ឯកឧត្តម សន្តិបណ្ឌិត យូ ស៊ុនឡុង អញ្ជើញត្រួតពិនិត្យទីតាំងត្រៀមរៀបចំពិធីសម្ពោធដាក់ឱ្យប្រើប្រាស់ជាផ្លូវការអគារទីស្ដីការក្រសួងមហាផ្ទៃថ្មី

ភ្នំពេញ៖ ឯកឧត្តម សន្តិបណ្ឌិត យូ ស៊ុនឡុង រដ្ឋមន្ត្រីប្រតិភូអមនាយករដ្ឋមន្ត្រី នារសៀលថ្ងៃចន្ទ ទី៣០ ខែតុលា ឆ្នាំ២០២៣ បានអញ្ជើញដឹកនាំក្រុមការងារពាក់ព័ន្ធចុះត្រួតពិនិត្យទីតាំងត្រៀមរៀបចំប្រារព្ធពិធីសម្ពោធដាក់ឱ្យប្រើប្រាស់ជាផ្លូវការនូវអគារទីស្ដីការក្រសួងមហាផ្ទៃថ្មី។ នៅក្នុងដំណើរចុះត្រួតពិនិត្យនេះ ក៏មានការអញ្ជើញចូលរួមពី ឯកឧត្តម សន្តិបណ្ឌិត ម៉ៅ ច័ន្ទតារា រដ្ឋលេខាធិការប្រចាំការ, រដ្ឋលេខាធិការ អនុរដ្ឋលេខាធិការ ក្រសួងមហាផ្ទៃ និងថ្នាក់ដឹកនាំនៃក្រសួង ស្ថាប័នពាក់ព័ន្ធ ផងដែរ។

នាឱកាសនោះ ឯកឧត្តម សន្តិបណ្ឌិត យូ ស៊ុនឡុង រដ្ឋមន្ត្រីប្រតិភូអមនាយករដ្ឋមន្ត្រី រួមជាមួយថ្នាក់ដឹកនាំក្រសួង ស្ថាប័នពាក់ព័ន្ធ បានអញ្ជើញត្រួតពិនិត្យនូវទីតាំងនានាជុំអគារទីស្តីការថ្មីក្រសួងមហាផ្ទៃ និងទីតាំងបម្រើការងារមួយចំនួនរបស់មន្ត្រីរាជការនៃក្រសួងមហាផ្ទៃ ព្រមទាំងពិនិត្យមើលទីតាំងត្រៀមរៀបចំប្រារព្ធពិធីសម្ពោធដាក់ឱ្យប្រើប្រាស់ជាផ្លូវការនូវអគារថ្មីនៃទីស្ដីការក្រសួងមហាផ្ទៃ ផងដែរ។

សូមជម្រាបជូនថា ក្រសួងមហាផ្ទៃ នឹងរៀបចំពិធីសម្ពោធដាក់ឱ្យប្រើប្រាស់ជាផ្លូវការនូវអគារថ្មីនៃទីស្ដីការក្រសួងមហាផ្ទៃ នាដើមខែវិច្ឆិកា ឆ្នាំ២០២៣ដ៏ខ្លីខាងមុខ ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ៕