សាខាកាកបាទក្រហមកម្ពុជាខេត្តកណ្តាល ចុះសំណេះសំណាល និងផ្ដល់អំណោយមនុស្សធម៌ ជូនកុមារកំព្រា នៅសមាគមស្នាមញញឹមថ្មីនៃក្ដីសង្ឃឹមរបស់កុមារ ក្នុងស្រុកកណ្ដាលស្ទឹង

ភ្នំពេញ៖ ឯកឧត្តម គង់ សោភ័ណ្ឌ អភិបាល នៃគណ:អភិ បាលខេត្តកណ្ដាល និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត ព្រមទាំងសមាជិក-សមាជិកា នាព្រឹកថ្ងៃទី៣១ ខែតុលា ឆ្នាំ២០២៣ បានអញ្ជើញចុះសំណេះសំណាល សាកសួរសុខទុក្ខ និងបាននាំយកអំណោយមនុស្សធម៌ ឧបត្ថម្ភជូនដល់លោកគ្រូ-អ្នកគ្រូ ចំនួន ១៦នាក់ និងកុមារកំព្រាចំនួន ១១៤នាក់ នៅសមាគមស្នាមញញឹមថ្មីនៃក្ដីសង្ឃឹមរបស់កុមារ ដែលស្ថិតនៅភូមិក្រសាំង ឃុំជើងកើប ស្រុកកណ្ដាលស្ទឹង។

ថ្លែងក្នុងពិពីនេះ ឯកឧត្តម គង់ សោភ័ណ្ឌ ប្រធានគណៈកម្មាធិការសាខាកាកបាទក្រហមកម្ពុជាខេត្ត ក៏បានផ្ដាំផ្ញើនូវការសាកសួរសុខទុក្ខ និងសេចក្តីអាណិតស្រឡាញ់ពីសំណាក់ សម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទ ក្រហមកម្ពុជា ចំពោះកុមារកំព្រា បុគ្គលិក និងលោកគ្រូ-អ្នកគ្រូនៅក្នុងសមាគមស្នាមញញឹមថ្មីនៃក្ដីសង្ឃឹមរបស់កុមារទាំងមូលផងដែរ។

ឯកឧត្តមប្រធានគណៈកម្មាធិការសាខា បានបញ្ជាក់ថា ក្នុងគោលបំណងជួយសម្រួលដល់ការរស់នៅ និងចិញ្ចឹមបីបាច់ថែរក្សា កុមារកំព្រា កុមារដែលត្រូវឪពុកម្ដាយបោះបងចោល ឬក្មេងដែលក្រីក្រជាដើម ឯកឧត្តមបានជួយឧបត្ថម្ភដល់សមាគមនេះក្នុងមួយឆ្នាំ ២ដង ហើយនេះគឺជាលើកទី២ ហើយ ដែលឯកឧត្តមបានជួយឧបត្ថម្ភដល់សមាគមនេះក្នុងឆ្នាំ ២០២៣។

ឯកឧត្តម បានកោតសរសើរដល់ថ្នាក់ដឹកនាំ បុគ្គលិក គ្រូបង្រៀននៅក្នុងសមាគមស្នាមញញឹមថ្មី នៃក្ដីសង្ឃឹមរបស់កុមារទាំងអស់ ដែលបានខិតខំបីបាច់ថែរក្សាកុមារកំព្រា ប្រកបដោយការយកចិត្តទុកដាក់ខ្ពស់ ដែលធ្វើឱ្យការរស់ របស់ កុមារទាំងអស់នោះ កាន់តែប្រសើរឡើង ទទួលបានការសិក្សា និងចំណេះដឹង ជាពិសេសធ្វើឱ្យកុមារទាំងនោះមានសង្ឃឹមក្នុងការរស់ននៅក្នុងសង្គម។

សូមបញ្ចាក់ថា អំណោយដែល សាខាកាកបាទក្រហមកម្ពុជាខេត្ត បានឧបត្ថម្ភ ដល់សមាគមស្នាមញញឹមថ្មីនៃក្ដីសង្ឃឹមរបស់កុមារ រួមមាន៖ អង្ករ ១.០០០គីឡូក្រាម, មី ២០កេស, ត្រីខកំប៉ុង ១កេស, ទឹកត្រី ២០យួរ, ទឹកសុទ្ធ ២០កេស, ទឹកផ្លែឈើ ៥កេស, ទឹកដោះគោខាប់ ១កេស និងថវិកាចំនួន ៤.០០០.០០០រៀល ៕