ឧបនាយករដ្ឋមន្ត្រី ហង់ជួន ណារ៉ុន អញ្ជើញបិទពិធីប្រណាំងទូកងខ្នាតអន្តរជាតិក្នុងខេត្តកំពង់ចាម

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី២៩ ខែតុលា ឆ្នាំ២០២៣ បានអញ្ជើញជាអធិបតីក្នុងពិធីបិទកម្មវិធីប្រណាំងទូកងខ្នាតអន្តរជាតិ ប្រគល់ពានរង្វាន់ដល់កីឡាករជ័យលាភីខេត្តកំពង់ចាម។

ថ្លែងក្នុងឱកាសនោះ ឯកឧត្តមឧបនាយករដ្ឋមន្ត្រី បានវាយតម្លៃខ្ពស់ចំពោះអភិបាលនៃគណៈអភិបាលខេត្តកំពង់ចាម រដ្ឋបាលខេត្តកំពង់ចាម ថ្នាក់ដឹកនាំខេត្ត មន្ត្រីរាជការ និងអ្នកដែលពាក់ព័ន្ធ ដែលបានប្រារព្ធកម្មវិធីនេះឡើងដើម្បីផ្ដល់បរិយាកាសសប្បាយរីករាយដល់បងប្អូនប្រជាពលរដ្ឋ ក្រោមម្លប់សន្តិភាព។

សូមជម្រាបថា ពិធីប្រណាំងទូកងនេះ បានប្រព្រឹត្តទៅរយៈពេល២ថ្ងៃ ដោយមានការចូលរួមប្រណាំងដោយ ៤៨ទូក ហើយក្នុងនោះ ក៏មានពិធីបណ្ដែតប្រទីប អុជកាំជ្រួច ដែលបានចូលរួមថែរក្សាប្រពៃណីវប្បធម៌ខ្មែរ និងលេីកស្ទួយវិស័យកីឡាប្រណាំងទូកកម្ពុជា។ ទន្ទឹមនឹងនេះ ក៏មានពិធីតាំងពិព័រណ៍សមិទ្ធិផលនានាដែលបង្ហាញពីការរីកចម្រេីននៃរដ្ឋបាលក្រុងស្រុកមន្ទីរអង្គភាពនានាទូទាំងខេត្តកំពង់ចាម ៕