឆ័យចំនួន ១៤ភូមិ ហើយភូមិដែលបានប្រកាសជាតំបន់វិនិច្ឆ័យរួច ប៉ុន្តែពុំទាន់បានចុះអនុវត្តចំនួន ៦ភូមិ ក្រុមវាលទាំង៤ក្រុម បានរៀបចំផែនការចុះអនុវត្តក្នុងចុងឆ្នាំនេះ និងដើមឆ្នាំក្រោយ។

លោកបន្តថា យោងតាមអនុសាសន៍ដឺក នាំដ៏ខ្ពង់ខ្ពស់របស់របស់ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ត្រូវរៀបចំផែនការចុះបញ្ជីឱ្យបានចប់សព្វគ្រប់ក្នុងក្របខ័ណ្ឌទូទាំងប្រទេសត្រឹមដំណាច់ឆ្នាំ២០២៧ ហើយក្នុងខេត្តស្ទឹងត្រែង ភូមិដែលមិនទាន់បានប្រកាសជាតំបន់វិនិច្ឆ័យដើម្បីចុះបញ្ជីដីធ្លីជាលក្ខណះប្រព័ន្ធសរុប ទូទាំងខេត្តមានចំនួន ៦៥ភូមិ។ ក្នុងក្រុងស្ទឹងត្រែង ការងារចុះបញ្ជីដីធ្លីមានលក្ខណៈប្រព័ន្ធអនុវត្តបានចប់សព្វគ្រប់ ចំនួន សង្កាត់ រួមមានសង្កាត់ស្ទឹងត្រែង សង្កាត់ស្រះឫស្សី សង្កាត់ព្រះបាទ ដោយឡែកសង្កាត់សាមគ្គី មានភូមិមួយចំនួនបានវាស់វែងចុះបញ្ជីរួច និងមានភូមិមួយចំនួនទៀត ក្រុមការងារចុះបញ្ជី កំពុងបន្តសកម្មភាពចុះវាស់វែង បញ្ចូលទិន្នន័យ និងបិទផ្សាយជាសាធារណៈនូវឯកសារវិនិច្ឆ័យ។

លោកបញ្ជាក់ថា ចំពោះសង្កាត់ព្រះបាទ ក្រុមការងារចុះបញ្ជីដីធ្លីជាលក្ខណះប្រព័ន្ធ បានដំណើរការចុះបញ្ជី និងទទួលបានលទ្ធផលដូចខាងក្រោម៖-ភូមិកាំងដីស៖ មានក្បាលដីសរុបចំនួន ១,២៨៧ក្បាលដី បានអនុវត្តនីតិវិធីចេញប័ណ្ណកម្មសិទ្ធិលើកទី១ ក្នុងអំឡុងឆ្នាំ២០១៧ បានចំនួន ៧២៩ក្បាលដី ក្នុងនោះមានដឹឯកជន ៧២៣ក្បាលដី, ដីរដ្ឋ ៣ក្បាលដី, ជីវត្ត ២ក្បាលដី, និងដីក្រុមហ៊ុន ១ក្បាលដី។ ថ្ងៃនេះ មានក្បាលដីចំនួន ៤៦១ក្បាលដីបន្ថែមទៀត នឹងត្រូវទទួលបាន ប័ណ្ណកម្មសិទ្ធិបន្ទាប់ពីទទួលបានអនុក្រឹត្យអនុបយោគពីរាជរដ្ឋាភិបាលកាលពីដើមឆ្នាំ២០២២កន្លងទៅ។

-ភូមិកាំងមេម៉ាយ៖ មានក្បាលដីសរុបចំនួន ១.៨០៥ក្បាលដី បានចេញប័ណ្ណកម្មសិទ្ធិលើកទី១ ចំនួន ១.៤៧៧ក្បាលដី ក្នុងនោះមានដីឯកជន ១.៤៦៣ក្បាលដី, ដីរដ្ឋ ១៣ក្បាលដី, និងជីវត្ត ១ក្បាលដី ហើយថ្ងៃនេះ មានក្បាលដីចំនួន ២៤០ក្បាលដីបន្ថែមទៀត នឹងត្រូវទទួលបានប័ណ្ណកម្មសិទ្ធិបន្ទាប់ពីទទួលបានអនុក្រឹត្យអនុបយោគពីរាជរដ្ឋាភិបាល។

-ភូមិបាចុង៖ ក្បាលដីដែលបានវាស់វែង បញ្ចូលទិន្នន័យ និងបិទផ្សាយសរុបមានចំនួន ១, ០៧០ក្បាលដី ក្នុងនោះបានចេញប័ណ្ណកម្មសិទ្ធជូនប្រជាពលរដ្ឋចំនួន ៩៣១ប័ណ្ណ។

សូមបញ្ជាក់ថា ការងារចុះបញ្ជីដីធ្លីតាមរយៈបទបញ្ជាលេខ០១បប ក្នុងទូទាំងខេត្តស្ទឹងត្រែងរហូតមកដល់បច្ចុប្បន្នអនុវត្តបានចំនួន២៧ភូមិ ស្ថិតក្នុងឃុំ-សង្កាត់ចំនួន១០ វាស់វែងសរុបបាន១៥,៧៨១ក្បាលដី ចេញប័ណ្ណកម្មសិទ្ធិបាន១៣,៨៤៨ប័ណ្ណ ចែកដល់ដៃប្រជាពលរដ្ឋបាន១៣,១៩៩ប័ណ្ណ នៅសល់ចំនួន ៦៤៩ប័ណ្ណទៀត ប្រជាពលរដ្ឋពុំបានមកទទួលយកដោយសារពួកគាត់ភាគច្រើនធ្វើចំណាកស្រុក ៕