សម្ដេចធិបតី៖ អ្វីដែលកម្លាំងដោះមីនខិតខំកន្លងមកនេះ ពិតជាផ្ដល់នូវសុវត្ថិភាព សុភមង្គលដល់ពលរដ្ឋ រាប់លាននាក់
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា អ្វីដែលកងកម្លាំងប្រតិបត្តិករដោះមីនបានខិតខំកន្លងមកនេះ គឺពិតជាបានផ្ដល់នូវសុវត្ថិភាព សុភមង្គលដល់ប្រជាពលរដ្ឋរាប់ម៉ឺននាក់ រាប់សែននាក់ រាប់លាននាក់ ។
ក្នុងពិធីសម្ពោធដាក់ឱ្យប្រើប្រាស់អគាររដ្ឋបាលថ្មី និងសមិទ្ធផលនានានៅខេត្តកំពង់ស្ពឺ នាថ្ងៃទី៣០ តុលា សម្ដេចធិបតី បានមានប្រសាសន៍ថា កំពង់ស្ពឺជាខេត្តទី១៣ ដែលត្រូវបានរំដោះមីនអស់រួចរាល់ នេះបានន័យថា សង្គ្រាមក៏ចប់ មីនក៏ត្រូវបានដោះចេញជាបន្តបន្ទាប់ ហើយកម្ពុជាក៏បានប្ដេជ្ញាចិត្ត មិនប្រើប្រាស់មីនទៀតនោះឡើយ ហើយឈានទៅដល់ការរួមគ្នា ដើម្បីដោះស្រាយបញ្ហាមីនជូនប្រជាពលរដ្ឋកាន់តែច្រើន។
សម្ដេចធិបតី បញ្ជាក់ថា «អ្វីដែលកងកម្លាំងប្រតិបត្តិករដោះមីនបានខិតខំកន្លងមកនេះ គឺពិតជាបានផ្ដល់នូវសុវត្ថិភាព សុភមង្គលដល់ប្រជាពលរដ្ឋរាប់ម៉ឺននាក់ រាប់សែននាក់ រាប់លាននាក់ ក្នុងនោះគឺបានជួយប្រជាពលរដ្ឋឱ្យបានរួចផុតពីគ្រោះថ្នាក់ ស្លាប់ របួស ឬពិការ និងថែមទាំងរំដោះដីស្រែចម្ការឱ្យប្រជាពលរដ្ឋរាប់សែននាក់រាប់លាននាក់មានដីធ្វើកសិកម្មបានសុខស្រួល»។
សម្ដេចធិបតីថា ជាមោទនភាពរបស់កម្ពុជា គឺមិនត្រឹមតែការខិតខំរំដោះមីនក្នុងប្រទេសនោះទេ ថែមទាំងបានបញ្ជូនកម្លាំងដោះមីនចេញទៅជួយដោះមីននៅបណ្ដាប្រទេសជាច្រើនទៀត ក្រោមឆត្រអង្គការសហប្រជាជាតិ ក្នុងនោះក៏មានការចូលរួមរបស់កងកម្លាំងថែរក្សាសន្តិភាពរបស់កម្ពុជាផងដែរ ៕
