រាជរដ្ឋាភិបាល នឹងសាកល្បងបង្កើត មជ្ឈមណ្ឌលព័ត៌មានវិទ្យាមួយនៅតាកែវ ដើម្បីឲ្យប្រជាពលរដ្ឋស្នើសុំការ ផ្តល់សេវាតាមប្រព័ន្ធឌីជីថល
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា នាពេលខាងមុខនេះ រាជរដ្ឋាភិបាល នឹងសាកល្បងបង្កើត មជ្ឈមណ្ឌលព័ត៌មានវិទ្យាមួយនៅខេត្តតាកែវ ដើម្បីឲ្យពលរដ្ឋអាចស្នើសុំការផ្តល់សេវាសាធារណៈតាមឌីជីថលដោយខ្លួនឯង ដែលរួមចំណែកជំរុញការផ្តល់សេវាសាធារណៈ នៅថ្នាក់ក្រោមជាតិឱ្យកាន់តែប្រសើរ កាត់បន្ថយការចំណាយ និងពេលវេលា ។
ក្នុងឱកាសអញ្ជើញសម្ពោធអគាររដ្ឋបាលថ្មី និងសមិទ្ធផលនៅខេត្តកំពង់ស្ពឺ និងប្រកាសជាខេត្តអស់មីន នាថ្ងៃទី៣០ ខែតុលា សម្តេចធិបតីបញ្ជាក់ថា «យើងបង្កើន និងសាកល្បង នៅខេត្តតាកែវ បង្កើតកន្លែងមួយ គឺមជ្ឈមណ្ឌលបច្ចេកវិទ្យា ដើម្បីប្រជាពលយកចុះឈ្មោះ ឬបំពេញបែបបទស្នើសុំសេវាអីមួយចំនួនពីថ្នាក់ខេត្ត។ ជួនកាលគាត់មិនបាច់មកទេ គាត់ដាក់តាមហ្នឹងហើយចាំជិះមកទទួល ឬមួយក៏ផ្ញើទៅដល់ ។ ព្រោះឥលូវបច្ចេកវិទ្យាយើងមានហើយ កាត់បន្ថយវេលា និងចំណាយរបស់បងប្អូនឡើងមក។»
សម្តេចបន្ថែមថា ការធ្វើទំនើបកម្មលើការផ្តល់សេវាសាធារណៈដល់ប្រជាពលរដ្ឋនេះ ស្របពេលបច្ចុប្បន្ននេះ នៅតាមបណ្តាភូមិស្រុកនានាសុទ្ធតែមានអ៊ីនធើណេតប្រើ។ ហើយការធ្វើទំនើបកម្មនេះ គឺធ្វើមិនមែនធ្វើឱ្យតែល្អមើលនោះទេ គឺធ្វើដើម្បីបម្រើប្រជាពលរដ្ឋ។ ហេតុដូច្នេះហើយ ទាមទារនូវការបង្កើនសមត្ថភាព និងរបៀបរបបការងារដល់មន្រ្តី ដើម្បីធានានូវការផ្តល់សេវាតាមប្រព័ន្ធបច្ចេកវិទ្យា។ ហើយនេះគឺជាការពង្រឹងមូលដ្ឋាន នៅក្នុងអាណត្តិនេះ៕
