សម្តេចធិបតី៖ រាជរដ្ឋាភិបាលអាណត្តិថ្មី នឹងបន្ដធ្វើឲ្យបានសម្រេចតាមផែនការ កម្ពុជាគ្មានមីនឆ្នាំ២០២៥

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានអះអាងថា រាជរដ្ឋាភិបាលអាណត្តិទី៧ថ្មីនេះ នឹងបន្តខិតខំធ្វើឲ្យសម្រេចតាមផែនការ កម្ពុជាគ្មានមីន នៅឆ្នាំ២០២៥ ។

ក្នុងឱកាសអញ្ជើញសម្ពោធដាក់ឲ្យប្រើប្រាស់អគាររដ្ឋបាលថ្មី និងសមិទ្ធផលនានា នៅខេត្តកំពង់ស្ពឺ ព្រមទាំងប្រកាសខេត្តកំពង់ស្ពឺ ជាខេត្តអស់មីន នាថ្ងៃទី៣០ តុលា សម្ដេចធិបតី ហ៊ុន ម៉ាណែត បានបញ្ជាក់ថា «ផែនការកម្ពុជាគ្មានមីន នៅឆ្នាំ២០២៥ និងការផ្ដួចផ្ដើម របស់សម្ដេចតេជោ ហ៊ុន សែន ដែលយើងបានរួមគ្នាធ្វើ យើងនឹងបន្ដធ្វើ ឲ្យបានសម្រេចតាមផែនការ»។

សម្ដេចធិបតីបន្ថែមថា កម្ពុជាមិនត្រឹមតែខំប្រឹងដោះមីន នៅក្នុងប្រទេសខ្លួននោះទេ ប៉ុន្តែកម្ពុជា ក៏បានបញ្ជូនកម្លាំងដោះមីន តាមរយៈអង្គការសហប្រជាជាតិ ទៅដោះមីននៅក្រៅប្រទេសផងដែរ។

សម្ដេចធិបតីថ្លែងថា ការលះបង់របស់បងប្អូន ជាកម្លាំងដោះមីន គឺពិតណាស់បានផ្ដល់នូវសុភមង្គល ដល់ប្រជាពលរដ្ឋរាប់ម៉ឺ​នរាប់លាននាក់ ដែលជួយឲ្យរួចផុតពីគ្រោះថា្នក់ ស្លាប់ ឬរបួសពិការ ព្រមទាំងរំដោះដី ឲ្យប្រជាពលរដ្ឋ​រាប់លាននាក់ អាចធ្វើអាជីវកម្ម ដាំដុះផលដំណាំ ចិញ្ចឹមជីវភាព ៕